Qarabağ münaqişəsi
haqqında yeni kitab nəşr olunub
Avropada Qarabağ
münaqişəsi haqqında yeni nəşr -
"Qarabağ müharibəsi: Qafqaz regionunda böhran və
münaqişə menecmentliyi" adlı kitab işıq
üzü görüb. Avstriya Müdafiə
Nazirliyinin təşəbbüsü
və maliyyə dəstəyi ilə Vyanada Liberal Siyasət üçün
Beynəlxalq İnstitutun
(Internationales Institut für Liberale Politik) "Münaqişə
menecmentliyi" layihəsinin
yekunu olaraq dərc olunan bu kitab alman
və ingilis dilində elmi məqalələr toplusundan
ibarətdir. Almaniya, Avstriya, Rusiya
və Türkiyədən
olan region üzrə tanınmış
mütəxəssislərin hazırladığı bu
kitab son illərdə Azərbaycan-Ermənistan, Dağlıq
Qarabağ münaqişəsi
ətrafında cərəyan
edən proseslərin sistemli təhlilinə dair ilk kollektiv
araşdırmadır. Qeyd edək ki, sözügedən layihədə Azərbaycandan
olan gənc tədqiqatçı, Almaniyanın
Mannhaym Universitetinin siyasi elmlər doktoru, Azərbaycanlı Tələbələr və
Elmi İşçilər
Birliyinin (ATEİB) üzvü
Azər Babayev də iştirak edib. Onun kitabda
"Dağlıq Qarabağ
münaqişəsinə Azərbaycanın
baxışı" mövzusunda
geniş araşdırması
yer alıb. Bu araşdırmanı son illərdə alman dilində Dağlıq Qarabağ münaqişəsi haqqında
Azərbaycan həqiqətləri
baxımından yazılmış
ən sanballı elmi məqalələrdən
hesab etmək olar. Azər Babayev öz məqaləsində xüsusilə
Azərbaycanın son dövrlərdə regionda
artan əhəmiyyətinə
və buna paralel olaraq Ermənistanın bölgədəki
beynəlxalq əhəmiyyətli
layihələrdən təcrid
olunmasına diqqəti
cəlb edib. Siyasi elmlər doktoru daha sonra
keçən il Cənubi Osetiya ətrafında baş verən hadisələrin münaqişənin Azərbaycanın
maraqları baxımından
ədalətli həlli
üçün əlavə
imkanlar yaratdığı
tezisini irəli sürür. Azər Babayevin məqaləsi
həmçinin Azərbaycanın
hüquqi, siyasi və tarixi müstəvidə münaqişə
ilə bağlı arqumentlərinin Qərb elmi ictimaiyyətinə sistemli şəkildə təqdim olunması, habelə Azərbaycanın
xarici siyasətinin təhlili baxımından
da əhəmiyyət
kəsb edir.
Xatırladaq ki, Azər
Babayev Almaniyada fəaliyyət göstərən Azərbaycanlı
Tələbələr və Elmi İşçilər
Birliyinin fəal üzvü olmaqla yanaşı, həm də
Birliyin Mannhaym Universitetindəki şöbəsinə rəhbərlik
edir.
ZÜMRÜD
Mədəniyyət.- 2009.- 20 may.- S. 9.