AJQA “Jurnalist Klubu” yaradır

Azərbaycan Jurnalist Qadınlar Assosiasiyasının (AJQA) sədri Sevil Yusifovanın qəzetimizə müsahibəsi.

- Sevil xanım, istərdim öncə rəhbərlik etdiyiniz təşkilatın fəaliyyəti haqqında məlumat verəsiniz…

- Azərbaycan Jurnalist Qadınlar Assosiasiyasının əsas funksiyası mediada çalışan jurnalist qadınları bir araya toplamaq, onlara müxtəlif layihələri həyata keçirməkdə yardımçı olmaq, ölkə mətbuatının inkişafında qadınların rolunu artırmaqdan ibarətdir. Hesab edirəm ki, AJQA fəaliyyəti dövründə bu sahədə çox uğurlara imza atıb. Yeni-yeni uğurlar qazanmaq üçün səylə çalışırıq.

- Ötən ilin yekunlarına nəzər salsaq, AJQA-nın fəaliyyətini necə qiymətləndirmək olar?

- Ötən il bizim üçün çox məhsuldar, çox uğurlu oldu. Bir sıra iri layihələr həyata keçirdik. “Azercell Telekom”un maliyyə dəstəyi ilə Azərbaycan milli mətbuatı tarixində ilk dəfə olaraq jurnalist qadınlar haqqında “Zərif imzalar” adlı klassik toplu hazırladıq və işıqüzü gördü. Bundan əlavə, ölkəmizdə ilk dəfə olaraq AJQA tərəfindən “Hepatit”lə mübarizə üçün Türkiyədən Hepatitlə Mübarizə Dərnəyinin həkimləri Azərbaycana dəvət olundu. Türkiyəli həkimlər jurnalistlər də daxil olmaqla, 2360 nəfəri pulsuz olaraq “Hepatit” yoxlamasından keçirdilər. Həmçinin, bizim ötən ilin dekabr ayının 20-dən həyata keçirdiyimiz və bu ilin yanvar ayının 30-da yekunlaşacaq daha bir layihəmiz var ki, bu da müxtəlif yazılı və elektron KİV-lərin xəbər departamentlərində çalışan jurnalistlərin “Ankara Medical center”də pulsuz müayinədən keçməsidir.

Bu il də yeni layihələrimiz olacaq. Bildiyiniz kimi, AJQA yeni ofisə köçüb. Burada biz qadın jurnalistlərin iştirakı ilə “Jurnalist Klubu” yaradacağıq. “Jurnalist Kulubu”na cəmiyyətdə tanınmış şəxslər, dövlət rəsmiləri dəvət olunacaqlar. Bu şəxslər qadın jurnalistlərin suallarını cavablandıracaq. Hesab edirəm ki, bu, jurnalistlərin vəzifəli şəxslərə, diplomatlara birbaşa çıxışını təmin edəcək. Layihələrimiz çoxdur, onları zaman-zaman həyata keçirdikcə mətbuata məlumat verəcəyik.

- Hazırda AJQA-nın beynəlxalq əlaqələri hansı səviyyədədir?

- Bizim təşkilatın çox geniş və sıx beynəlxalq əlaqələri var. AJQA daha çox Avropa və Amerikada fəaliyyət göstərən jurnalist təşkilatları və jurnalistlərlə əməkdaşlıq edir. Bu təşkilatlar və jurnalistlər mütəmadi olaraq bizim gördüyümüz işlər haqqında məlumatlar yayırlar. AJQA-nın türkdilli ölkələrin qadın jurnalist təşkilatları ilə də geniş əlaqələri var.

- Hazırda Azərbaycan jurnalistikasında peşəkarlıqla bağlı ciddi problemlər olduğu haqqında fikirlər söylənilir, sizin bu məsələyə münasibətiniz necədir?

- Bu doğrudur, indi hamı jurnalistlərin peşəkarlığından şikayət edir. Amma mən bu məsələni yazılı mətbuata o qədər aid etmirəm. Daha çox problem televiziyalardadır. Televizayaların xəbərlər redaksiyalarında çalışan müxbirlər bəzən diksiyalarında, xəbərin mətnində çox ciddi səhvlərə yol verirlər. Ümumiyyətlə, televiziyalarda çalışanların çoxu gəncdir, buna görə də gənclər öz üzərlərində daha çox işləməli, mütaliə etməlidirlər. Bəzən baxırsan ki, jurnalist tədbirə gəlib, ona press-reliz verməsən, tədbirdən heç nə yaza bilməyəcək. Bax bu, acınacaqlı haldır. İstər yazılı mətbuatda, istərsə də televiziya və radiolarda çox istedadlı, təcrübəli jurnalistlər var. Əgər gənclər bu peşəni seçiblərsə, mütləq onlardan nəyisə öyrənməlidirlər.

- Qeyri-peşəkarlığın artmasını jurnalistikaya axınla əlaqələndirmək olarmı?

- Bunu da səbəb saymaq olar. Bu gün bir çoxları jurnalistikaya tranpilin kimi baxır. Amma jurnalistika elə bir sahədir ki, özü ələyib ələkdən keçirir. İstedadı olmayan heç kəs jurnalistikada qala bilməz. Bir müddətdən sonra özü bezib gedəcək.

- Gənc jurnalistlərə məsləhətiniz nə olardı?

- Çoxlu mütaliə etsinlər. Yalnız bununla öz peşəkarlıqlarını daha da artıra bilərlər. İnsan nə qədər çox kitab oxuyarsa, bir o qədər kamilləşər.

Oral ƏLİYEV

Mərkəz.- 2011.- 27 yanvar.- S.8.