Ümummilli lider Xızıda anıldı

Gülər Əhmədova: «Heydər Əliyev ötən əsrin 90-cı illərində Azərbaycana qayıtmasaydı, xalqa rəhbərlik etməsəydi, bu gün Azərbaycanı parçalanmış bir vəziyyətdə görə bilərdik»

Mayın 10-u Azərbaycanın ümummilli lideri Heydər Əliyevin doğum günüdür. Bu əlamətdar tarixlə əlaqədar olaraq ölkəmizin müxtəlif bölgələrində anım mərasimləri keçirilir. Belə tədbirlərdən biri də mayın 6-da Xızı rayonunda keçirildi. Xızı Rayon İcra Hakimyyəti və Beynəlxalq Diaspor Mərkəzinin (BDM) birgə təşkilatçılığı ilə baş tutan mərasimdə rayon ictimaiyyəti ilə yanaşı, ölkə ictimaiyyətinin tanınmış nümayəndələri, millət vəkili Gülər Əhmədova, qeyri-hökumət təşkilatlarının təmsilçiləri, Azərbaycandakı milli azlıqların, o cümlədən Ukrayna, rus, tatar cəmiyyətlərinin nümayəndələri, Türkiyənin Azərbaycandakı səfirliyinin məsul şəxsləri iştirak edirdi.

Öncə rayon ictimaiyyətinin nümayəndələri, rayonun rəhbər strukturlarının təmsilçiləri, mərasimdə iştirak etmək üçün rayona gələn şəxslər Heydər Əliyevin Xızı şəhərinin mərkəzi parkında ucaldılan abidəsini ziyarət etdilər.

Ziyarətdən sonra Qala abidəsinin qarşısında tədbir başlandı. Tədbiri giriş sözü ilə açan Xızı Rayon İcra Hakimiyyətinin başçısı Vaqif Abdullayev qeyd etdi ki, Xızı tarixən beynəlmiləlçi rayon kimi tanınıb. İcra başçısı bildirdi ki, rayon ərazisində milli azlıqların nümayəndələri bu gün də yaşayır. Onun fikrincə, tədbirdə milli azlıqların təmsilçilərinin iştirakı rayona çox böyük hörmət, həmçinin Heydər Əliyevə olan sədaqətin göstəricisidir.

V.Abdullayev Xızının sosial-iqtisadi vəziyyətinin yaxşılaşdırılması üçün Heydər Əliyevin və onun siyasətini davam etdirən prezident İlham Əliyevin hakimiyyəti dövründə çox böyük işlər görüldüyünü dedi. Onun sözlərinə görə, son illərdə görülən işlər nəticəsində rayona qayıdan xızılıların sayı artıb.

Sonra Beynəlxalq Diaspor Mərkəzinin Məşvərət Şurasının sədri, millət vəkili Gülər Əhmədova çıxış etdi. Millət vəkili çıxışının əvvəlində ümummilli liderin ad günü ilə bağlı xüsusi mərasimin keçirilmə səbəblərinə aydınlıq gətirdi: «Bu gün müstəqil, suveren ölkədə yaşayırıqsa, biz Heydər Əliyevə borcluyuq. Görülən işlər nəticəsində Azərbaycan hazırda cənubi Qafqazın ən güclü dövlətidir, ən güclü iqtisadiyyata və orduya sahib olan ölkəsidir. Azərbaycan yaxın zamanlarda Yaxın Şərqin ən gözəl ölkələrindən birinə çevriləcək. Buna görə də hər bir dövlət qulluqçusu, vətəndaş, yetişən gənc nəsil Heydər Əliyevin doğum gününü qeyd etməlidir. Hər zaman fəaliyyətimizlə onun nəsihətlərini həyata keçirməyə çalışmalıyıq».

G.Əhmədova qeyd etdi ki, hər bir azərbaycanlının ürəyində Heydər Əliyevə xüsusi bir minnətdarlıq hissi var: «Hər kəs gözəl bilir ki, Heydər Əliyev ötən əsrin 90-cı illərində Azərbaycana qayıtmasaydı, xalqa rəhbərlik etməsəydi, bu gün Azərbaycanı parçalanmış bir vəziyyətdə görə bilərdik. Heydər Əliyevin apardığı uğurlu siyasətin nəticəsidir ki, Azərbaycan regionun ən güclü dövlətidir. Baxmayaraq ki, bizim Qarabağ boyda dərdimiz var, uzun illərdir ki, bu problemlə üz-üzəyik, amma biz hər zaman bu problemin qarşısında durmağa özümüzdə güc və qüvvət tapmışıq. Hamı prezident İlham Əliyevin çıxışlarını izləyir. Çox böyük əminliklə deyə bilərəm ki, Qarabağla bağlı atılan bütün addımlar çox yaxın zamanda veriləcək konkret qərarlara bağlıdır».

G.Əhmədova Heydər Əliyevin müəyyənləşdirdiyi siyasi kursun bu gün prezident İlham Əliyev tərəfindən uğurla davam etdirildiyini söylədi: «Keçmiş sovet respublikaları ilə müqayisədə Azərbaycanda siyasi və iqtisadi sabitliyin qorunub saxlanılması, balanslı siyasətin həyata keçirilməsi imkan verdi ki, biz Gürcüstanın vəziyyətinə düşməyək. Əvvəllər çox insan balanslı siyasət dedikdə nəyin nəzərdə tutulduğunu tam dərk edə bilmirdi. Amma bir il bundan öncə Gürcüstanda baş verən hadisələrdən sonra Azərbaycan prezidentinin Heydər Əliyev siyasi kursunu nə qədər uğurlu davam etdirməsinin şahidi olduq. Son prezident seçkisində insanların İlham Əliyevə olan səmimi münasibətini, dəstəyini də gördük. Mən bələdiyyə seçkilərində, referendumda Xızı rayonunda olmuşam və dəqiq bilirəm ki, xızılılar hər zaman Heydər Əliyev siyasətini dəstəkləyib, İlham Əliyev siyasətinin arxasınca gedirlər».

G.Əhmədova Xızıda xüsusi anım mərasiminin keçirilməsinin təsadüfi olmadığını da dedi. O bildirdi ki, Xızı Azərbaycanın ən çox gözəlləşən, inkişaf edən rayonlarından biridir: «Son illərdə Xızıda, nəinki abadlaşma, eyni zamanda, sənaye obyektlərinin tikilməsi, insanların iş yerləri ilə təmin olunması məsələsi də ön plana çəkilir. Bu uğurlu sosial və iqtisadi siyasətin təməlini qoyan məhz Heydər Əliyev olub. Heydər Əliyev siyasətini uğurla davam etdirən prezident İlham Əliyevin regionlarda apardığı quruculuq işləri, əhalinin sosial təminatının yaxşılaşdırılması məsələsi Xızı da öz yerini tapır. Dövlət başçısı tərəfindən olan qayğı, xüsusilə də yaşlı insanlara olan diqqət, əlillərlə bağlı prezident tərəfindən verilən sərəncamlar, Qarabağ əlillərinə olan qayğının artırılması xızılılar üçün də ən önəmli məsələlərdəndir».

Beynəlxalq Diaspor Mərkəzinin sədri İsmayıl Ağayev isə BDM-in ardıcıl olaraq üçüncü ildir ki, Xızı rayonunda Heydər Əliyevin doğum gününü qeyd etdiyini bildirdi. O söylədi ki, budəfəki tədbirdə BDM-in Avropa təmsilçiliyinin nümayəndəsi, həmçinin Rusiya nümayəndəliyinin rəhbəri də iştirak edir. İ.Ağayev bildirdi ki, məhz Heydər Əliyevin hakimiyyəti dövründə ilk dəfə olaraq dünyanın müxtəlif yerlərində yaşayan azərbaycanlılara diqqət artırılıb, diaspor təşkilatları gücləndirilib: «Dünyada 50 milyondan artıq azərbaycanlı var və biz hamımız Heydər Əliyevin vaxtilə dediyi «Mən fəxr edirəm ki, hamımızın bir vətəni var o, da Azərbaycandır» devizini rəhbər tutmalıyıq, onu yaşatmalıyıq».

Türkiyənin Azərbaycandakı səfirliyinin müşaviri İsmayıl Çalışqan da Heydər Əliyevlə bağlı düşüncələrini açıqladı.

Onun sözlərinə görə, Azərbaycan Heydər Əliyevin bir neçə il öncə müəyyənləşdirdiyi siyasi yolu davam etdirməklə ciddi nailiyyətlər əldə edə bilib: «Heydər Əliyevin Azərbaycanda hansı işlər gördüyünü çox yaxından izlədik. Onun fikirləri ilə hərəkət edən Azərbaycan bu gün çox sürətlə inkişaf edir. Dünyada Azərbaycanın hər sahədə getdikcə yüksəlməsinin şahidi oluruq.

Bütün dünya bilir ki, Azərbaycan və Türkiyənin dünyada baş verən hadisələrə münasibəti eynidir. Bu iki qardaş ölkə arasında olan münasibətlərə xələl gətirməyin mümkün olmadığını da başa düşürlər. Heydər Əliyevin vaxtilə söylədiyi «bir millət iki dövlət» həqiqəti bundan sonra da davam edəcək».

«Diasporun səsi» jurnalının baş redaktoru, professor Vaqif Arzumanlı isə bildirdi ki, bu əlamətdar hadisə Azərbaycanın hər bir rayonunda qeyd olunur. Onun fikrincə, bu münasibəti Heydər Əliyev öz fəaliyyəti və dünyaya Azərbaycanı tanıtmağı ilə qazanıb. Siyasətdə uzaqgörənliyin çox vacib keyfiyyət olduğunu deyən alim bildirdi ki, Heydər Əliyevin uzaqgörən siyasəti nəticəsində Azərbaycan təhlükələrdən qaçaraq güclü dövlətə çevrildi: «İndi Azərbaycan müharibəyə hazır, güclü ordusu olan dövlətdir. Heydər Əliyevin vəsiyyətləri nəticəsində Azərbaycana rəhbərlik edən İlham Əliyevin yenə də uzaqgörən, ağıllı siyasəti nəticəsində bu gün ən güclü düşmənə belə cavab verməyə hazırıq».

Milli QHT Forumunun sədri Rauf Zeyni də Heydər Əliyevin doğum gününü Azərbaycanın taleyində çox önəmli günlərdən biri kimi qiymətləndirdi. O əmindir ki, Heydər Əliyevin başlatdığı, prezident İlham Əliyevin isə davam etdirdiyi siyasət nəticəsində Qarabağ problemi həllini tapacaq: «Bu məqsədlə ordu gücləndirilir, iqtisadiyyat inkişaf etdirilir».

«Olaylar» İnformasiya Agentliyinin və eyniadlı qəzetin təsisçisi, yazıçı Yunus Oğuz Heydər Əliyevi güclü dövlət adamları ilə müqayisə etdi: «Almaniyanın kansleri Otto Bismark, Fransanın prezidenti Şarl de Qol, Türkiyənin prezidenti Atatürk öz ölkələri üçün hansı işləri görüblərsə, Heydər Əliyev də Azərbaycan üçün onu edib. Adını sadaladığım insanların hamısı ölkələrini parçalanmaqdan xilas ediblər, qoruyublar, birləşdiriblər, müharibələrdən xilas ediblər. Bu ölkələr indi dünyanın ən güclü ölkələrindəndir. Azərbaycan isə qısa müddətdə Qafqazın ən güclü dövlətinə çevrildi».

Tədbir daha sonra musiqili hissə ilə davam etdirildi. Tədbirdə, həmçinin Yeni Azərbaycan Partiyasının Xızı rayon təşkilatının sıralarına daxil olan 4 nəfər gəncə partiyanın üzvlük vəsiqəsi təqdim edildi.

Vasif Cəfərov

Mərkəz.- 2010.- 8 may.- S. 4.