Moskvada İslam Mədəniyyəti Mərkəzinin
yeni binasının açılışı olub
Rusiyanın İslam Mədəniyyəti
Mərkəzinin (İMM) yeni binasının təntənəli
açılış mərasimi olub. Mərasimdə ictimai və
siyasi xadimlər, ölkənin respublika və
regionlarının müsəlman birliklərinin rəhbərləri,
bir sıra dövlətlərin Moskvadakı səfirliklərinin
nümayəndələri iştirak ediblər.
Rusiya Müftilər
Şurasının sədri Ravil Qaynutdin mərasimi açaraq
bildirib ki, öz gələcəyini dini
dözümlülük ruhunda quran Rusiya, o cümlədən
Moskva müsəlmanlarına böyük diqqət yetirilir,
onlara Moskva hökuməti, eləcə də federal hakimiyyət
orqanları tərəfindən hər cür dəstək
göstərilir, müxtəlif xalqların və dinlərin
nümayəndələrinə öz dini tələbatlarının
ödənilməsi üçün şərait
yaradılır: "Rusiya Müftilər Şurasının
ictimai qolu kimi mövcud olan və uğurla fəaliyyət
göstərən İMM-in müvəqqəti
binasının açılışı paytaxtda, eləcə
də Rusiyada sülhün, əmin-amanlığın və
sabitliyin möhkəmlənməsinə öz töhfəsini
verəcək".
Rusiya İslam Mədəniyyəti
Mərkəzinin sədri Əbdül Vahid Niyazov bildirib ki,
hazırda 5 məscidin fəaliyyət göstərdiyi Moskvada
rəsmi məlumatlara görə, təxminən 1,2 milyon
müsəlman yaşayır ki, bu da Rusiya paytaxtı əhalisinin
təxminən 12-14 faizini təşkil edir. Qeyri-rəsmi məlumatlara
görə isə, paytaxtda müsəlmanların sayı 2
milyon nəfərə çatır. Moskva hökumətinin qərarı
ilə hazırda paytaxtda Cümə məscidi bərpa olunur.
10 dəfə genişləndiriləcək məscid 20 minədək
dindarı qəbul edə biləcək. Şərq Humanitar Mərkəzinin
tikintisi davam edir. Burada İMM, İslam Sivilizasiyası
İnstitutu, "İslam dünyası" teleradioşirkəti
və bir çox digər qurumlar yerləşəcək.
Azərbaycanın
Rusiyadakı səfiri Polad Bülbüloğlu deyib ki, bir
sıra ölkələrdə çox təəssüf ki,
İslamı ekstremizmlə, dinlə heç bir
bağlılığı olmayan çirkin əməllərlə
eyniləşdirməyə çalışırlar. Bu
baxımdan, Rusiyada İslam Mədəniyyəti Mərkəzinin
açılması çox mühüm hadisədir. Onun
sözlərinə görə, İMM Moskvada İslamın məhz
humanist mahiyyətinin açılmasına istiqamətlənmiş
bir çox tədbirlər təşkil edir.
Mədəniyyət.-2009.-31 yanvar.-S.2.