Londonda Azərbaycan dilində iki məktəb açılıb

"Caspian-Xəzri" cəmiyyəti layihələrinin sayını artırır

Son dövrlər siyasi müstəvidə qarşılaşdıqlarımız əyani şəkildə diktə edir ki, xarici ölkələrdə yaşayan soydaşlarımız bir-biriləri ilə sıx birləşməli və Azərbaycan haqqında həqiqətlərin dünya ictimaiyyətinə çatdırılmasında yaxından əməkdaşlıq etməlidirlər. Eyni zamanda onlar çalışmalıdırlar ki, ölkəmizin tarixi, mədəniyyəti, adət-ənənələri haqqında yaşadıqları ölkələrin insanlarında müəyyən təsəvvürlər olsun. Onu da qeyd edək ki, son vaxtlar yuxarıda sadaladığımız məqsədlərlə yaradılan və öz fəaliyyətlərini getdikcə genişləndirən bir çox cəmiyyətlər var ki, qəzet olaraq onların gördükləri işlər haqqında yazmağı özümüzə borc bilirik. Belə qurumlardan biri də artıq bir ildir Böyük Britaniyanın London şəhərində fəaliyyət göstərən «Caspian-Xəzri» cəmiyyətidir. Həmin cəmiyyətin üzvü, eyni zamanda «Qadın və uşaqların sosial təminatı» İctimai Birliyinin gənclərlə iş üzrə sədr müavini Könül Əliyeva bugünlərdə redaksiyamızın qonağı oldu. O, «Caspian-Xəzri» cəmiyyətinin fəaliyyəti ilə bağlı danışaraq bildirdi ki, qurum bir il ərzində artıq üç böyük layihə həyata keçirib: «Cəmiyyəti yaratmaqda əsas məqsədimiz Londonda yaşayan azərbaycanlıları bir araya gətirməkdir. Ən əsası isə bu şəhərə təhsil almaq məqsədilə yeni gələn, nə edəcəyini ilk baxışdan bilməyən gənclərə kömək edirik. Çünki böyük bir şəhərə yenicə düşən gənclərimiz çaşqınlıq içində olurlar. Xüsusilə bakalavr təhsili almaq istəyənlərə yerləşməkdə, təhsil alacaqları universitetlərin yolunu-izini öyrənməkdə, hətta tanımadıqları ərzaqlardan yemək hazırlamaqda belə kömək lazım olur. Bunları qarşımıza məqsəd qoyub bu cəmiyyəti yaratdıq. Cəmiyyəti yaratdıqdan sonra qarşılaşdığımız problemlər göstərdi ki, biz fəaliyyətimizi daha geniş sferada qurmalıyıq. Ona görə də bir sıra layihələr həyata keçirməyə başladıq. Bunlardan birincisi odur ki, Londonda yaşayan azərbaycanlı ailələrin övladları üçün ana dillimizdə iki məktəb açdıq. Bu məktəblər Avropada ilk Azərbaycan məktəbləri hesab edilir. Səbəb isə odur ki, burada yaşayan azərbaycanlı ailələrlə yaxından tanış olduqdan sonra gördük ki, bu ailələrdə valideynlərlə uşaqlar arasında sanki bir baryer yaranıb. Belə ki, uşaq ingilisdilli məktəbdə oxuyur, Qərb üslubunda böyüyür, ingilis dilində danışır, Azərbaycanın mədəniyyəti, tarixi, adət-ənənələri haqqında tamamilə bilgisiz olur. Bu məktəblərdə belə uşaqlar üçün kurslar keçilir. Kurslarda uşaqlara Azərbaycan dili, ədəbiyyatı, tarixi, coğrafiyası tədris edilir. Bundan əlavə, uşaqlara kulinariyamız, rəqslərimiz, milli adət-ənənələrimiz haqqında bilgilər verilir».

K.Əliyevanın dediyinə görə, valideynlər uşaqlarının bu kurslarda təhsil almasında çox maraqlıdırlar. Məktəblərin fəaliyyəti üçün lazım olan maddi vəsaiti Avropa-Azərbaycan cəmiyyəti verir. Dərsliklər isə ölkəmizin Böyük Britaniyadakı səfirliyinin köməyi ilə Azərbaycandan aparılır.

«Caspian-Xəzri» cəmiyyətinin həyata keçirdiyi ikinci böyük layihə «Sara Xatun» qadın cəmiyyətinin qurulmasıdır. Könül xanım bildirir ki, bu cəmiyyəti yaratmaqda da məqsədləri orda yaşayan azərbaycanlı qadınları bir araya gətirməkdir: «Azərbaycanlı ailələrə yaxınlaşdıqda məlum oldu ki, qadınların biri stomatoloqdur, biri ginekoloqdur, biri kosmetoloqdur və s. Yəni onların hər birinin öz sənəti var. Biz də «Sara Xatun» cəmiyyətini yaratmaqla istədik ki, bu qadınları həmin qurumda bir araya gətirək və onlar bir-birilərinin bacarıqlarından istifadə edə bilsinlər. Üstəlik də, birinin bir problemi olanda digərləri ilə məsləhətləşsin və köməkli həll etsinlər. Beləliklə, onlar getdikcə daha çox yaxınlaşırlar və aralarında birlik yaranır».

K.Əliyevanın dediyinə görə, təşkilatlarının həyata keçirdiyi üçüncü layihə «Buta» ansamblının yaradılması ilə bağlıdır: «Hazırda mən həmin ansamblın bədii rəhbəriyəm. Bu ansamblı yaratmaqda xüsusi bir marağımız var. Bu da ondan ibarətdir ki, milli rəqslərimizlə, ifalarımızla, geyimimizlə Azərbaycan mədəniyyətini Avropada tanıdırıq. Rəqs zamanı istifadə etdiyimiz bütün paltarları Azərbaycandan sifariş etmişik. Qrupumuz 16 nəfərdən ibarətdir. Böyük Britaniyanın, demək olar ki, bütün bölgələrində çıxış etmişik. Bundan əlavə, oradakı azərbaycanlı icmalar bizi özlərinin müxtəlif tədbirlərinə dəvət edirlər».

Qeyd edək ki, «Caspian-Xəzri» cəmiyyəti bu üç böyük layihədən əlavə, kiçik layihələr də həyata keçirir. Məsələn, bu yaxınlarda «Odlar Yurdu» cəmiyyəti ilə birlikdə «Azərbaycan gözəli» yarışmasını keçiriblər. Bundan əlavə, cəmiyyətin üzvləri milli bayramımız olan Novruzu təntənəli qeyd edir, Xocalı soyqırımı günü müxtəlif toplantılar, tədbirlər keçirirlər.

Gələcək planlarından da danışan K.Əliyeva bildirdi ki, «Caspian-Xəzri» cəmiyyəti artıq Azərbaycan dilində üçüncü məktəbi açmaq üzrədir. Bu isə Şotlandiyada reallaşdırılır.

Sonda müsahibimiz həyata keçirməyi planlaşdırdıqları daha bir layihə ilə bağlı da məlumat verdi. Könül xanımın dediyinə görə, bu layihə Londonda təhsil alan azərbaycanlı tələbələrin himayə edilməsi və onların valideynləri ilə əlaqələndirilməsi üçün nəzərdə tutulur. Belə ki, cəmiyyət üzvləri həmin tələbələrin universitetə gedib, gəlməsinə, kimlərlə qalmasına, gün ərzində hansı işlərlə məşğul olmasına nəzarət edəcəklər. Bunun da nəticəsində valideynlər Azərbaycanda ola-ola Böyük Britaniyada təhsil alan övladlarına nəzarət edəcəklər.

Fəxriyyə ABDULLAYEVA

Mədəniyyət.- 2009.- 14 oktyabr.- S. 14.