Azərbaycana üz tutan rus turistlərin sayı artır

Natiq Cəfərli: “Rusiya vətəndaşlarının istirahət zamanı nə istədiklərini bilirik” Vüqar Bayramov: “Bu hal rusların turizm ölkəsi kimi Azərbaycana marağının artdığından xəbər verir”

Rusiyanın "Red Wings Airlines" aviaşirkəti Azərbaycana uçuşların həyata keçirilməsi üçün icazə alıb. bu barədə Rusiyanın Federal Hava Nəqliyyatı Agentliyinin protokoluna istinadən məlumat verir. Protokolda qeyd olunur ki, aviaşirkət hər biri həftədə iki dəfə olmaqla, Voronej-Bakı, Krasnoyarsk-Bakı və Ufa-Bakı reysləri üzrə uçuşlar həyata keçirə bilər.

Ümumiyyətlə, Rusiyadan Azərbaycana açılan aviareyslərin sayının son zamanlar xeyli artdığı müşahidə edilir. Bu hal nədən qaynaqlanır və belə vəziyyətdə daha çox turistin Azərbaycana gəlişini gözləmək olarmı?

İqtisadçı-ekspert Natiq Cəfərlinin fikrincə, Azərbaycana Rusiyadan gələn aviareyslərin sayının artması bu ölkə sakinlərinin bölgəmizə olan turist səfərlərinin çoxalmasının nəticəsidir: “Rusiyanın son zamanlar ətraf ölkələr, o cümlədən keçmiş postsovet məkanına turistik nöqteyi-nəzərindən marağı artıb. Rusiyanın statistik göstəriciləri də onu deməyə əsas verir ki, ən azı son iki ildə keçmiş postsovet respublikalarına səfər edən rusiyalıların sayında ötən illərə nisbətən azı iki dəfə çoxalıb. Rusiyadan Gürcüstan, Azərbaycan, Baltikyanı ölkələr və Moldovaya turist səfərləri artıb. Bunun səbəbi Ukrayna ilə gərginləşən münasibətlər fonunda bu ölkəyə Rusiyadan olan səfərlərin, Türkiyə ilə yaşanan problem fonunda həmin istiqamətə, habelə Tunislə Misirə olan turist axınlarının azalması ilə bağlı oldu. Bu fonda rusiyalı turistlər alternativ marşurutlar seçmək yolunu tutublar ki, həmin marşurutlardan biri də məhz Azərbaycandır. Mətbəxinə, dənizinə, burada Rusiya vətəndaşlarının burada sərbəst şəkildə əlaqə qurmaq imkanlarına görə getdikcə Azərbaycan istiqaməti şimaldan olan əhali üçün populyar xarakter almağa başlayır. Rusiyadan xaricə ildə təxminən 15-16 milyona qədər ölkə vətəndaşı səfər edir. Onun azı bir milyonunu Azərbaycana cəlb edə bilsək, ölkəmizə turizmdən gələn məbləğin kifayət qədər artmasına nail ola bilərik. Bu da mümkündür, Çünki Rusiya vətəndaşlarının istirahət zamanı nə istədiklərini bilirik. Bu istədiklərini Azərbaycanda təmin etmək, onlara dincəlmələri üçün normal şərait yaratmaq, illərdir öyrəşdikləri dincəlmə üsullarını tətbiq etmək mümkündür. Bu səbəbdən Rusiyadan ölkəmizə əlavə aviareyslərin açılması Azərbaycan iqtisadiyyatı, infrastrukturu üçün kifayət qədər pozitiv bir məqamdır”.

İqtisadi və Sosial İnkişaf Mərkəzinin rəhbəri Vüqar Bayramov da vurğuladı ki, son iki ildə rusların turizm ölkəsi olaraq Azərbaycana marağı artıb. Bu vəziyyət isə öz növbəsində aviareyslərin də sayının çoxalmasına gətirib çıxarır: “Rusiyadan ölkəmizə daha çox turistin gəlməsilə bağlı olaraq son dövrlər şimaldan Azərbaycana edilən aviareyslərin sayında artmlar müşahidə edilir. Hansı ki, artan bu reyslərin bir qismi də mövsümü reyslərdir. Yəni, turizm dövrü ilə bağlı yaradılan reyslərdir. Bu baxımdan Rusiyadan ölkəmizə gələn turistlərin sayının çoxalması əslində ondan xəbər verir ki, proses birbaşa həmin ölkə turistlərinin Azərbaycana marağının artması ilə bağlıdır.

Yəni, həmin turistlərin marağı artdığı üçün nəticə etibarı ilə proses aviareyslərin sayının çoxalmasına rəvac verib. Turizmin inkişafında bilirsiniz ki, reyslər çox vacibdir. Çünki birbaşa reyslərin sayının artması həmin ölkələrin turizmə marağının artmasına da gətirib çıxarır. Əvvəlki illərdə də Rusiyadan ölkəmizə gələn turistlərin sayı çox olub. Amma onların da bir qismi Rusiya vətəndaşı olan azərbaycanlılar idi. Bununla belə son iki ildə Rusiyadan ölkəmizə gələnlərin sayında artımlar var ki, bu da rusların turizm ölkəsi kimi Azərbaycana marağının artdığından xəbər verir”.

Rüfət NADİROĞLU

Mövqe.- 2017.-4 iyul.- S.11.