Ağsu bütün sahələrdə dinamik inkişaf edir

Son illər regionların sosial-iqtisadi inkişafı dövlət proqramları çərçivəsində həyata keçirilən tədbirlər Ağsu rayonunun da sosial-iqtisadi, mədəni həyatında mühüm irəliləyişlərə yol açıb. Rayon rəhbərliyinin ciddi səyləri ilə reallaşdırılan çoxsaylı layihələr, həyata keçirilən abadlıq, tikinti-quruculuq işləri sayəsində Ağsu respublikanın sürətlə yeniləşən və abadlaşan rayonlarından birinə çevrilib.

Azərbaycan Respublikası regionlarının sosial-iqtisadi inkişafına dair dövlət proqramlarında nəzərdə tutulmuş tədbirlərin məqsədyönlü icrası rayonun sosial-iqtisadi inkişafında keyfiyyətcə yeni mərhələnin başlanğıcını qoyub. 2003-cü ildən başlayaraq həyata keçirilən tədbirlər yeni iş yerlərinin və müəssisələrin yaradılmasına, sosial infrastruktur təminatının həcminin və keyfiyyətinin yüksəlməsinə təkan verib. Sahibkarlıq mühitinin daha da yaxşılaşmasında, iqtisadiyyata investisiya qoyuluşlarının artmasında və əhalinin məşğulluq səviyyəsinin yüksəlməsində mühüm rol oynayıb.

Son 5 ildə ümummilli lider Heydər Əliyevin zəngin irsinin gənc nəslə çatdırılmasında mühüm rol oynayan Heydər Əliyev Mərkəzi istifadəyə verilib, Heydər Parkının ərazisi genişləndirilərək müasir layihə əsasında əsaslı şəkildə yenidən qurulub. 3 tarixi hadisənin - Böyük Vətən və Qarabağ müharibələrinin, 20 Yanvar şəhidlərinin rəmzlərini özündə birləşdirən "Qəhrəmanlar parkı" xatirə kompleksi, turistlərin və rayon sakinlərinin mənalı istirahət yerinə çevrilən Heydər Əliyev seyrəngahı son illərin irimiqyaslı tikintilərindəndir.

2004-2010-cu illərdə rayonda Avtovağzal kompleksi, Azərbaycan Respublikasının Dövlət Bayrağı tikinti kompleksi, rayon icra hakimiyyəti, prokurorluq və məhkəmə, Maliyyə İdarəsi, DSMF-in rayon şöbəsi, Dairə Seçki Komissiyası, 3 saylı rayonlararası Qeydiyyat-İmtahan bölməsi, Su Kanal İdarəsi, kənd yaşayış məntəqələrində 4 poçt şöbəsi, Əmək və Əhalinin Sosial Müdafiəsi və Fövqəladə Hallar Nazirliklərinin rayonda fəaliyyət göstərən təşkilatları üçün müasir dizaynda yeni inzibati binalar tikilib. Tarix-Diyarşünaslıq Muzeyi, Mədəniyyət sarayı, Poçtamt və Telekommunikasiya Qovşağı, Statistika İdarəsi, Suvarma Sistemləri İdarəsi, bir çox digər müəssisə, idarə, təşkilatlara məxsus binalarda əsaslı bərpa və təmir işləri aparılıb.

Regional dövlət proqramlarının icra olunduğu müddətdə təhsil və səhiyyə obyektlərinin maddi-texniki bazası daha da möhkəmləndirilib. Təkcə bu faktı qeyd etmək kifayətdir ki, keçmiş Sovetlər İttifaqı dövründə 20-25 ildə bir yeni məktəb binası tikilirdisə, son 7 il ərzində rayonun 15 ümumtəhsil məktəbi üçün dövlətin və Heydər Əliyev Fondunun vəsaitləri hesabına ümumi şagird yerlərinin sayı 3364 olan, kompyuter texnikası ilə təchiz edilmiş yeni binalar inşa olunub. Həmin dövrdə 13 əlavə sinif korpusu tikilərək 4 məktəbdə genişləndirmə işləri aparılıb. Kalva kənd sahə xəstəxanası üçün 15 çarpayı-yerlik yeni bina inşa olunub. Yaponiya Hökumətinin "Ot Kökləri və İnsan Təhlükəsizliyi Qrant Yardımı Proqramı" çərçivəsində rayonun Ərəbmehdibəy kəndində Tibb məntəqəsinin əsaslı təmir edilib, zəruri avadanlıqlarla təchiz olunub.

Rayonda telekommunikasiya avadanlıqları uzun illər əvvəl quraşdırılmış və keyfiyyətli telefon rabitəsi yaratmağa imkan vermirdi. Son illərdə bu istiqamətdə də geniş tədbirlər həyata keçirilib. 2010-cu ildə Dövlət Proqramı çərçivəsində bütün ATS-lər elektronlaşdırılıb və montaj tutumu artırılaraq 9 min nömrəyə çatdırılıb.

Uzun illər idi ki, Ağsu əhalisi içməli su sarıdan ciddi korluq çəkirdi, əkin sahələrinin suvarma suyu ilə təminatında böyük rolu olan Yuxarı Şirvan Kanalının Ağsu maşın qolu istifadəsiz qalmışdı. Məhz cənab İlham Əliyevin 2006-cı və 2009-cu illərdə rayona səfərlərindən sonra imzaladığı sərəncamlar rayonun su problemini əsaslı şəkildə həll edib. 2010-cu ildə tədbirin icrasına başlanılıb, rayonun Quzay kəndi ərazisində olan 4 ədəd bulağın suyunu yığmaq üçün qəbuledici kamera tikilib. Şəhərin ərazisində, Ağsuçayın sağ sahilində 1 ədəd 500 kubmetrlik su anbarı tikilərək şəhər xəttinə qoşulub, su anbarlarının yanında bakterisid qurğusu quraşdırılıb. Qəbuledici kameradan şəhərin su anbarlarına qədər 219 mm-lik polad borularla 21 km uzunluğunda su kəməri çəkilib. Bundan başqa, su anbarından Pirhəsənli kəndinə 3,7 km uzunluğunda 110 mm-lik polietilen borularla su kəməri çəkilərək 3 yerdə bulaq tikilib. Ümumilikdə tikinti işlərinə 3582736.00 manat vəsait sərf edilib.

Rayon kəndlərinin su təchizatının yaxşılaşdırılması məqsədilə 8 kənd yaşayış məntəqəsində modul tipli su təmizləyici qurğuların quraşdırılması üçün torpaqayırma sənədləri hazırlanıb, su təmizləyici qurğuların quraşdırılması işlərinə başlanılıb. Kəndoba və Ağabəyli kəndlərində su təmizləyici qurğuların quraşdırılması işləri başa çatdırılıb. Rayonun İlxıçı, Çaparlı, Pirhəsənli, Qaravəlli, Qaraqaşlı, Qiyaslı, Rəhimağalı, Şahbəyli, Ərəbuşağı və Növcü kəndlərinin hər birində bir ədəd subartezian quyusu qazılaraq istifadəyə verilib.

Kanalda və ona xidmət edən nasos stansiyasında 1 milyon manatlıq əsaslı təmir işləri aparılıb. 2010-cu ildə 3,7 milyon manat dəyəri olan layihə əsasında dağlıq ərazilərdəki bulaq sularının gətirilməsi üçün polad borularla 25 kilometr uzunluğunda yeni kəmər çəkilib və digər zəruri işlər görülüb. Kənd yerlərində də içməli suyun keyfiyyətinin müəyyən edilmiş tələblərə cavab verməsi üçün Kəndoba və Ağabəyli kəndlərində modul tipli sutəmizləyici qurğular quraşdırılıb.

Rayonda elektrik, qaz, yol infrastrukturları onillər bundan əvvəl istifadəyə verilmişdi və çoxdandır ki, təzələnmirdi. Bu məsələlər də son illərdə müsbət həllini tapıb. Ağsu şəhərində respublikada birincilər sırasında elektrik verilişi xətləri SİP markalı müasir kabellərlə əvəz olunub və "smart-kart" tipli sayğaclar quraşdırılıb. 2010-cu ildə 11 yaşayış məntəqəsi qaz yanacağından istifadə edib və bir-birinə yaxın ərazidə yerləşən daha 21 kəndə təbii qazın verilməsi ilə bağlı 35 kilometr uzunluqda yeni daşıyıcı kəmər çəkilib. Bu işlərə paralel olaraq Ağsu şəhərində qaz abonentlərinin smart-kart sayğacları ilə təmin olunmaları istiqamətində də işlərə başlanılıb.

Rayonun Padar, Daşdəmirbəyli, Aratlı-Curuğlu, Çiyni, Növcü, Pirhəsənli, Ülgüc, Dilman, Xatman və digər kəndlərinin qaz təminatı yaxşılaşdırılıb. Ağsu-Bəyimli və Ağsu-Göydəlləkli kəndləri istiqamətində 35 km uzunluğunda yeni qaz kəməri çəkilib ki, həmin xətlər vasitəsilə rayonun 21 kənd yaşayış məntəqəsinə qaz verilişi təmin olunub. Rayonun Kəndoba, Bozavand, Kalva, Hacman və Suraxanı kəndlərinin təbii qaz təsərrüfatının təmir-bərpasında tamamlama işləri aparılır. Ümumilikdə, 2012-ci ildə rayonun əksər yaşayış məntəqələrinin qazlaşdırılması nəzərdə tutulub.

Bundan başqa, son illərdə rayonun Heydər Əliyev, Azərbaycan, Ü.Hacıbəyov, Nizami, M.Ə.Rəsulzadə və Vidadi küçələrində, "Bakı-Yevlax", "Ağsu-Kürdəmir" magistral yollarının Ağsu şəhərindən keçən hissəsində piyada səkiləri asfaltlaşdırılıb, yaşıllıq sahələri və gecə işıqlandırma sistemi yenidən qurulub. Ağsu şəhərində Heydər Əliyev parkının yenidən qurulması, Heydər Əliyev Mərkəzinin, Seyrəngah kompleksinin tikinti işləri başa çatdırılıb. Ağsu şəhərində yeni salınan küçələrin asfaltlaşdırılması işlərinə başlanılıb. Rayon büdcəsi və daxili imkanlar hesabına Ağsu şəhərinin Vidadi, Azərbaycan və N.Tağızadə küçələrində avtomobil yollarına 23760 kv.m., həmin küçələrin piyada səkilərinə isə 2063 kv.m., T.Əliyarbəyov, H.Aslanov, Ü.Hacıbəyov, S.Vurğun, T.Xasıyev, H.Əliyev və M.Ə.Rəsulzadə küçələrinə 59300 kvadratmetr asfalt vurulub.

Şəhərin elektrik təsərrüfatı tamamilə yenidən qurularaq elektrik verilişi xətləri SİP kabellə əvəz edilib və "SMAR-KART" sayğacları quraşdırılıb. 10 kilovoltluq elektrik verilişi xətlərində 12.03 kilometr məsafədə əsaslı, 5.7 km məsafədə isə cari, 04 kilovoltluq elektrik verilişi xətlərində 11.07 km məsafədə əsaslı, 0.92 km məsafədə isə cari təmir işləri aparılıb. 1963 kva gücündə 15 transformator yarımstansiyası əsaslı, ümumi gücü 10829 kva olan 58 transformator yarımstansiyası isə cari təmir olunub, 471 ədəd elektron sayğac quraşdırılıb.

Son illər rayonun ən böyük uğurlarından biri də kəndlərdə yaşayan əhali üçün hər cür şəraitin yaradılması olub. Artıq kənd yaşayış məntəqələri də inkişaf dövrünə qədəm qoyub. 14 km kənd magistral yoluna asfalt vurulub, 70 km-dən çox kənd və kəndarası yollar qum-çınqıl döşənməklə təmir edilib. Abadlaşdırma işləri Çiyni kəndi üçün daha xarakterikdir. Burada irimiqyaslı tikinti və infrastruktur proqramı həyata keçirilir. Yollar asfaltlaşdırılıb, kəndə təbii qaz verilişi bərpa olunub, elektrik təsərrüfatı tamamilə yenidən qurulub. Nəfis dizaynda məktəb binası, yerli icra hakimiyyəti orqanı və kənd bələdiyyəsi üçün iki mərtəbəli inzibati bina, mədəniyyət sarayı inşa olunub. Kəndin küçələrinin genişləndirilməsi, piyada səkilərinin, yaşıllıq sahələrinin və kəndin mərkəzi küçəsinin gecə işıqlandırma sisteminin qurulması, vətəndaşlara məxsus həyətyanı sahələrin ətrafına mişar daşı ilə hasar çəkilməsi işləri həyata keçirilib.

(ardı var)

Tərlan Nəsirli

Bakı-Ağsu-Bakı

Mövqe.- 2011.- 23 noyabr.- S. 10.