Sloveniyada Nizami Gəncəvinin və Mehdi Hüseynzadənin abidələri ucaldılacaq

Sloveniyanın paytaxtı Lyublyana şəhərində dahi Azərbaycan şairi Nizami Gəncəvinin və əfsanəvi partizan və qəhrəman Mehdi Hüseynzadənin abidələrinin ucaldılması ilə bağlı qərar qəbul olunub. Movqe.az Trend-ə istinadən xəbər verir ki, bununla bağlı məlumatı Azərbaycanın Sloveniyadakı müvəqqəti işlər vəkili Azər Xudiyevlə görüşü zamanı Lyublyana şəhərinin meri Zoran Yankoviç verib.Son illər Azərbaycanla Sloveniya arasında iqtisadi, siyasi, elmi, mədəni əlaqələrin durmadan inkişaf etdiyini vurğulayan şəhər meri 2013-cü ildə Azərbaycana səfər etdiyini və ölkəmizdə aparılan sosial, qlobal iqtisadi layihələrlə yaxından tanış olduğunu vurğulayıb.Azərbaycan dövlət müstəqilliyini əldə etdikdən sonra xalqımızın bütün çətinliklərə sinə gərərək öz maddi və mənəvi dəyərlərinin sahibinə çevrildiyini vurğulayan Zoran Yankoviç dünya şöhrətli siyasi xadim Heydər Əliyevin apardığı müdrik və uzaqgörən siyasət nəticəsində Azərbaycanın bölgədə lider, beynəlxalq arenada böyük nüfuz sahibinə çevrilməsinin qürurverici hal olduğunu bildirib.O, Azərbaycana səfəri çərçivəsində Bakı ilə Sloveniya arasında qardaşlaşmış şəhərlər haqqında müqavilə imzalandığını, xüsusən də Prezident İlham Əliyevin Sloveniyalı qonaqları qəbul edərək onlara son dərəcə isti və doğma münasibət bəsləməsini xoş xatirələrlə yad edib.Mer Azərbaycanın dahi şairi Nizami Gəncəvinin və əfsanəvi partizan Mehdi Hüseynzadənin abidələrinin ucaldılması ilə bağlı Lyublyana şəhər şurasının qəbul etdiyi qərarı müvəqqəti işlər vəkili A.Xudiyevə təqdim edib.Sloveniyada ilk dəfə olaraq Azərbaycanın dahi şəxsiyyətlərinin abidələrinin ucaldılması haqqında çıxarılan qərara görə şəhər merinə minnətdarlığını bildirən Azərbaycanın Sloveniyadakı müvəqqəti işlər vəkili A.Xudiyev bu il Azərbaycanla Sloveniya arasında diplomatik əlaqələrin yaradılmasının 25-ci ildönümü münasibəti ilə bir sıra silsilə tədbirlərin həyata keçiriləcəyini vurğulayıb.Lyublyana şəhər meriyasının belə bir ərəfədə çıxardığı qərarın ölkələrimiz arasındakı iqtisadi, siyasi, elmi, mədəni əlaqələrin inkişafına təkan verəcəyini qeyd edib. Görüş zamanı bildirilib ki, hər iki abidənin açılışı bu ilin may-iyun aylarına planlaşdırılır. Layihəyə əsasən, Nizami Gəncəvinin memorial abidəsinin yanında dahi şairin əsərlərini özündə əks etdirən elektron lövhənin quraşdırılması da nəzərdə tutulub.Görüşdə iştirak edən Ukraynanın xalq rəssamı, tanınmış memar və heykəltaraş Seyfəddin Qurbanov meriyanın memarlarını hazırladığı hər iki abidənin ilkin eskizləri ilə tanış edib. Azərbaycanın və Sloveniyanın milli memarlıq üslubları nəzərə alinaraq tanımış heykəltaraşın təqdim etdiyi 5 eskiz variantından 2-si yerli memarlar tərəfindən bəyənilib və qəbul olunub.Qeyd edək ki, Ukraynanın xalq rəssamı, heykəltaraş S.Qurbanov Ukraynanın müxtəlif vilayət və şəhərlərində xeyli sayda heykəl və memarlıq abidələrinin müəllifidir. İrpen şəhərindəki akademik Zərifə Əliyevanın, Kiyev şəhərindəki Səməd Vurğunun, Azərbaycanın Ukraynadakı səfirliyinin içərisindəki dahi öndər Heydər Əliyevin büstlərinin müəllifi də S.Qurbanovdur.

Mövqe.- 2016.-16 yanvar.- S.10