Elektron «Təcavüz» təqdim olundu

Ötən gün Azərbaycan Respublikası Prezidentinin İşlər İdarəsinin Prezident Kitabxanasında kitabxananın əməkdaşları tərəfindən hazırlanmış beş fəsildən ibarət «Təcavüz. Bakı. 20 Yanvar. 1990» adlı elektron nəşrin təqdimat mərasimi keçirildi. Əvvəlcə tanınmış fotoqraf Mirnaib Həsənoğlunun fövqəladə vəziyyət rejimində çəkdiyi və indiyə kimi heç yerdə göstərilməmiş fotolar göstərildi.

Elektron nəşr haqqında məlumat verən kitabxananın direktoru Mayıl Əhmədov məqsədlərinin mərkəzləşdirilmiş məlumat bazası yaratmaq olduğunu diqqətə çatdırdı. Direktorun sözlərinə görə, faciədən 20 il ötməsinə baxmayaraq, bu gün də onun haqqında kitablar yazılır: «Məlumat bazasının yaradılmasında məqsədlərimizdən biri də faciənin tam öyrənilməsidir. Burada arxiv sənədlərdən, mətbuatda gedən yazılardan və ayrı-ayrı materiallardan istifadə olunub. Amma təəssüflə qeyd etməliyəm ki, 20 il keçməsinə baxmayaraq, faciə ilə bağlı yazılan kitablar barmaq sayı qədər azdır. Məhz bu amil də gördüyünüz elektron kitabı yaratmağımızın əsas səbəblərindən biri oldu».

M.Əhmədov həmçinin qeyd etdi ki, məlumat bazasına hər gün əlavə yazılar, fotolar əlavə olunduğundan, vətəndaşlar da şəxsi arxivlərindəki materialları təqdim edə bilərlər.

Daha sonra M.Əhmədov elektron nəşr barəsində ətrafla məlumat verdi: «Kitabxanamızın əməkdaşları tərəfindən hazırlanmış bu elektron nəşrin «Azərbaycana qarşı cinayət» adlanan birinci fəslində qan yaddaşımız olan «20 Yanvar» faciəsi haqqında dolğun məlumat verilir. «20 Yanvar» faciəsinə elmi-analitik yanaşma ilk dəfə akademik Ramiz Mehdiyevin «Azərbaycanlılara qarşı soyqırım gerçəklikləri» əsərində öz əksini tapıb. Həmin əsərdə qanlı faciə bir neçə aspektdən-dini, milli, Qafqaz amilləri və geosiyasi aspektlərdən, Dağlıq Qarabağ problemi kontekstindən araşdırılıb, qanlı Yanvarın ibrət dərsləri təhlil edilib. Elektron nəşrdə bu əsər rus, ingilis və Azərbaycan dillərində oxuculara təqdim olunur. Həmin fəslin digər bölməsində «20 Yanvar»a aparan hadisələrin qısa xronologiyası öz əksini tapıb. Sonuncu bölmədə isə «20 Yanvar» şəhidlərinin ümumi siyahısı verilib».

Elektron nəşrin ikinci fəsli «Rəsmi Sənədlər» adlanır. Bu fəslin birinci bölməsində istər sovet hakimiyyəti dövründə, istərsə də müstəqillik dövründə Azərbaycan parlamentində «20 Yanvar» hadisələri ilə bağlı qəbul edilmiş qərarların tam mətni toplanıb. İkinci bölmədə isə mövzu ilə əlaqədar ölkə prezidentinin indiyədək imzaladığı fərman və sərəncamlar öz əksini tapıb. Sonuncu bölmədə isə dövlət başçısının faciə ilə bağlı görüşləri, qəbulları, çıxışları, müsahibələri və bəyanatları yerləşdirilib.

«Müraciətlər, bəyanatlar, tədbirlər» adlanan fəsildə isə adından da göründüyü kimi faciə ilə bağlı olan müraciətlər, qəbul edilən bəyanatlar və keçirilən tədbirlər haqqıda geniş məlumat verilir.

«Elektron resurslar» fəslində 20 Yanvar faciəsinin əks-sədasına aid xarici və yerli mətbuatda dərc edilmiş yazılar, analitik materiallar, kitabların elektron versiyaları və mövzuya dair biblioqrafiya əksini tapıb. Nəşrin «fotoarxiv» bölümündə isə yuxarıda qeyd olunduğu kimi tanınmış fotoqraf Mirnaib Həsənoğlunun çəkdiyi şəkillər yerləşdirilib.

İntiqam VALEHOĞLU

Mərkəz.- 2010.- 19 yanvar.- S. 10.