Regional dövlət proqramları Cəlilabadın görkəmini daha da müasirləşdirib

Azərbaycanın bölgələrinin sabit və davamlı inkişafının təmin edilməsi ölkə rəhbərliyinin iqtisadi siyasətində prioritet məsələlərdən biri olaraq qalır. Regionların sosial-iqtisadi inkişafı məqsədilə son illərdə icrasına başlanılmış dövlət proqramları bu siyasətin sistemli və məqsədyönlü şəkildə həyata keçirilməsinə imkan verib. Bunun nəticəsi olaraq son illərdə respublikanın bütün bölgələrində canlanma, tərəqqi, yüksəliş hiss olunur. İctimai həyatın bütün sahələri üzrə həyata keçirilən tədbirlər, ümumilikdə, insanların yaşayış səviyyəsini yaxşılaşdırmaqla yanaşı, düşüncə baxımından da müasirliyə və yeniliyə yol açıb.

Bunu konkret olaraq Azərbaycanın cənub rayonları sırasında iqtisadi potensialına görə fərqlənən Cəlilabad rayonunun timsalında qabarıq görmək olur. 2006-cı ildən rayona rəhbərlik edən Əziz Əzizov ilk gündən rayonun bütün potensialını regionların sosial-iqtisadi inkişafı dövlət proqramında nəzərdə tutulmuş tədbirlərin reallaşdırılması istiqamətində səfərbər edib. Bunun nəticəsidir ki, son 5 ildə Cəlilabad daha sürətlə inkişaf edib, müasirləşib, sosial-iqtisadi mühüm nailiyyətlərə imza atıb. Son illərdə rayonda bir-birinin ardınca yeni-yeni sosial əhəmiyyətli obyektlər, istehsal müəssisələri tikilib istifadəyə verilib. Rayonun mərkəzi küçələrinə yeni işıq dirəkləri quraşdırılıb, qaranlıq küçələr aydınlığa çıxıb.

Xüsusi vurğulamaq lazımdır ki, Azərbaycanın bütün bölgələrinə xüsusi diqqət və qayğı ilə yanaşan dövlət başçısı cənab İlham Əliyev 2010-cu il aprelin 29-da növbəti dəfə Cəlilabad rayonunda olub, dövlət proqramlarının icra vəziyyəti ilə yaxından maraqlanıb, bir sıra yeni obyektlərin təntənəli açılış mərasimində iştirak edib. Rayona səfəri çərçivəsində ölkə başçısı Cəlilabad şəhərində tarix-diyarşünaslıq muzeyinin, şahmat məktəbinin, əlillər və şəhid ailələri üçün 36 mənzilli yaşayış binasının, müalicə diaqnostika mərkəzinin, "Cəlilabad şərab-2" ASC-nin, Göytəpə su anbarının açılışında iştirak edib. Dövlət Sərhəd Xidmətinin Göytəpə şəhərindəki qarnizonunda olub, habelə rayon ictimaiyyətinin nümayəndələri ilə görüşüb. Rayonda həyata keçirilən abadlıq, quruculuq və yenidənqurma işlərindən razılığını ifadə edən dövlət başçısı İlham Əliyev deyib: "Mən çox şadam ki, Cəlilabadda bütün işlər yaxşı gedir. Rayonun inkişafı üçün lazımi tədbirlər görülür. Həm sənaye imkanları artır, iqtisadi göstəricilər yaxşılaşır, həm də sosial infrastruktur yaradılır. Cəlilabad Azərbaycanda inkişaf baxımından ən qabaqcıl yerlərdə olan rayonlardan biridir".

Ölkə rəhbərinin qayğısı nəticəsində son beş ildə rayon mərkəzi xəstəxanasının büdcəsi təqribən 17 dəfə, tibb işçilərinin əməkhaqqı isə 20 dəfə yüksəlib. Bütün bunlar tibb işçilərinin ruh yüksəkliyini artırıb, əhaliyə göstərilən səhiyyə xidmətinin yaxşılaşdırılmasına stimul yaradıb. Cənab İlham Əliyevin açılış mərasimində iştirak etdiyi müasir Müalicə-Diaqnostika Mərkəzi cənub bölgəsində ikinci müasir, dünya standartlarına cavab verən səhiyyə ocağıdır. Mərkəzdə qəbul, hemodializ, cərrahiyyə, anesteziologiya, reanimasiya, əməliyyat bloku və digər şöbələr fəaliyyət göstərir. Şöbələrin hər biri müasir tibbi avadanlıq və mebellə təchiz edilib. 260 nəfərin çalışdığı tibb ocağı regionun əhalisinə nümunəvi səhiyyə xidməti göstərir. Ümumiyyətlə, son illərdə rayonda əhaliyə göstərilən tibbi xidmətin səviyyəsi daha da yüksəlib, insanların sağlamlığı üçün bütün imkanlardan maksimum istifadə edilib. Rayonda infeksion xəstəliklərə qarşı ciddi mübarizə aparılır, əks-epidemik və profilaktiki tədbirlər nəticəsində qorxulu infeksiyalar tamamilə ləğv edilib. Digər infeksion xəstəliklər minimuma endirilib. Səhiyyə üçün prioritet sahə olan vərəm xəstəliyi ilə mübarizə məqsədilə 25 min uşağa mantu sınağı aparılıb, 2245 hərbi çağırışçı flüoroqraf müayinəsindən keçirilib. Cəlilabad rayonunda imtiyazlı qrupa aid olan bütün xəstələr ciddi dispanser nəzarətində saxlanılır və onların hamısı pulsuz dərman preparatları ilə təmin olunurlar. Xüsusi vurğulamaq lazımdır ki, Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevanın təşəbbüsü ilə iyulun 1-də keçirilən qanvermə aksiyası talassemiya, hemofiliya və digər qan xəstələri üçün böyük dəstək olub.

Prezident İlham Əliyev rayona səfəri çərçivəsində, həmçinin "Cəlilabad Şərab-2" Açıq Səhmdar Cəmiyyətinin açılışında iştirak edib. Müəssisə öz üzüm bağlarında keyfiyyətli məhsul yetişdirməklə dünya bazarında rəqabətə davam gətirən şərab istehsalına başlayıb. Hazırda burada 500-dən çox işçi çalışır.

Dövlət başçısı ötən il rayonda daha mühüm bir obyektin - Göytəpə su anbarının da açılışı mərasimində olub. Qeyd edək ki, su anbarının tikintisi üçün keçən əsrin 80-cı illərində layihə hazırlansa və 1988-1992-ci illərdə həmin layihənin icrası ilə bağlı bir çox işlər görülsə də sonrakı dövrdə dövlət vəsaiti çatışmadığından tikintisi dayandırılmışdı. 2005-ci ildən ölkə başçısının tapşırığına əsasən, su anbarının inşasına yenidən başlanılıb. Hündürlüyü 17,5, uzunluğu 550 metr olan su hövzəsinin tutumu 3,7 milyon kubmetrdir. Anbarın istifadəyə verilməsi rayonda kənd təsərrüfatının inkişafını sürətləndirib, uzun müddət suvarma suyundan korluq çəkən ərazilərin su ilə təmin edilməsinə imkan yaradıb.

Qarabağ probleminin həlli ölkə başçısının gündəlik fəaliyyətində prioritet yer tutur. Məsələnin həlli ilə yanaşı, müharibə əlillərinin, şəhid ailələrinin sosial vəziyyəti, həyat şəraitinin yaxşılaşdırılması diqqət mərkəzindədir. Digər yerlərdə olduğu kimi, indiyədək Cəlilabadda da bu sosial təbəqələr üçün bir neçə yaşayış binası tikilib. Cənab İlham Əliyev ötən ilin aprelində Cəlilabadda olarkən daha bir binanın - 36 mənzilli yaşayış binasının açılış mərasimində iştirak edib, müharibə əlilləri, şəhid ailələri, Böyük Vətən müharibəsi veteranları ilə görüşüb.

Dövlət sərhədlərimizin müəyyən hissəsi Cəlilabad rayonundan keçir. Ötən əsrin 70-ci illərində ulu öndər Heydər Əliyevin göstərişi əsasında yaradılan Göytəpə qarnizonunda Prezident, Ali Baş Komandan İlham Əliyevin tapşırığı ilə əsaslı tikinti, təmir və yenidənqurma işləri həyata keçirilib. İmişli, Biləsuvar, Yardımlı, Cəlilabad rayonları ərazisində 232 kilometr dövlət sərhədini mühafizə edən Göytəpə qarnizonu Dövlət Sərhəd Xidmətinin ən böyük hissələrindən biridir. Yenidənqurma işlərindən sonra burada əsgərlərin təlim-tərbiyəsi mərkəzi yaradılıb. Bundan əlavə, 2 kazarma binası, 160 yerlik 2 tibb məntəqəsi, 2 yeməkxana, 202 mənzilli 5 yaşayış binası, 240 yerlik klub, 2 idman şəhərciyi, futbol meydançası, uşaq bağçası, digər xüsusi təyinatlı yardımçı binalar inşa olunub.

Son illər rayonda çoxlu sayda küçə və meydanlar abadlaşdırılıb, insanların ən sevimli istirahət yerinə çevrilən "Heydər Əliyev seyrangahı" salınıb. Təkcə bu ilin əvvəlindən başlayaraq şəhərdə Heydər Əliyev adına Yaradıcılıq Mərkəzi, Dövlət Bayrağı Meydanı, regional gübrə bazası, taxıl anbarı, un dəyirmanı, saxlama-soyutma kameraları, habelə qaz istismarı idarəsinin və hərbi məhkəmənin inzibati binaları tikilərək istifadəyə verilib. Hazırda Olimpiya İdman Kompleksi, Baytarlıq İdarəsi, Göytəpə yanğın xidməti bölməsi üçün inzibati binalar, ayrı-ayrı sahələr üzrə çoxlu özəl istehsal və xidmət müəssisələri inşa olunur.

Cəlilabad şəhərində küçələrin və kənd yollarının abadlaşdırılmasına da ciddi diqqət yetirilib. 2010-cu ildə şəhərin 16 küçəsinə - "Əlixan Rəhimov", "Abbasağa Azərtürk", "Təbriz", "8 mart", "Səməd Vurğun", "Qarabağ", "Mirzəli Hüseynzadə", "Mehdi Hüseyn", "Babək", "Nizami", "20 Yanvar", "Səfa Axundov", "Vüqar Mürsəlov", "Səttərxan", "M.Hadi", "Azərbaycan" küçələrinə 82 min kvadratmetr asfalt döşənib. Həmçinin Cəlilabad-Uzuntəpə yolunda riyada səkiləri çəkilib, 11 kilometrlik Göytəpə-Privolniye yolu asfaltlaşdırılıb. Eyni zamanda, kənddaxili yolların da təmiri üçün tədbirlər görülüb, 19 kilometrlik Cəlilabad-Cəngan və 18 kilometrlik Qarazəncir-Gülməmmədli yollarına qum-çınqıl məmulatları tökülüb.

Tikinti-abadlıq işləri ilə yanaşı, yaşıllaşdırma tədbirləri də diqqət mərkəzində olub. "Ekologiya ili" olan 2010-cu ildə rayonun yaşayış məntəqələrində, o cümlədən Ələt-Astara magistral yolunun kənarında 25 min ədəd ağac əkilib. Həmin ağacların suvarılması üçün kanallar çəkilib, onların qorunmasından ötrü gözətçilər təyin edilib.

"Turizm ili" çərçivəsində 2011-ci ildə rayonda bir sıra tədbirlər həyata keçirilib. Hazırda Cəlilabadda 8 turizm obyekti fəaliyyət göstərir və onlardan 2-nə lisenziya verilib. Həmin obyektlərdə turistlərə göstərilən xidməti beynəlxalq standartlara cavab verən meyarlar əsasında təşkil etmək və əlavə obyektləri istifadəyə vermək üçün tədbirlər müəyyənləşdirilib. Eyni zamanda rayonun görməli yerlərini əks etdirmək və turistlərdə aydın təsəvvür yaratmaq məqsədilə bukletlər hazırlanıb

(ardı var)

Tərlan NƏSİRLİ,

Bakı-Cəlilabad-Bakı

Mövqe.- 2011.- 27 oktyabr.-S. 10.