Hacıqabulun problemləri sürətlə həllini tapır

Hacıqabul rayonunun son illərdəki dinamik inkişafı həm də ölkə rəhbərliyinin xüsusi diqqət və qayğısı ilə bağlıdır. Dövlət başçısı İlham Əliyev 2004-cü ildən 4 dəfə rayonda səfərdə olub, regionların sosial-iqtisadi inkişafı dövlət proqramları çərçivəsində həyata keçirilən tədbirlərlə maraqlanıb, bir sıra yeni obyektlərin, istehsal müəssisələrinin açılışında iştirak edib. Sonuncu dəfə ölkə prezidenti 2010-cu il sentyabrın 7-də rayonda səfərdə olub. Və Kür çayının daşması nəticəsində yaranan təbii fəlakət zamanı Hacıqabul rayonunun Meyniman kəndi ərazisində evləri dağılan vətəndaşlar üçün yeni mənzillərin tikilib istifadəyə verilməsi mərasimində iştirak edib. Dövlət başçısının iştirakı ilə sentyabrın 7-də yeni mənzillərin orderləri sahiblərinə təqdim olunub.

Məlumat üçün bildirək ki, 2010-cu il mayın 23-də kəndin ərazisində Kür çayı öz məcrasından çıxaraq təxminən 85 metr uzunluğunda qoruyucu bəndi dağıtmışdı. Nəticədə Meyniman kəndindəki 280 ev və 286 təsərrüfat, o cümlədən 1350 nəfər əhalisi olan 1-ci Meyniman kəndindəki 150 həyət su altında qalmışdı. Daşqın zamanı Meyniman kəndində 35 ev tamamilə uçmuş, 64 ev qəzalı vəziyyətə düşmüşdü. Prezident İlham Əliyevin tapşırıqlarına uyğun olaraq, digər kənd və qəsəbələrlə yanaşı, meynimanlıların da problemləri diqqətdə saxlanıldı. Uçmuş evlərin yerində 22 ev tikildi. Bu evlərdə zəruri infrastrukturun yaradılması, həyətyanı sahələrin normal vəziyyətə gətirilməsinə xüsusi diqqət yetirildi. Müasir üslubda tikilən evlərdən 15-i ikiotaqlı, 3-ü üçotaqlı, 4-ü dördotaqlıdır. Bununla yanaşı, kənddəki 21 evdə bərpa-gücləndirmə işləri aparılıb. 43 evdə cari təmir işlərinin aparılması üçün ziyan çəkmiş sakinlərdən 110 nəfərinə 109 min manatdan çox yardım verilib. Həmçinin daşqın nəticəsində Meyniman kəndinin dağılmış infrastrukturunun yenidən qurulması istiqamətində də iş aparılıb.

Ümumilikdə, 2010-cu ildə rayonda əsaslı təmir-tikinti işləri uğurla davam etdirilib. Hacıqabul Rayon İcra Hakimiyyətinin inzibati binasının fasad hissəsinin 1300 kvadratmetri alkaponla üzlənib, 48 kvadratmetr döşəməyə süni qranit tavalar qoyulub, 50 kvadratmetr tavan alçıpan tavalarla üzlənib, 238 kvadratmetr divar emulsiya ilə rənglənib. Pilləkən divar mərmər tavalarla üzlənib və mərmər balyanslar quraşdırılıb. Bundan başqa, "Dədə Qorqud" parkında 85 kvadratmetr divar hörülüb. Şəhərin Xətai küçəsindəki 3 saylı binada 780 kvadratmetr dam örtüyünün taxta şəbəkəsi dəyişdirilərək şifer vurulub. Qeyd olunan işlərə yerli büdcədən 17,632 min manat vəsait xərclənib. Rəncbər kənd daxili avtomobil yoluna 300 pm, I Udulluda 25 pm, Ələtlidə 400 pm, Abdulabadda 450 pm, Meynimanda 500 pm, Atbulaqda 600 pm, Qızılburunda 320 pm, Qarasuda 350 pm, Navahıda kənd 500 pm, Pirsaatda 240 pm yola 10 sm qalınlığında qum-çınqıl qarışığından əsas qoyulub. Muğan-Talış avtomobil yolunun 12 kilometrlik hissəsində cari təmir işləri görülüb.

Şəhərin sel sularından mühafizəsinin təmini üçün kanalın 60 min kub metr hissəsinin yatağının qazılması, qruntun 50 metr məsafədən buldozer ilə nəqli və qruntun 300 metr məsafədən özüboşaldan maşınlarla daşınması işləri görülüb. Abdulabad-Kolanı kənddaxili avtomobil yolunda 500 kv.metr sahəyə 12 sm qalınlığında qum-çınqıl qarışığından əsas qoyulub. Muğan-Udullu avtomobil yolunun 6,3 km hissəsinə 4,5 metr enində qum-çınqıl qarışığından əsas qoyulub. Şəhərin cənub hissəsinə dəmir yoluna paralel 2,5 km uzunluğunda diametri 159 mm olan borudan su xətti çəkilib. Şəhərin H.Həmidov küçəsinə dəyəri 36,9 min manat olmaqla, qum-çınqıl qarışığından 1080 kubmetr əsas düzəldilib. Həmin küçəyə dəyəri 93,1 min manat olmaqla 6 sm qalınlıqda 8219 kvadratmetr xırda dənəli asfalt-beton örtüyü vurulub. H.Z.Tağıyev küçəsinin qərb hissəsində 514 kub metr qum çınqıl qarışığından əsas düzəldilib.

Ümumilikdə, hesabat dövründə rayonda görülmüş tikinti, quruculuq və abadlıq işlərinə yerli büdcədən 685,3 min, büdcədənkənar vəsait hesabına 436,7 min manat xərclənib. Rayon ərazisində son illərdə 3 yeni müasir tipli yanacaq doldurma məntəqəsi, 4 ictimai iaşə, 24 ticarət obyekti, o cümlədən 2010-cu ildə 1 ictimai iaşə, 2 ticarət, 1 yanacaq doldurma məntəqəsi tikilib. Şəhərin, kənd və qəsəbələrin yaşıllaşdırılması tədbirləri 2010-cu ildə də davam etdirilib. Hesabat dövründə təkcə şəhərdə 18 minə yaxın ağac, 13 min gül kolları əkilib. Azərbaycan Respublikası Ekologiya və Təbii Sərvətlər Nazirliyi tərəfindən Atbulaq kəndi ərazisindən Hacıqabul şəhəri ərazisinə qədər 10,000 ədəd müxtəlif ağac növləri əkilib.

Regionların sosial-iqtisadi inkişafı tədbirləri çərçivəsində əhalinin elektrik enerjisi, təbii qaz və içməli su ilə etibarlı səviyyədə təmini də diqqət mərkəzində olub. 2010-cu ildə rayonun Kompressor, Xilə, Çkalov, Talış, Kolanı, Axtaçı-Şirvan, Navahı, Rəncbər, Muğan, Udullu, Qarasu, Abdulabad hava xətlərində müxtəlif kilovatlıq transformatorlar cari təmir olunub. Kür çayının daşması nəticəsində Xilə-Mirzə hava xəttində su altında qalmış 1000 Kva-lıq transformatorun əvəzinə 630 kva-lıq transformator quraşdırılıb. Su altında qalan "K 3" nasos stansiyasının yerində 1 ədəd 1000 Kva-lıq transformator yarımstansiyası quraşdırılıb.

Bundan əlavə, rayon ərazisində yerləşən yarımstansiyalarda və hava xətlərində xeyli cari və əsaslı təmir işləri aparılıb. 35/10 kv-luq Abdulabad, Muğan və Udullu yarımstansiyalarında, həmçinin 35/6 kv-luq Atbulaq, Pirsaat, Hacıqabul və Pirsaat yarımstansiyalarında transformatorlar cari təmir olunub. 2010-cu il ərzində Kolanı, Axtaçı-Şirvan, Muğan, Qarasu, Talış, Navahı, Pirsaat, Qubalıbaloğlan, Meyniman kəndlərində əhali istehlakçı qrupuna 352 ədəd, o cümlədən Kür çayının daşması nəticəsində evləri uçmuş sakinlər üçün yeni sayğaclar quraşdırılıb. Şəhərdə fərdi abonentlər üçün 51 ədəd smartkart tipli yeni sayğaclar quraşdırılıb. Kənd ərazilərində yanmış və sıradan çıxmış sayğaclar yenisi ilə əvəz olunaraq 470 ədəd 1 fazalı, 15 ədəd 3 fazalı sayğac quraşdırılıb.

Əhalinin təbii qazla dayanıqlı şəkildə təmini də hesabat dövründə Hacıqabul Rayon İcra Hakimiyyətinin diqqət mərkəzində olub. 2010-cu ildə rayon ərazisində qaz sisteminin yenidən qurulması işi davam etdirilib. Ümumiyyətlə, hesabat dövründə şəhərdə 255.954 pm boru çəkilib. 4650 evə çıxış dayağı qoyulub, 128 siyirtmə və 2 ədəd kollektor quraşdırılıb.

Fərdi evlərə bu günə kimi 4383 sayğac quraşdırılıb. Rayon kəndlərində də qazlaşma işlərinə başlanılıb. Qızılburun Qubalıbaloğlan, Navahı, Rəncbər, Atbulaq, Qarasu kəndlərində, Navahı, Muğan qəsəbələrində qazlaşdırma işləri başa çatdırılıb. Abdulabad, Kolanı, Talış, Meyniman və Udulu massivində yerləşən 7 kənddə də polietilen borularla qaz çəkilişinə başlanılıb. Regionların sosial-iqtisadi inkişafı Dövlət Proqramına əsasən, şəhərin mərkəzi tam, Rəncbər kəndində 584 və Muğan qəsəbəsində 696 ev qazlaşdırılıb.

Hacıqabul Rayon İcra Hakimiyyəti təhsil, səhiyyə, mədəniyyət və gənclər təşkilatları ilə işi də daim diqqət mərkəzində saxlayır. Hesabat dövründə rayonda 30 ümumtəhsil məktəbi, 5 məktəbdənkənar, 3 məktəbəqədər tərbiyə müəssisəsi fəaliyyət göstərir. Məktəblərin maddi-texniki bazasının möhkəmləndirilməsi istiqamətində də bir sıra işlər görülüb. Yeni tikilən məktəblərlə yanaşı, onlarca sinif otaqları da inşa və təmir edilib. Hesabat dövründə məktəblərə ümumi dəyəri 80115 manat olan 350 dəst şagird partası, 35 ədəd yazı lövhəsi, 20 ədəd müəllim stolu, 171 ədəd müəllim stulu, 91 ədəd şkaf, 5 ədəd kompüter stolu və digər avadanlıqlar verilib. Məktəblərə ümumi dəyəri 9292 manat olan 7 dəst kompyuter ayrılıb. Şəhər 2 saylı və Ağacanlı kənd orta məktəbləri əsaslı təmir olunub. 2010-cu ildə Azərbaycan prezidentinin sərəncamına uyğun olaraq keçirilmiş "Ən yaxşı müəllim" müsabiqəsində şəhər 1 saylı orta məktəbin biologiya müəllimi Səbinə Rəsulova qalib olub və 5000 manat pul mükafatına layiq görülüb. Rəncbər kənd orta məktəbinin məzunu Günay Məmmədova ali məktəbə qəbul zamanı yüksək bal topladığına görə prezident təqaüdünə layiq görülüb.

Dövlət Proqramı çərçivəsində Hacıqabulda səhiyyə müəssisələrinin fəaliyyəti də diqqət mərkəzindədir. Rayonda 106 çarpayılıq 2 xəstəxana, 10 həkim və 12 tibb məntəqələri, 55 həkim, 174 orta tibb işçisi əhaliyə səhiyyə xidməti göstərir. Əhalinin hər 10 min nəfərinə 8,2 həkim, 26 orta tibb işçisi düşür. Rayon səhiyyəsinin strukturuna Dəmiryol xəstəxanası və Qovşaq dəmiryol poliklinikası, həmçinin Gigiyena və Epidemiologiya mərkəzi daxildir. 2010-cu ildə Hacıqabulda əhaliyə göstərilən tibb xidmətinin səviyyəsini yüksəltmək məqsədilə müəyyən işlər görülüb. Yeni istifadəyə verilmiş poliklinika-xəstəxana və Uşaq Tibb Mərkəzi müasir avadanlıqla təchiz edilib. Hesabat dövründə 16 həkim, 24 orta tibb işçisi təkmilləşdirmə kurslarında olub.

Rayon Mədəniyyət və Turizm şöbəsinin taleyində 21 klub, 32 müstəqil kitabxana, 1 yeddi illik musiqi məktəbi, Tarix-Diyarşünaslıq muzeyi, 14 arxeoloji tarixi abidə fəaliyyət göstərir. Şöbə öz işini günün tələbləri səviyyəsində qurmağa çalışaraq bir sıra tədbirlər həyata keçirir. Ötən il şəhər klubu, mərkəzi və uşaq kitabxanaları, Abdulabad və Kolanı mədəniyyət evləri əsaslı şəkildə təmir olunaraq yeni inventar və avadanlıqlarla təmin olunub. Qarasu kənd və 3 saylı şəhər kitabxanaları yeni binalara köçürülüb.

(ardı var)

Tərlan Nəsirli

Bakı-Hacıqabul-Bakı

Mövqe.- 2012.- 25 yanvar.- S. 10.