"Böyük Ermənistan" xülyası

İşğalçı Ermənistanın Azərbaycan torpaqlarına müdaxiləsi, 17 min kv.km ərazimizi işğal etməsi eyni zamanda erməni tarixçilərinin və siyasətçilərinin Azərbaycan və Türkiyəyə qarşı ərazi iddiaları ilə çıxış etmələri ermənilərin zamanında edilən güzəştlərə nankorluqlarının və hər bir əməllərinin kökündə işğalçılıq siyasətinin dayanmasının bariz nümunəsidir. Əgər hal-hazırda erməni işğalçıları Azərbaycanın əraziləri ilə bağlı heç bir fakta söykənməyən sərsəm iddialarını ortaya qoyurlarsa, niyə Azərbaycan əsl həqiqətləri bəyan etməsin? "Böyük Ermənistan" yaratmaq xülyasından əl çəkməyən və yalançı "erməni soyqırımı"nı sübuta yetirməyə çalışan erməni millətçiləri müasir qloballaşan dünyada xalqların və ölkələrin yaxınlaşması yolunda ciddi əngələ çevriliblər. Dünyanın hər yerinə səpələnmiş çoxsaylı erməni təşkilatlarının geniş maliyyə imkanları, Qriqorian kilsənin istiqamətverici və təşkilatçılıq rolu, ayrı-ayrı ölkələrin, o cümlədən böyük dövlətlərin müxtəlif strukturlarında mühüm mövqelər ələ keçirmiş ermənilərin dünya siyasətinə təsir göstərməsi sülh və əmin-amanlıq üçün, insanlığın gələcəyindən ötrü təhlükəli maneədirlər. İkili standartlar və "xristian həmrəyliyi"nin beynəlxalq münasibətlərdə mühüm rol oynadığı müasir dövrdə, beynəlxalq hüquq normalarına açıq-aşkar zidd olaraq Azərbaycan torpağı olan Dağlıq Qarabağ erməni separatçı-terrorçularının əlində qalmaqdadır.

Özgə torpaqlarını işğal etmək üçün terroru, soyqırımları özlərinə peşə seçmiş erməni millətçiləri bu bəd niyyətlərini guya vaxtı ilə Aralıq dənizi - Qara dəniz - Xəzər dənizi arasında geniş torpaqları əhatə etmiş uydurma "Böyük Ermənistan" dövlətini dirçəltmək pərdəsi altında həyata keçirmək xülyasındadırlar. Erməni millətçiləri tarixi saxtalaşdırmaqda da yeni mərhələyə qədəm qoyaraq, Azərbaycan tarix elminə hücumlarını daha da genişləndiriblər. Təbriz və Ərdəbil də daxil olmaqla tarixi Azərbaycanın cənub torpaqlarını-uydurma "Böyük Ermənistan"ın tərkib-hissəsi hesab edən ermənilər indi daha da "dərinə" getməyə başlayıblar. Erməni millətçiləri hazırda Arazdan cənubda-qonşu İran İslam Respublikasının ərazisində öz ata-baba torpaqlarında yaşayan və özlərini bu gün də "türk" adlandıran azərbaycanlı qardaşlarımızı Şimali Azərbaycanda yaşayan azərbaycanlılardan tamamilə fərqli olan bir xalq kimi qələmə verməyə başlayıblar. Guya Cənubda yaşayan azərbaycanlılar Şimalda yaşayan qardaşlarından fərqli olaraq İran dillərindən birində danışmış olan "azərilər" adlanan xalqın nəsilləridir və sonralar, XV-XXI əsrlərdə onların dilləri kütləvi surətdə zorla dəyişdirilib. Sən demə, cənubda yaşayan soydaşlarımız - cənubi azərbaycanlılar "genetik baxımdan bizə deyil, ermənilərə daha yaxın bir xalq"dır. Ermənilərin bu istiqamətdə apardıqları tədqiqatların nəticələri artıq indidən sübut edir ki, onların (yəni ermənilərin) cənubi azərbaycanlılarla antropoloji parametrlərinin çoxu eynidir; belə ki, "cənubi azərbaycanlılar genetik baxımdan özlərinin Azərbaycan Respublikasındakı həmvətənlərindənsə ermənilərə daha yaxındırlar". Mətləb aydındır, erməni saxtakarları Azərbaycanın Arazdan cənubdakı tarixi torpaqlarını öz saxta "tədqiqatlarında" özününküləşdirdikdən sonra, indi də həmin ərazidə yaşayan Azərbaycan türklərinin mənşəyini saxtalaşdırırlar. Guya "Böyük Ermənistan"ın tərkib hissəsi olmuş Cənubi Azərbaycan torpaqlarının əhalisi də bizimlə deyil, ermənilərlə bir kökdəndirlər!?

Yeri gəlmişkən qeyd edim ki, tarixdə heç bir zaman üç dəniz - Aralıq dənizi, Qara dəniz və Xəzər dənizi arasındakı geniş əraziləri əhatə edən "Böyük Ermənistan" adlı dövlət olmayıb. Bu uydurmadır və bu uydurmanı elmə sırıyarkən erməni saxtakarları vaxtilə Fəratın yuxarılarından Van gölünə doğru ərazilərdə mövcud olmuş "Kiçik Ermənistan" və "Böyük Ermənistan" adlanan iki coğrafi vilayətdən birinin - sonuncunun adından istifadə ediblər və coğrafi termini siyasiləşdirib (qeyd edim ki, "Böyük Ermənistan" adlanan coğrafi vilayət həqiqətən də "böyük olduğu üçün deyil", "Kiçik Ermənistan" vilayətinə nisbətən bir qədər "böyük" olduğu üçün belə adlandırıldı. Yəni bu "böyük", sözün həqiqi mənasındakı "böyük" deyildir!). Əslində isə heç bir ilk mənbə tarixdə "Böyük Ermənistan" adlanan dövlətin olduğunu təsdiq etmir. İndiyə qədər heç bir arxeoloji qazıntı zamanı "Böyük Ermənistan" adı həkk olunmuş pul tapılmayıb. Ermənilərin guya erməni hökmdarı olduğunu iddia etdikləri parfiyalı II Tiqranın adından zərb olunmuş pullarda da onun "Böyük Ermənistan" hökmdarı olduğu təsdiqlənmir. Beləliklə, "Böyük Ermənistan" tarixi həqiqət deyil, yalnız və yalnız, tarixdə heç bir zaman öz sabit ərazisi olmayan köçəri ermənilər üçün özgə torpaqlarını işğal etməyi qarşısna məqsəd qoymuş başıbəla "milli ideologiyadır", mürtəce dini-ideoloji və terrorçu-işğalçılıq "doktrinasıdır". Bu işğalçı-terrorçu "doktrina" erməni millətçiləri tərəfindən özgə torpaqlarına yiyələnmək məqsədilə uydurulmuşdur və onun əsasında, artıq yuxarıda qeyd etdiyim kimi, guya vaxtilə "dənizdən-dənizə" geniş əraziləri əhatə etmiş olan uydurma "Böyük Ermənistan" dövlətini dirçəltmək ideyası durur. Bu "ideya"nın saxtalığı ondan aydın olur ki, özlərini az qala regionun "ən qədim xalqı", "Nuh peyğəmbərin övladları" kimi qələmə verən erməni millətçilərinin ulu babaları hesab olunan qəbilələr, ümumiyyyətlə, Asiya qitəsinin yerli əhalisi deyillər, bu regiona köçüb gəlmədirlər. Bu həqiqətləri vaxtilə rus tarixçiləri də qələmə alıblar. Məlumdur ki, rus diplomatı Qriboyedov İranda səfir olduğu dövrdə ermənilərin köçürülməsi ilə bağlı narahatçılığını ifadə edərək çara məktub yazıb. Həmin məktubda o, açıq şəkildə bildirir ki, ermənilər məskunlaşdıqları yerlərdə bir qədər yaşadıqdan sonra oranın onların ata-baba torpağı olduğunu iddia edirlər. Ermənilərin Cənubi Qafqaza gəlmə olmalarını sübut edən faktlar çar Rusiyası dövründə nəşr olunmuş ensiklopediyalarda da öz əksini tapmışdır.

Anrtropoloji araşdırmalar sübut edir ki, uydurma "ermenvid irqi" və ermənilər nəinki Cənubi Qafqazın aborigen əhalisi-yerli sakinləri deyillər, ümumiyyətlə, Ön Asiyaya da sonradan gəliblər. Arxeoloji qazıntılar zamanı indiki Ermənistan Respublikası ərazisindən aşkar olunmuş qazıntı materialları, o cümlədən qədim insan qalıqları da bunu aydın sübut edir. Göstərilən insan qalıqlarının autropoloji quruluşu ilə sonradan həmin ərazilərdə məskunlaşan ermənilərin autropoloji quruluşu arasında heç bir oxşarlıq yoxdur. Bundan əlavə kəllə quruluşuna görə aparılan antropoloji tədqiqatlar erməniləri qısabaşlılar və ya braxikranlar qrupuna aid edir. Antropoloqlar (böyük alman alimi Virxov və başqa məşhur alimlər) Qafqazın qədim qəbirstanlıqlarından tapılan kəllələrin ölçülməsinə əsasən müəyyənləşdiriblər ki, bu diyarın ən qədim yerli sakinləri uzunbaşlılar və ya dolixokranlar qrupuna aiddirlər, yəni ermənilərin mənsub olduğu qısabaşlılar və ya braxikranlar qrupuna aid deyillər. Bu da bir daha sübut edir ki, indiki ermənilər Qafqazın yerli əhalisi deyillər (Djavaxaşvili İ.A., İstoriya qruzinskoqo naroda, Tiflis, 1916).

Erməni siyasətçilərinin və onların "uzaqgörən" dövlət xadimlərinin "Böyük Ermənistan" planlarının son həlqəsi isə Qarabağ torpaqları ilə bağlıdır. İki əsrə yaxın bir zamanda aparılan siyasətin davamı kimi, azərbaycanlıları tarixi torpaqlarından sıxışdırıb çıxarmaq, bu ərazilərdə mifik "Böyük Ermənistan" yaratmaq məqsədi ilə Azərbaycan və türk xalqları onilliklər boyu müntəzəm surətdə ermənilərin ideoloji, hərbi və mədəni təcavüzünə məruz qalıb. 1978-ci ildə Qarabağa köçüb gəlmələrinin 150 illiyini qeyd edən ermənilər, 10 il sonra bədnam niyyətlərini üzə çıxararaq, guya bu ərazilərin qədim sakinləri olmaları barədə qondarma dəlil və sübutları ilə dünyaya car çəkməyə başladılar. Erməni millətçiləri SSRİ rəhbərliyinin və xarici havadarlarının təhriki ilə Dağlıq Qarabağı güclə Ermənistana birləşdirmək üçün Azərbaycana qarşı açıq təcavüzə başladılar və az sonra tammiqyaslı hərbi əməliyyatlara keçdilər.

Zaman-zaman bu münaqişə erməni din xadimləri, erməni generalları, ermənipərəst xarici havadarlar, xüsusən Rusiyanın ermənipərəst siyasi xadimləri, sonunda erməni lobbisi tərəfindən himayə edilib. Əslində, ermənilərin Dağlıq Qarabağ iddiasının heç bir obyektiv əsası yoxdur. Çünki məsələdə hər şey qondarma, saxta, subyektiv fakt və amillər üzərində qurulub. Ermənilərin Dağlıq Qarabağla bağlı ərazi iddiası, onların tarixi Azərbaycan torpaqlarına əvvəlcə ovuc-ovuc, sonra qarış-qarış və nəhayət, qucaq-qucaq artan ərazi iddialarının ən yüksək pilləsidir. Hələ bu azmış kimi, minlərlə Azərbaycan abidələrini məhv etmiş ermənilər və erməni kapitalının nökərləri Azərbaycanda "erməni xaçı axtarışlarına" çıxıblar. Bütün dünyaya car çəkirlər ki, Naxçıvanda onların tarixi abidələri dağıdılır. Digər tərəfdən Ağdamda "arxeoloji qazıntılar" apararaq "paytaxtlarını" tapırlar. Çox gülməli faktdır. İndinin özündə də Azərbaycanın əzəli torpaqlarında köhnə şakərlərinə sadiq qalaraq əvvəlcədən basdırdıqlarını çıxarmaqla məşğuldurlar.

Ermənilər Rusiyada, Gürcüstanda, Şimali Qafqazda, Ukraynada və dünyanın başqa yerlərində də qədim erməni məskənləri olması barədə cəfəng iddialarını ortaya qoyurlar. Bu bir erməni xəstəliyidir. Bu xəstəliklə ən çox üzləşən isə türk etnosudur, azərbaycanlılardır. Bu xəstəliyin nədən ibarət olduğunu biz daha yaxşı görürük. Bu prosesin ermənilər üçün faciəvi sonluqla başa çatacağını proqnozlaşdırmaq o qədər də çətin deyil. Elə Ermənistanın hazırkı durumuna nəzər salmaq kifayətdir ki, bu ölkənin və erməni xalqının faciə içərisində olduğunu görəsən. Bunun bariz nümunələrindən biri Ermənistandan mühacirətin kütləvi xarakter almasıdır. Hazırda Ermənistanda heç 2 milyon adam qalmayıb. Ermənilər guya özlərinə prezident seçirlər, ancaq, əslində, Ermənistan vassal vilayətdir, başqa ölkə tərəfindən idarə olunan forpostdur. Onun iqtisadiyyatı da, mənəviyyatı da, siyasəti də əlindən alınıbdır.

Ermənilər siyasi-ideoloji mübarizədə də Azərbaycana uduzublar. Bu mübarizədə Azərbaycan üstün mövqedədir. Azərbaycan cəmiyyəti Ermənistan cəmiyyətindən yüksəkdə dayanır. Təbliğat və ideoloji müharibə cəbhəsinə gəldikdə isə ümummilli lider Heydər Əliyevin müəyyənləşdirdiyi siyasətin və bu siyasətin Azərbaycan Prezidenti cənab İlham Əliyev tərəfindən uğurla davam etdirilməsinin nəticəsidir ki, ermənilər uduzurlar.

İlham Ələsgərov

Mövqe.-2011.- 25 yanvar.-S.4.