Regional inkişaf proqramları Ucarda mədəni-intellektual tərəqqiyə böyük töhfələr verir

Regionların sosial-iqtisadi inkişafı Dövlət Proqramı son illərdə Ucarda ictimai həyatın bütün sahələrinin müasirləşməsini təmin edib. Xüsusən də 2011-ci ildə rayonda proqram üzrə tədbirlər sistemli və ardıcıl şəkildə gerçəkləşdirilib. Bu tədbirlər təkcə iqtisadi deyil, mədəni-humanitar sahələri də əhatə edib. İlk növbədə, təhsil infrastrukturunun müasirləşdirilməsi tədbirləri davam etdirilib.

Şagirdlərin vətənpərvərlik və hərbi vətənpərvərlik tərbiyəsinin, həmçinin bədii və estetik baxışlarının inkişaf etdirilməsinə ciddi diqqət yetirilib, "Cəsurlar" və "Şahin" hərbi idman və turizm oyunlarında rayon üzrə bütün məktəblərin iştirakı təmin olunub. Şagirdlər arasında rəsm və inşa yazı müsabiqələri keçirilib.

Rayonda uşaq bağçaları şəbəkəsinin genişləndirilməsi və maddi-texniki bazalarının gücləndirilməsinə diqqət artırılıb. Keçən il şəhər 3 saylı uşaq bağçasının əsaslı təmir olunması bu sahədə müəyyən irəliləyiş olsa da, rayonun 15 kəndində uşaq bağçalarının olmaması əsas problemdir.

2011-ci ildə rayonun səhiyyə işçiləri də qarşıya qoyulmuş vəzifələrin layiqincə yerinə yetirilməsi üçün ciddi çalışıblar. Əhalinin sağlamlığının qorunması, yoluxucu xəstəliklərin qarşısının alınması istiqamətində məqsədyönlü işlər görülüb. 2011-ci ildə rayon Uşaq xəstəxanasının və rayon poliklinikasının Heydər Əliyev Fondunun dəstəyi ilə əsaslı təmir olunaraq istifadəyə verilməsi rayon əhalisinin və tibb işçilərinin sevincinə səbəb olmaqla xəstəxanada iş şəraitini xeyli yaxşılaşdırıb. Ərazidə 118 çarpayılıq xəstəxananın, təcili və təxirəsalınmaz tibbi yardım stansiyasının, Məhkəmə Tibbi Ekspertiza və Pataloji Anatomiya Birliyi rayon şöbəsinin tikintilərinin aparılması, eləcə də tibb müəssisələrinin yeni tibbi avadanlıqlar və diaqnostik aparatlarla təmin olunması rayonda səhiyyə xidmətinin yaxın vaxtlarda daha da yaxşılaşacağına inamı artırıb.

Görülən işlər tibb işçilərində ruh yüksəkliyi yaratmaqla bərabər, onların məsuliyyət hissinin artırılmasına səbəb olub. İl ərzində hər xəstənin həyatı uğrunda mübarizə aparılıb, xəstəxanada letallıq 0,5 faiz olub. Qeyd olunan dövrdə ana və uşaqlara göstərilən qayğının artırılmasına çalışılıb. Pediatr və ginekoloqlardan ibarət qrupların yerlərə gedişləri davam etdirilib, gənc analar arasında sanitariya maarifi işləri gücləndirilib. Patronaj işlərinə diqqət artırılıb, evdə doğuşların sayı minimuma endirilib, xəstəxanada ana ölümü olmayıb.

Rayonda yoluxucu xəstəliklərlə mübarizə sahəsində da ardıcıl iş aparılıb, polimelit, göy öskürək, skarlatına, qarın yatalağı və malyariya ilə yoluxma halları qeydə alınmayıb. Dövlət qayğısına uyğun olaraq güzəşt və imtiyazlardan istifadə etmək hüququna malik şəxslərin pulsuz dərmanlarla təchizatı davam etdirilib, onlara pulsuz olaraq 214 min manatlıq dərman verilib. Tibbi xidmət sahəsində bir sıra problem və çatışmazlıqlar da müşahidə edilib. Bunların bir çoxu obyektiv səbəblərlə bağlı olub, rayonun həkim və tibb məntəqələrinin bir çoxunun uyğunlaşdırılmış binalarda yerləşməsi, həmçinin həkim kadrlarının çatışmaması, başqa sözlə 139 həkim ştat vahidindən 60 ştatının boş olması ilə əlaqədardır. Sadalanan problemlərin aradan qaldırılması üçün görüləcək işlər müəyyənləşdirilib. 2012-ci ildə 3 tibb məntəqəsinin təmir edilməsi planlaşdırılıb. Kadr məsələləri ilə bağlı əlaqədar təşkilatlar qarşısında məsələ qaldırılıb.

2011-ci ildə rayonda mədəni-maarif müəssisələrinin sayı dəyişməyib. Əhaliyə 18 mədəniyyət evi, 8 klub, 47 kitabxana və 2 muzey vasitəsilə mədəni xidmət göstərilib. Bu müəssisələrin kollektivləri əvvəlki illərdə buraxılmış nöqsan və geriliklərin aradan qaldırılması istiqamətində səfərbər olublar.

Rayonda qeyd olunan el bayramlarının, tarixi və əlamətdar günlərin əksər hissəsi rayonun mədəniyyət kollektivlərinin yaxından iştirakı ilə keçirilib. Bu tədbirlər bədii özfəaliyyət kollektivlərinin konsert proqramları ilə yekunlaşıb. İl ərzində mədəniyyət evləri və klublarının işlərinə rayonun 3 zonası üzrə keçirilən baxış-müsabiqələrdə qiymət verilib. Mədəniyyət müəssisələrinin ayrı-ayrı kollektiv və fərdi ifaçıları respublika Mədəniyyət və Turizm Nazirliyinin təşkilatçılığı ilə keçirilən müsabiqələrdə iştirak edib. Uşaq incəsənət məktəbinin xor kollektivi Xor kollektivlərinin VII Respublika müsabiqəsində fəal iştirak edərək fəxri fərmanla mükafatlandırılıb.

Noyabr ayında Azərbaycanın Milli Qəhrəmanı Mübariz İbrahimovun xatirəsinə həsr olunmuş I Ümumrespublika teatr festivalında rayon Mədəniyyət evinin teatr qrupu ən yaxşı tamaşa nominasiyası üzrə diploma layiq görülüb. Kollektivin 1 nəfər üzvü ən yaxşı aktyor oyununa görə birinci yeri tutub. 2011-ci ildə, həmçinin rayon Mədəniyyət və Turizm şöbəsi simli və zərb alətləri ifaçılarının respublika müsabiqəsinə ev sahibliyi edib, rayon təmsilçiləri qaliblər sırasında olublar.

Hesabat ilində rayonda Heydər Əliyev Mərkəzinin istifadəyə verilməsi bu sahədə işlərin daha peşəkar qurulmasına şərait yaradıb. İl ərzində həm Heydər Əliyev Muzeyinə, həm də Tarix-Diyarşünaslıq Muzeyinə gələnlərin sayı artıb, tarixi-əlamətdar günlərdə muzeylərdə tematik tədbirlər keçirilməsi ənənəsi davam etdirilib.

Qeyd olunan dövrdə rayon Mədəniyyət evi, Tarix-Diyarşünaslıq Muzeyi və Mərkəzləşdirilmiş Kitabxana sistemində əsaslı təmir işləri aparılıb. Mədəniyyət müəssisələrinə 100 min manatlıq inventar, 54,6 min manatlıq texniki avadanlıqlar alınıb. Bütün bunlarla yanaşı, rayonun mədəniyyət evi və klublarının əksəriyyətinin bina şəraitinin yaxşılaşdırılmasına ehtiyac var və bu sahədə əməli işlər görülməlidir.

2011-ci ildə rayonda olan 15 mədəni və tarixi abidənin bir çoxunun ərazisində cari təmir və abadlıq işləri aparılıb, abidələrin qorunmasına diqqət artırılıb. Prezident tərəfindən 2011-ci ilin "Turizm ili" elan olunması bu sahəyə xüsusi diqqət yetirilməsini zəruri edib. Rayonda aparılan abadlıq və quruculuq işləri əraziyə turistlərin cəlb edilməsi baxımından vəziyyəti yaxşılaşdırsa da, rayonda mehmanxana olmaması vəziyyətə mənfi təsir göstərir.

2011-ci ildə rayon Mədəniyyət və Turizm şöbəsi tərəfindən rayonun görməli yerləri barədə buklet hazırlanıb, abidələrin siyahısı dəqiqləşdirilib, onların bəzilərinə inventar nömrələri verilib. Eləcə də sahibkarların vəsaiti hesabına mehmanxana binasının tikilməsi üçün torpaq sahəsi ayrılıb və bu da qeyd olunan sahə üzrə yaxın gələcək üçün ümidləri artırır.

Məlum olduğu kimi, Azərbaycan Respublikası Prezidentinin 16 yanvar 2012-ci il tarixli sərəncamı ilə 2012-ci il respublikada "İdman ili" elan edilib. Qeyd olunan sərəncam rayon ictimaiyyəti, xüsusilə gənclər tərəfindən böyük rəğbətlə qarşılanıb. Rayon İcra Hakimiyyəti Aparatı və rayon Gənclər və İdman İdarəsi tərəfindən sərəncamın tələbləri baxımından il ərzində həyata keçiriləcək tədbirlər müəyyənləşdirilib.

Son dövrlərdə rayonda sadə idman qurğularının sayı artmaqla şəraiti xeyli yaxşılaşıb, yeni istifadəyə verilmiş məktəb binalarında fəaliyyət göstərən idman zalları və stadionlar hesabına bu sahədə vəziyyət yaxşıya doğru dəyişib. 2011-ci ildə rayonda yeni Şahmat məktəbinin istifadəyə verilməsi bu sahədə işləri canlandırıb. Göstərilən qayğıya cavab olaraq gənc şahmatçı Xatun Bağırova əvvəlki illərdəki uğurlarını təkrar edib, dekabr ayında İsveçrədə şahmat üzrə beynəlxalq yarışlarda 14 yaşlı qızlar arasında 1-ci yerə layiq görülüb.

Digər idmançımız Aynur Məmmədova 2011-ci ildə Rusiya Federasiyasında keçirilən parolimpiya oyunlarında taekvando üzrə qızlar arasında birinci yeri tutub. 2012-ci ildə rayonda müxtəlif idman yarışlarının keçirilməsi qərara alınıb. Bu vəzifələrin layiqincə yerinə yetirilməsi əlaqədar təşkilatlardan, xüsusilə rayon Gənclər və İdman İdarəsinin kollektivindən yüksək əzmkarlıq tələb edir.

2011-ci ildə rayonda ideoloji işin təkmilləşdirilməsi istiqamətində işlərin canlandırılması da diqqət mərkəzində saxlanılıb. İlboyu, xüsusilə ulu öndərin doğum günü ərəfəsində gənc və yeniyetmələrin Heydər Əliyev Muzeyinə ziyarəti təşkil olunub, onlara dolğun məlumatların verilməsinə çalışılıb. Əsas diqqət yetişməkdə olan nəslin vətənpərvərlik və dövlətçilik ruhunda formalaşmasına yönəldilib.

Bu dövrdə rayonda krimonogen durumun sabit saxlanılmasına çalışılıb. Baş vermiş cinayət hadisələrinin sayı əvvəlki illə müqayisədə 5 fakt azalaraq 74-dən 69-a enib. Bunlardan 64-nün üstü isti izlərlə açılıb, açılma faizi 92,6 faiz olub. Narkotik vasitələrin qeyri-qanuni dövriyyəsi və narkotik tərkibli bitkilərin əkilib-becərilməsinə qarşı mübarizə davam edib. Aparılan axtarış-əməliyyat tədbirləri nəticəsində 9 fakt aşkar olunub, vətəndaşlardan 2367,2 qram qurudulmuş marixuana, 1,824 qram heroin götürülub. 0,70 hektar sahədə yabanı halda bitən 3122 kq çəkidə çətənə kolu yandırılaraq məhv edilib.

2011-ci ildə bələdiyyələr tərəfindən 186 nəfərə 14,3 hektar torpaq sahəsi ayrılıb, bələdiyyələrin büdcəsi 2010-cu ilə nisbətən 114 min manat çoxalaraq 340,1 min manat olub. Bu da bir sıra problemlərin həll olunması imkanlarını artırıb.

2011-ci ildə rayon İcra Hakimiyyəti Aparatına yuxarı təşkilatlardan 323 ədədi ərizə, 113 ədədi şikayət olmaqla 436 ədəd, rayon daxilindən 947 ədədi ərizə, 28 ədədi şikayət və 1 ədədi təklif olmaqla 976 ədəd vətəndaş müraciəti daxil olub. Müraciətlərdə vətəndaşlar bir qayda olaraq mənzillə təmin olunmalarını, maddi köməklik edilməsi, ailələrinə ünvanlı sosial yardım təyin edilməsi, mənzillərinin təmiri, qaz və su təchizatında, eləcə də gündəlik problemlərinin həllində köməklik olunmasını xahiş etmiş, hər bir müraciətə qanunamüvafiq qaydada baxılması diqqət mərkəzində saxlanılıb.

(ardı var)

Tərlan Nəsirli

Bakı-Ucar-Bakı

Mövqe.- 2012.-20 mart.- S.10.