Göyçayda sahibkarlığın inkişafına yüksək qayğı göstərilir

Göyçay rayonunun son illər iqtisadi sahədə əldə etdiyi uğurlar regionların sosial-iqtisadi inkişafı dövlət proqramının məntiqi nəticəsi sayıla bilər. "2009-2013-cü illəri əhatə edən bu proqram tarixə çevrilmiş 2011-ci ildə də rayonda bütün sahələrdə inkişaf və tərəqqi üçün etibarlı zəmin rolunu oynayıb. Ötən il proqramın uğurlu icrası nəticəsində rayonda abadlıq-quruculuq və yenidənqurma işləri geniş vüsət alıb, sosial sahədə mühüm layihələr reallaşdırılıb.

Hesabat dövründə şəhərin abadlaşdırılması və yaşıllaşdırılması, küçə və meydanların yenidənqurulması istiqamətində xeyli işlər görülüb. 2011-ci ildə şəhərin 14 küçəsində ümumi sahəsi 60,6 kvadratmetr olan yeni asfalt örtüyü salınıb, bu məqsədlər üçün rayon büdcəsindən 750 min manata yaxın vəsait xərclənib. Şəhərin N.Nərimanov, Nizami, Rəsulzadə, M.Hüseynzadə, R.Rza, Bakı, Natavan, Şəhriyar, Nəsimi küçələrində abadlıq işləri aparılıb, mərkəzdə bayraq meydanının tikintisinə başlanılıb.

Şəhərin təmiz saxlanması, məişət tullantılarının vaxtında daşınması üçün müəyyən tədbirlər görülüb, mərkəzi küçələrin abadlığı təmin edilib. Şəhərdə aparılan abadlıq və yaşıllaşdırma işlərində rayonun idarə, müəssisə və təşkilatları, yerli icra və bələdiyyə orqanları yüksək mütəşəkkillik göstəriblər. Mövcud yaşıllıqlara qulluq edilməsi və yeni yaşıllıqların salınması istiqamətində bir sıra tədbirlər görülüb. "Ekologiya ili" çərçivəsində ötən il rayon ərazisində 50 mindən artıq ağac və bəzək kolu əkilib. Şəhər ərazisindəki ictimai binaların həyətlərində asfalt örtüyü salınıb və üz hissələri qaydaya gətirilib.

Hesabat dövründə şəhərin R.İsayev, Şəhriyar, Rəsulzadə, Natəvan küçələrindəki çoxmənzilli yaşayış binalarında dam örtükləri dəyişdirilib, mənzil fondunun təmirinə 82,3 min manat vəsait xərclənib. İctimai binaların ümumi istifadədə olan daxili su təchizatı və kanalizasiya sistemlərinin yenidənqurulması işləri başa çatdırılıb. Rayon əhalisinin içməli su ilə təminatının yaxşılaşdırılması istiqamətində müəyyən tədbirlər həyata keçirilib. İçməli su mənbəyi olmayan 18 kənd yaşayış məntəqəsində Ekologiya və Təbii Sərvətlər Nazirliyi tərəfindən su təmizləyici qurğuların inşası istiqamətində ilkin addımlar atılıb. İlk növbədə, 10 kənddə bu qurğuların quraşdırılması üçün torpaq sahələri seçilib, 2010-2011-ci illərdə Çaxırlı və Bəydövül kəndlərində həmin qurğuların tikintisi başa çatdırılıb.

Məlumat üçün bildirək ki, Dövlət Proqramında Göyçay rayonu üzrə 2009-2013-cü illərdə 15 tədbirin həyata keçirilməsi nəzərdə tutulub. Bunlar əsasən sənaye və kənd təsərrüfatı istehsalının genişləndirilməsi, yol təsərrüfatı və nəqliyyat, elektrik enerjisi, istilik və qaz təchizatı, rabitə, su təchizatı və kanalizasiya xidmətlərinin yaxşılaşdırılması, meliorasiya və irriqasiya, əhalinin təhlükəsizliyi, səhiyyə, mədəniyyət, idman və təhsil müəssisələrinin inşası və yenidən qurulmasıdır. Dövlət Proqramında 2011-ci il üçün Göyçay rayonu üzrə nəzərdə tutulmuş tədbirlərin yerinə yetirilməsi sahəsində müəyyən işlər görülüb. Region əhalisinin il boyu təzə meyvə və tərəvəzlə təmin etmək üçün rayonun Ərəbcəbirli kəndində 2000 tonluq soyuducu ambar kompleksi inşa edilib.

Ölkədə alternativ enerji mənbələrindən, xüsusən hidroresurslardan geniş istifadə çərçivəsində Yuxarı Şirvan kanalının Göyçay rayonunun Bığır kəndi ərazisindən keçən əlverişli və münasib hissəsində inşa edilən 3 Mva gücü olan "Göyçay-1" su elektrik stansiyasının tikintisinə başlanılıb və obyektin cari ilin iyun ayına qədər istifadəyə verilməsi planlaşdırılır.

Hesabat dövründə rayon ərazisində yol infrastrukturunun təkmilləşdirilməsi, kəndlərarası avtomobil yollarının yenidən qurulması istiqamətində də əməli tədbirlər görülüb. Muğanlı-Yevlax avtomagistralının Göyçay rayonu ərazisindən keçən hissəsinin əsaslı tikilməsi işlərinə başlanılıb.

Azərbaycan Respublikası Prezidentinin 28 iyul 2011-ci il tarixli sərəncamına əsasən 5 kəndi birləşdirən 9 min nəfər əhalisi olan Ləkçıplaq-Yalman-Şıxbəy-Məlikkənd-Şıxəmir kəndlərini birləşdirən yolun tikintisinə 2,5 milyon manat vəsait ayrılması rayonda əsl bayram əhval-ruhiyyəsi yaradıb. Göyçaylılar ölkə prezidentinin bu diqqət və qayğısını yüksək qiymətləndirirlər. Ümumi uzunluğu 11,6 km. olan kəndlərarası yolun tikintisi qısa müddətdə aparılıb və dekabr ayında istifadəyə verilib.

Dövlət Proqramına müvafiq olaraq 2011-ci ildə Şıxbəy kəndində 180 yerlik məktəb binası, şəhər 3 saylı və Qaraməryəm kənd tam orta məktəbləri əsaslı yenidənqurma işləri aparıldıqdan sonra istifadəyə verilib. Hazırda Çərəkə və Ləkçıplaq kəndlərində 360 yerlik, Ulaşlı-şıxlı kəndində 220 yerlik tam orta məktəbin tikintisi, Göyçay şəhərində 12 saylı uşaq bağçasının əsaslı təmiri işləri aparılır. Şəhər 1 saylı uşaq bağçası üçün 40 yerlik binanın tikintisi üçün layihə-smeta sənədləri hazırlanır. 2011-ci ildə fəaliyyətdə olan obyektlərin genişləndirilməsi və yenidənqurulması, kiçik və orta sahibkarlığın inkişaf etdirilməsi və görülmüş digər tədbirlər nəticəsində 724 daimi iş yeri açılıb. Bütövlükdə 2003-2011-ci illərdə rayonda 8562 yeni iş yeri açılıb və bunun da 6518-i və ya 76,1 faizi daimidir.

Regionların tarazlı və davamlı inkişafı, qeyri-neft sektorunun yüksəlişi, yeni istehsal müəssisələrinin yaradılması istiqamətində ardıcıl tədbirlər həyata keçirən dövlət başçısı İlham Əliyevin ölkədə sahibkarlığın inkişafının stimullaşdırılması ilə bağlı gördüyü işlər rayonda da özəl sektorun dinamik inkişafına güclü təkan verib. Yerli sahibkarlar və iş adamları rayonun sosial-iqtisadi inkişafının sürətləndirilməsində, əhalini narahat edən problemlərin həllində fəal iştirak edirlər.

2011-ci ildə rayon üzrə sənaye məhsulunun 76,3 faizi qeyri-dövlət sektorunda istehsal edilib və ötən ilə nisbətən özəl bölmədə sənaye məhsulu istehsalı 52,8 faiz artıb. İnvestorların rayona cəlb edilməsi üçün əlverişli mühitin yaradılmasının nəticəsidir ki, hər il Konserv zavoduna, Süd zavoduna, Kərpic zavoduna, Broyler Quşçuluq fabrikinə yüz minlərlə manat investisiya qoyulur. Keçən il Sahibkarlığa Kömək Milli Fondundan kredit almaq istəyən sahibkarların sayı xeyli artmış, 2011-ci ildə 19 sahibkarlıq subyektinə fondun vəsaiti hesabına 1,9 milyon manat güzəştli kredit verilmişdir. Keçən il istifadəyə verilmiş 2 min tonluq soyuducu anbar kompleksi Sahibkarlığa Kömək Milli Fondundan alınmış güzəştli kredit hesabına inşa edilmişdir. Hazırda rayonun Yalman kəndində fondun ayırdığı kredit hesabına üzüm qəbulu müəssisəsi və sutkada 8 ton spirt istehsal edən qurğu kompleksi tikilir. Obyektin ümumi smeta dəyəri 3,0 milyon manatdır ki, bunun da 1,1 milyon manatı güzəştli kredit qaydasında sahibkara verilmişdir.

Rayonda kiçik və orta sahibkarlara məsləhət, informasiya və tədris xidmətləri göstərmək məqsədi ilə İqtisadi İnkişaf Nazirliyinin Göyçay biznes tədris mərkəzi yaradılmışdır. Keçən il İqtisadi İnkişaf Nazirliyi tərəfindən rayon sahibkarları üçün müxtəlif mövzularda iki seminar, Sahibkarlığa Kömək Milli Fondu tərəfindən kredit yarmarkası keçirilib.

2011-ci ildə sahibkarların vəsaiti hesabına bir sıra istehsal, ticarət və xidmət obyektləri istifadəyə verilib, şəhər mehmanxanasında müasir tələblərə cavab verən əsaslı yenidənqurma işləri aparılıb. Hazırda iş adamlarının vəsaiti hesabına şəhərdə iki yeni şadlıq evi, dörd mərtəbəli ticarət mərkəzi, Qaraməryəm kəndində yeni ticarət kompleksi inşa edilir. Özəl sektorun inkişafı, maddi imkanlarını artıran vətəndaşlarımızın sayının artması bütün Azərbaycanda olduğu kimi, rayonda da sabitlik və tərəqqinin, demokratikləşmə prosesinin hərəkətverici qüvvəsi sayılan orta təbəqənin əhatəsini genişləndirir.

Hesabat ilində rayonda fəaliyyət göstərən təhsil, səhiyyə, mədəniyyət və digər humanitar sahələrin kollektivləri də öz işlərini yüksək səviyyədə qurmağa səy göstəriblər. Rayonda fəaliyyət göstərən 40 tam, 13 ümumi orta, 4 ibtidai məktəbdə 15777 nəfər şagird təhsilə, 4683 nəfər şagird məktəbdənkənar tərbiyə müəssisələrinə cəlb edilib. 1375 nəfər məktəbəqədər tərbiyə müəssisələrində ictimai tərbiyə ilə əhatə olunublar. Şagirdlərin təlim-tərbiyəsi ilə 2852 nəfər müəllim məşğul olur. Müəllimlərdən 6 nəfəri "Əməkdar müəllim" fəxri adı, 5 nəfəri "Tərəqqi" medalı ilə təltif olunub. 3 nəfər "Qabaqcıl təhsil işçisi" döş nişanına layiq görülüb.

Təhsil sistemində artıq dördüncü ildir ki, Təhsil Sisteminin İnkişaf layihəsi tətbiq olunur. Fənn kurrikulumlarının tətbiqə başlanmasından keçən dövr ərzində 493 nəfər, o cümlədən hesabat ilində 155 nəfər müəllim treninqlərdən keçərək sertifikat alıb. Fənn kurrikumlarının tətbiqi sahəsində rayon təhsilində əldə edilmiş təcrübə təhsil prosesində uğurla tətbiq edilir.

Yeni qiymətləndirmə standartlarının daha keyfiyyətli təhsil verilməsi üçün işdə müasir idarəetmə mexanizminin tətbiqi, maddi-texniki bazanın möhkəmləndirilməsi, kadr siyasətinin düzgün aparılması aktual məsələlərin həlli əsas vəzifələrdən olub. Tədrisin keyfiyyətini yaxşılaşdırmaq üçün məktəblilərin fənn olimpiadalarının keçirilməsi daha kütləvi təşkil olunub, 12 nəfər şagird rayon turunda iştirak edib. Şəhər 7 saylı tam orta məktəbin uşaqlardan ibarət teatr qruppası respublika məktəbliləri arasında keçirilən baxış müsabiqədə qalib gəliblər. Şahmat məktəbinin yetirməsi Səbinə Quliyeva 18 yaşlı qızlar arasında keçirilən respublika birinciliyində fəxri II yer tutaraq Bolqarıstanda keçiriləcək Avropa birinciliyinə vəsiqə qazanıb.

Məktəblərin maddi-texniki bazasının möhkəmləndirilməsi, kadr siyasətinin düzgün aparılması, təlimdə ən müasir təlim metodlarının tətbiqi kimi aktual məsələlərin həlli üçün daha geniş imkanlar açılır.

(ardı var)

Tərlan NƏSİRLİ,

Bakı-Göyçay-Bakı

Mövqe.- 2012.- 10 mart.- S.10.