REGİONLARIMIZ:
YEVLAX
Yevlaxda təhsil sahəsində
böyük uğurlara imza atılır
Rayonda
10-dan çox abituriyent
600-dan çox bal
toplayıb, 685 bal toplayan
biri isə "Prezident
təqaüdü"nə layiq görülüb
İqtisadi tərəqqi, demokratikləşmə və
insan hüquqlarının etibarlı təminatı
baxımından özünün yüksək inkişaf mərhələsinə
çatmış dövlətlərin qazandıqları
uğurlar məhz elmə, təhsilə göstərilən
yüksək diqqət və qayğı ilə
bağlıdır. İntellektual potensial əhəmiyyətinə
və gətirdiyi dividendlərə görə bu gün, hətta
zəngin təbii sərvətləri belə üstələyir.
Müasir dünyada rəqabətə tab gətirmək
üçün, ilk növbədə, təhsilə, zəngin
biliklərə, informasiya texnologiyalarına arxalanmaq
lazımdır. Bu reallığı düzgün dəyərləndirən
dövlət başçısı İlham Əliyev son 9 ildə
ölkə həyatının bir çox strateji əhəmiyyətli
sahələri kimi, elmə, təhsilə xüsusi
qayğı ilə yanaşıb, həmin sahələrdə
yeni dövrün tələbləri ilə səsləşən
islahatların həyata keçirilməsini təmin edib.
Azərbaycan respublikası regionlarının
sosial-iqtisadi inkişafı tədbirləri sahəsində həyata
keçirilən kompleks tədbirlər təhsil sahəsində
də özünü qabarıq büruzə verir. Bunu Yevlax
rayonunun timsalında aydın görmək mümkündür.
Son illər Yevlaxda təhsilin maddi-texniki bazasının
möhkəmləndirilməsi, kadr potensialının gücləndirilməsi,
təhsilin məzmununun yeniləşməsi, təlimin
müasir tələblər baxımından təşkili, təhsilə
münasibətdə müasir düşüncə tərzinin
formalaşdırılması istiqamətində mühüm tədbirlər
həyata keçirilib.
Rayonda təhsilin inkişafı, ilk növbədə,
bu sahənin infrastrukturunun müasirləşməsində
özünü göstərir. 2005-2010-cu illərdə rayonda
13 yeni məktəb binası, 640 şagird yerlik 32 əlavə
sinif otaqları tikilib istifadəyə verilib, 9 məktəbdə
əsaslı təmir və yenidənqurma işləri
aparılıb. Meyvəli kənd ibtidai məktəbi və
Meyvəli kənd uşaq bağçası əsaslı təmir
edilib, 5 məktəb üçün yeni binanın tikilməsi
planlaşdırılır. Yaxın perspektivdə şəhər
2 saylı, Aran qəsəbə 2 saylı və Salamabad kənd
tam orta məktəbləri üçün yeni binaların
tikintisinə başlanılacaq.
2010-2011-ci dərs ili ərəfəsində isə
şəhər 1 saylı orta məktəb üçün
480 yerlik, Cırdaxan kənd əsas məktəbi
üçün 180 yerlik, Xaldan kənd əsas məktəbi
üçün 180 yerlik yeni məktəb binaları tikilib.
Bütün məktəblərdə cari təmir işləri
aparılaraq yeni dərs ilinə hazırlanıb. Son illərdə
ümumtəhsil məktəblərində aparılmış
yeni məktəb və sinif otaqlarının tikintisi, təmiri
və müasir avadanlıqlarla təmini nəticəsində
2004-2005-ci dərs ilində 29 məktəb birnövbəli
iş sistemi ilə işləyirdisə, 2010-2011-ci dərs
ilində 44 məktəb bir növbədə fəaliyyət
göstərib.
Şagirdlərin dərs prosesində əyanilikdən
istifadəsinə zəmin yaratmaq, müasir təlim-texnologiyalardan
yararlanmasını yaxşılaşdırmaq məqsədilə
fənn kabinetlərinin zənginləşdirilməsinə
xüsusi diqqət yetirilir. Hazırda rayonun ümumtəhsil məktəblərində
36 fizika, 38 kimya, 39 riyaziyyat, 35 biologiya, 27 Azərbaycan dili və
ədəbiyyatı kabineti vardır. Ümumiyyətlə,
şəhər və rayon üzrə əyani və texniki təlim
vasitələri ilə təchiz olunmuş 450-dən çox
fənn kabinetindən istifadə olunur. Son illər ərzində
rayonun 48 məktəbi 440 ədəd kompyuter, 17 ədəd
nootbuk, 17 ədəd proyektorla təmin edilib. Təhsil Nazirliyi
tərəfindən göndərilmiş 4 fənn üzrə
1725 ədəd elektron dərsliklər bütün məktəblərə
paylanılıb, onlardan istifadə diqqət mərkəzində
saxlanılıb.
Məktəbəqədər təhsil müəssisələri
üçün 37 adda 925 nüsxə plakat, 42 adda müxtəlif
yaş qrupu üzrə 994 nüsxə test kitabçaları
alınıb, 15 adda, 1005 ədəd, uşaq oyuncaqları
verilib. 2011-ci ildə Təhsil Nazirliyi tərəfindən
rayonun 5 məktəbinə əvəzsiz olaraq 5 ədəd nootbuk
və 5 ədəd proyektor, məktəblərin maddi texniki
bazasının möhkəmlənməsi üçün 330
ədəd parta, 60 ədəd yazı lövhəsi, 150 ədəd
müəllim masası, 250 ədəd müəllim stolu
verilib.
2010-2011-ci tədris ilində prezident İlham Əliyevin
sərəncamı ilə pedaqoji fəaliyyəti ilə fərqlənən
şəhər 3 nömrəli orta məktəbin kimya müəllimi
Əjdər Əhmədov "Əməkdar müəllim"
fəxri adına layiq görülüb, Uşaq Gənclər
Məktəbinin direktoru Tofiq İsgəndərov "Tərəqqi"
medalı ilə təltif olunub. Bununla yanaşı, ölkə
başçısının "Yevlax rayonunun sosial-iqtisadi və
mədəni həyatında xidmətləri olan şəxslərə
fəxri adların verilməsi haqqında" 12 yanvar 2011-ci il
tarixli sərəncamı ilə şəhər 4 nömrəli
tam orta məktəbin direktor müavini Kamil Həmzəyev,
şəhər Şahmat Məktəbinin direktoru Vaqif Quliyev və
şəhər 1 nömrəli tam orta məktəbin müəllimi
Əntiqə Məmmədova "Əməkdar müəllim"
fəxri adına layiq görülüb.
2010-2011-ci tədris ili də Yevlax təhsili
üçün uğurlarla zəngin olub. Bu uğurların
qazanılmasında Şəhər Təhsil Şöbəsinin
tabeliyində olan 87 təhsil müəssisəsi, o cümlədən
40 orta, 9 əsas, 8 ibtidai məktəb, 4 məktəbdənkənar
müəssisə (Uşaq Gənclər İdman Məktəbi,
Şahmat Məktəbi, Uşaq Yaradıcılıq Mərkəzi,
Texniki Yaradıcılıq Mərkəzi), 25 məktəbəqədər
tərbiyə müəssisəsinin pedaqoji kollektivlərinin
böyük əməyi olub. Dərs ili ərzində məktəblər
və şagirdlər respublika əhəmiyyətli müsabiqə
və olimpiadalarda da uğurla iştirak ediblər. 2011-ci ildə
rayon üzrə 4 məktəb "Ən yaxşı
ümumtəhsil məktəbi" və 4 nəfər müəllim
"Ən yaxşı müəllim" müsabiqələrində
iştirak edib. Şəhər 8 nömrəli tam orta məktəb
"Ən yaxşı ümumtəhsil məktəbi"
müsabiqəsinin qalibi olaraq dövlət
başçısının sərəncamı ilə on min
manat məbləğində birdəfəlik pul
mükafatına layiq görülüb.
2010-2011-ci il fənn olimpiadalarının I rayon turunda
753 nəfər iştirak edib, 12 nəfər şagird
olimpiadaların respublika turunda iştirak etmək hüququ
qazanıb. Respublika turunda Xaldan kənd tam orta məktəbinin
XI sinif şagirdi Aytən İsmayılqızı Azərbaycan
dili və ədəbiyyatı fənni, Qaraoğlan kənd tam
orta məktəbin X sinif şagirdi İbrahimova Məhruzə
Yahuzər qızı Azərbaycan tarixi fənni üzrə IV
yeri tutaraq Təhsil Nazirliyinin "Tərifnamə"si ilə
təltif olunub.
Məktəblərin fəaliyyətinin əsas
göstəricilərindən biri məzunların ali məktəblərə
qəbuludur. 2010-2011-ci dərs ilində orta ümumtəhsil məktəblərini
956 nəfər şagird bitirib və onlardan 652 nəfəri
(68,2 faiz) ali məktəblərə sənəd verib. 2011-ci
ildə ali məktəblərə 262 nəfər məzun qəbul
olunub və onlardan 189 nəfəri 2011-ci ilin, 73 nəfəri
isə əvvəlki illərin məzunlarıdır. Məzunlarımızdan
10 nəfəri 600-dən, 18 nəfəri isə 500-dən
çox bal toplayıb. Sevindirici haldır ki, ötən il
600-dən çox bal toplayanların sayı 2 nəfər
olduğu halda, bu il 10 nəfər olub. Ən yüksək nəticə
göstərən şəhər 8 nömrəli tam orta məktəbin
məzunu Ülkər Həsənli 685 balla Azərbaycan
Dövlət Tibb Universitetinə daxil olub və "Prezident təqaüdü"nə
layiq görülüb. Beləliklə, rayon üzrə
"Prezident təqaüdü"nə layiq
görülmüş məzunların sayı 2 nəfərə
yüksəlib. Ümumiyyətlə, 500-dən artıq bal
toplayanlardan 5 nəfəri şəhər 8 nömrəli tam
orta məktəbin məzunları olub. 2004-cü ildə məktəbi
bitirən 1547 nəfərdən cəmi 138 nəfəri ali məktəbə
qəbul olunurdusa, 2011-ci ildə bu rəqəm 262 nəfərə
yüksəlib. Bu rəqəmləri faizlə ifadə etsək,
cədvəldən göründüyü kimi 8,9 faizdən
27,4 faizə çatıb.
Yevlax Şəhər İcra Hakimiyyətinin təşəbbüsü
və tələbkarlığı nəticəsində hərbi
məktəblərə qəbulda da dinamik inkişafın
şahidi oluruq. Son beş il ərzində rayonun 59 nəfər
məzunu Ali Hərbi Məktəblərə, 82 nəfər
isə C.Naxçıvanski adına hərbi liseyə qəbul
olunub. Bu il tələbə adını qazanan məzunlardan 13
nəfəri müxtəlif hərbi məktəblərə,
o cümlədən Heydər Əliyev adına Ali Hərbi
Akademiyaya, 3 nəfər, Fövqəladə Hallar Nazirliyinin
Akademiyasına, 5 nəfər, Dövlət Sərhəd Xidməti
Akademiyasına, 1 nəfər Milli Təhlükəsizlik
Akademiyasına, 1 nəfər Tibb Universitetinin Hərbi Həkim
ixtisası üzrə qəbul olunub.
Rayonda şagirdlərin asudə vaxtının təşkili,
onların fiziki, milli-mənəvi tərbiyəsində,
istedad və bacarıqlarının inkişafında məktəbdənkənar
müəssisələrin rolu danılmazdır. Bu məqsədlə
Şəhər Şahmat məktəbində 41 qrupda 496 nəfər,
Texniki Yaradıcılıq Mərkəzində 51 qrupda 567 nəfər,
Uşaq Gənclər İdman məktəbində 4 idman
növü üzrə 65 qrupda 863 nəfər, Uşaq
Yaradıcılıq Mərkəzində 101 qrupda 1515 nəfər
şagird müxtəlif dərnəklərə cəlb olunub.
Şəhər Şahmat Məktəbinin yetirmələri tədris
ili ərzində 12 turnir və birinciliklərdə
çıxış ediblər. Bu yarışlarda 8 nəfər
I dərəcə, 32 nəfər II dərəcə, 56 nəfər
III dərəcə normasını ödəyib.
2010-cu ilin oktyabrında şahmat üzrə Batumi
şəhərində keçirilən Avropa birinciliyində
məktəbin şagirdi 10 yaşlı Məhərrəmli
Jalə I dərəcə normasını yerinə yetirib,
noyabr ayında respublika turnirində 14 yaşlı Samiroğlu
Sabir I yerə, 12 yaşlı Hacıyev Pərviz II yerə
layiq görülüb. Məktəbin yetirməsi Samiroğlu
Sabir 2011-ci ilin may ayında Polşanın Krakov şəhərində
keçirilən dünya birinciliyində IV yeri tutub.
Bütün bunlar şübhəsiz, həm də
rayon rəhbərliyinin təhsilə göstərdiyi
xüsusi diqqət və qayğının nəticəsidir.
Bu xeyirxah münasibət isə Yevlax təhsilinin yaxın illərdə
daha sürətlə inkişaf edəcəyini deməyə
ciddi əsaslar verir.
(ardı var)
Yazı Azərbaycan
Respublikasının Prezidenti yanında
Kütləvi İnformasiya Vasitələrinin
İnkişafına Dövlət Dəstəyi Fondu tərəfindən maliyyələşdirilən
"Regionların sosial-iqtisadi
inkişafının təşviq edilməsi" layihəsi
çərçivəsində çap olunub.
Tərlan NƏSİRLİ,
Bakı-Yevlax-Bakı
Mövqe.- 2011.- 30 sentyabr.- S. 10.