Ermənistan işğal etdiyi rayonları boşaldır

“Todays Zaman”ın ardınca, Türkiyənin “Sabah” qəzeti

də yeni sensasion məlumat yaydı

Son günlərdə Türkiyə mediasında Dağlıq Qarabağ münaqişəsi ilə ilgili biri-birinin ardınca maraqlı xəbərlər yayılır. Həmin məlumatların nə dərəcədə həqiqəti əks etdirməsi dəqiq bəlli olmasa da, belə aydın olur ki, Ermənistan işğal etdiyi bəzi rayonları Türkiyə ilə əlaqələrinin bərpa olunması istiqamətində geri qaytarmağa hazırdır.

Belə bir vaxtda Türkiyənin "Sabah” qəzeti "Ermənistanla əlaqələrdə sürpriz: çəkilmə başlayır” adlı ilginc xəbər yayıb. Burada qeyd olunur ki, xarici işlər naziri Əhməd Davudoğlunun Türkiyə-Ermənistan münasibətlərinə dair "bəzi yaradıcı ideyalarla, yeni düşüncələrlə irəliləməyə çalışırıq” mesajının detalları məlum olub: "Ankara Davudoğlunun ABŞ təmasları və baş nazir Ərdoğanın Putinlə görüşündə də gündəmə gələn Qafqazda sülh məsələsi üçün yeni yol xəritəsi hazırlayıb. Ermənistan hökuməti Azərbaycanla xroniki problemə çevrilmiş Dağlıq Qarabağdakı iki rayondan çəkilməyi şifahi olaraq qəbul etdi. Türkiyə isə Ermənistandan bunu rəsmən olaraq bəyan etməsini istəyir. Əgər Ermənistan belə bəyanat versə, Davudoğlu dekabrın 12-də Qara Dəniz İqtisadi Əməkdaşlıq Təşkilatının toplantısında iştirak etmək üçün İrəvana gedəcək”. "Sabah”ın yazdığına görə, diplomatik mənbələr Azərbaycanın zəngin enerji qaynaqları sayəsində böyük inkişaf içində olduğunu, buna qarşı Ermənistanın uduzduğunu bildirərək bu düyünü açmağın zamanı gəldiyini düşünür: "Bir açıqlama verilir, 7 rayonunun 2-dən çəkilmə başlayır, buna cavab olaraq da Türkiyə-Ermənistan münasibətləri normallaşır”.

Qeyd edək ki, bundan əvvəl də Türkiyə hakim dairələrinə yaxın "Todays Zaman”da dərc olunmuş məqalədə də analoji fikirlər səslənmişdi. Qəzetin yazdığına görə, oktyabr ayında İsveçrəyə səfər edən Türkiyə xarici işlər naziri Əhməd Davudoğlu isveçrəli rəsmi şəxslərə bildirib ki, Ankara İrəvanla münasibətləri normallaşdırmağa hazırdır. Amma türkiyəli nazir bunun üçün İrəvan işğal edilmiş Azərbaycan torpaqlarını azad etməli olduğunu deyib. Davudoğlu deyib ki, əgər İsveçrə Ermənistanı işğal olunmuş torpaqların azad olumasının vacibliyiniə inandıra bilərsə, Ankara Ermənistanla sərhədləri aça bilər. Qəzetin məlumatına görə, İsveçrə məmurları Davudoğlunun dediklərini müsbət qarşılayıblar.

Türkiyə Xarici Işlər Nazirliyindəki mənbənin sözlərinə görə, qardaş ölkə qondarma soyqırımın 100 illiyinə - 2015-ci ilə qədər Ermənistanla münasibətləri normallaşdırmaq niyyətindədir. Qəzet xatırladır ki, Türkiyə və Ermənistan 2009-cu ildə Sürix protokollarını imzalayarkən artıq yol xəritəsini hazırlamışdılar, lakin daha sonra Azərbaycan və Ermənistanın Dağlıq Qarabağ münaqişəsinin nizamlanması üzrə danışıqlarda heç bir nəticə əldə edə bilməməsi səbəbindən danışıqlar nəticəsiz qaldı. Qəzet yazır ki, Ermənistan Dağlıq Qarabağdan başqa Azərbaycanın bu regionuna bitişik daha 7 rayonunu işğal altında saxlayır: "Yüksək rütbəli Türkiyə rəsmisi "Todays Zaman”a deyib ki, Türkiyə ermənistanla sərhədlərini Dağlıq Qarabağa görə yox, onun ətrafında olan rayonların da işğal edilməsinə görə bağlayıb. Azərbaycan bildirib ki, İrəvan Dağlıq Qarabağ bitişik 7 rayondan 5-ni azad etsə, Türkiyənin Ermənistanla sərhədlərini açmasına etiraz etməyəcək. İrəvan da bildirib ki, 5 rayondan qüvvələrini geri çəkə bilər".

Qeyd edək ki, bölgədə maraqlı qüvvələr də Dağlıq Qarabağ münaqişəsinin sülh yolu ilə tənzimlənməsində maraqlı tərəf olduqularını bildirir. Məsələn, ABŞ-ın ATƏT-dəki səfiri Daniel Baer deyir: "Dağlıq Qarabağ münaqişəsinin hərbi yolla həlli yoxdur. Bu baxımdan prezidentlərin son iki ildə ilk dəfə keçirilən görüşü vacib addımdır. Biz şadıq ki, bu görüşdən sonra davamı gələcək - xarici işlər nazirlərinin görüşü üçün şans olacaq”. O bildirib ki, ölkəsi Minsk Qrupunu dəstəkləməyə davam edəcək: "Səfir Uorlik öz həmkarları ilə yorulmadan çalışır. Biz tərəflərin uzunmüddətli sülh axtarışına dəstək olan həmsədrləri dəstəkləməyə davam edəcəyik. İranla bağlı razılıq əldə olunursa, nədən Dağlıq-Qarabağ münaqişəsində sülhə nail olunmasın?”.

Onu da bildirək ki, bu məsəldə Azərbaycanın mövqeyi birəmnalıdır: Ermənistan işğal altında olan bütün ərazilərdən öz silahlı qüvvələrini çıxarmalı, zəbt edilmiş əraziləri geri qaytarmalıdır.

Səməd CƏFƏROV

Mövqe. - 2013.- 29 noyabr.- S.8.