"Zamanla estradanın yox, məhz muğam

sənətinin xasiyyətimə uyğun olduğunu anladım..."

"Müsabiqə boyu ən böyük dəstəyi ustadım Mənsum İbrahimov verib" - Günay İmamverdiyeva

Bu səsi tamaşaçılar ilk dəfə 2008 - ci ildə dinlədilər. Səhnədəki kövrəkliyi, utancaqlığı, zərifliyi və ən əsası da gözəl səsi və repertuar seçimindəki zövqü onu yaddaşlara həkk etdi. İllər sonra tanrı bizlərə yenidən o səsi duymağa fürsət verdi. Bu dəfə biz onun sənətinə nə qədər ciddi yanaşdığını hiss etdik. Həmsöhbətimiz 2011 - ci ildə keçirilən Televiziya Muğam müsabiqəsinin qaliblərindən biri olan Günay İmamverdiyevadı.

- Muğama heç vaxt bu günkü qədər diqqət göstərilməyib. Muğam bu gün dövlətimizin simvolu olmaqla bərabər, Azərbaycanı beynəlxalq arenalarda təmsil gücünə sahibdi. Bu barədə nə deyə ilərsiniz?

- Muğama olan bu günkü diqqəti və qayğını məndən öncə bütün sənətkarlarımız qeyd edirlər. Bu günkü gündə muğamı sevən gənc istedadlar üçün hər cür şərait yaradılır. Ən əsası da bizlər üçün bu şəraiti dövlətimiz yaradır. Qeyd edim ki, ustadlarımızın dövründə olan çətinliklərin heç birini biz - müsabiqədə iştirak edən gənc xanəndələr yaşamadıq. Təbii ki, bu Heydər Əliyev Fondunun prezidenti Mehriban Xanım Əliyevanın əməyi və diqqəti sayəsində oldu. Hər il dövlət televiziyası və Heydər Əliyev Fondunun birgə layihəsi olan Muğam müsabiqəsi, Beynəlxalq Muğam müsabiqəsi bir çox gənclərdə muğama qarşı sevgi yaratdı. Bu müsabiqələrdə yaş həddi nəzərə alınaraq, 30 yaşa qədər ifaçılar iştirak edə bilərlər. Xüsusilə, onu qeyd edim ki, bütün bu müsabiqələrdə, dövlət tədbirlərində, xarici səfərlərdə gənclərimiz təmənnasız şəkildə iştirak edirlər.

Heydər Əliyev Fondu başda olmaqla, Dövlət televiziyası, Mədəniyyət və Turizm Nazirliyi, Mədəniyyət Dostları Fondu yaxın günlərdə 6 - cı Muğam Müsabiqəsini həyata keçirəcəklər.

- Səs imkanlarınız sizə müasir musiqimizdə də geniş fəaliyyətinizə imkan verir. Buna baxmayaraq, siz muğamı seçdiniz. Öyrənilməsi illərlə zaman alan və bitməyən muğamı seçmək sizə çətin olmadı ki?

- Evimizdə hər zaman muğamın sədalarını eşitmişəm. Bir Qarabağlı - Şuşalı kimi özümü muğamda görürdüm. Bu bir az da bəlkə ailə mühitindən asılıdı. Atamın çox gözəl səsi var. Xanəndə olamasa da muğamlarımızı gözəl ifa edir. Təbii ki, onun dövründə muğama bu qədər qayğı olmadığından, o bu sənəti seçməyib. Buna baxmayaraq, evimizdə hər zaman muğam haqqında danışılıb, muğam dinlənilib. Muğamla birgə böyüməyim, məndə bu sənətə qarşı maraq, sevgi yaratdı. Sizin dediyiniz kimi estrada da daha tez uğur qazana bilərdim. Amma, zamanla estradanın yox, məhz muğam sənətinin xasiyyətimə uyğun olduğunu anladım...

- 2011 - ci ildə keçirilən Muğam müsabiqəsinin qaliblərindən birisiniz. Müsabiqəyə yolunuz necə düşdü?

- Profesional səhnəyə ilk dəfə 2008 - ci ildə Atv kanalında yayımlanan "Xalq ulduzu" yarışması ilə gəlmişəm. Aybəniz Haşımova, Tahir Əkbər, Aygün Bayramova, Möhlət Müslümov kimi sənətkarlar hər həftə ifalarımıza qiymət verirdilər. Bu müsabiqədə mahnı janrını öyrəndim.

Daha sonra 2011 -ci ildə Heydər Əliyev Fondun və Dövlət televiziyasının birgə layihəsi olan 3 - cü Muğam müsabiqəsində iştirak etdim. 17 həftə müsabiqədə iştirak etdim. 1 xalla finalda iştirak edə bilmədim. Lakin buna baxmayaraq, qaliblərin cərgəsində oldum.Müsabiqə boyu mənə ən böyük dəstəyi ustadım Mənsum İbrahimov verib. Artıq on ildən çoxdur ki, Mənsum müəllimdən bu sənətin sirrlərini öyrənirəm. 2005 - 2009 -cu ildə Bakı Humanitar kollecində, 2009 - 2013- cü illərdə Milli Konservatoriyada, daha sonra isə Konservatoriyanın magistrında Mənsum müəllimdən təhsil almışam. Bütün bu yolları dəyərli ustadım, gözəl insan, tələbələrinin mənəvi atası olan Mənsum İbrahimovla birgə addımlamışam.

-Ustadların ifa etdikləri muğamları, təsnifləri yenidən ifa eləmək, yaddaşlarda ömürlük həkk olan musiqiləri yenidən canlandırmaq, ifa eləmək və ən əsası sevdirmək çətin deyil?

- Bütün bu ifalarımın hamının sevdiyini deyə bilmərəm. Mən öz sevdiyim muğamları, təsnifləri, musiqiləri ifa edirəm. Əgər dinləyicilər sənətkarlarımızın ifalarında sevdikləri musiqinin mənim ifamda da sevirlərsə, mən buna görə çox xoşbəxt olaram.

Bizim sənət elədir ki, biz kənara çıxa bilmirik. Onların ifa etdiklərini ifa edirik. Və bu ifalarımızın bəyənilməsi, qəbuledilməsi üçün dəfələrlə ustadlarımızın ifalarına qulaq asıram.

- Çox zaman etiraf edilməsə də, hər kəs sənətdə ilk addımlarını atanda özünü hansısa sənətkara bənzətmək istəyir, yaxud həmin sənətkar onda sənətə maraq yaradır. Sizdə bu marağı, həvəsi hansı sənətkar yaratdı?

- Evdə çox vaxt Xan Şuşinskinin, Arif Babayevin, Mənsum İbrahimovun ifaları dinlənilirdi. Atamın Xan əmi ilə bağlı müşahidələri və hər dəfə bunun maraqla danışması məndə qəribə hisslər yaradırdı və eyni zamanda qəlbimdə muğama qarşı böyük sevgi formalaşırdı.

Bu gün də öyrənirəm. Bizim sənət şifahi bir sənətdi. Ona görə bütün sənətkarlarımızın ifalarına qulaq asıram ki, hərəsindən bir zərrə öyrənim. Mənsum İbrahimovla yanaşı, Aygün Bayramovanın ifalarına çox qulaq asıram. Aygün xanım istər bəstəkar mahnılarını, istərsə də muğamlarımızı mükəmməl ifa edir. Kumir olaraq bu sənətkarları çox sevirəm.

- Bütün ifaçıların ən böyük arzusu Leylini oxumaqdı. Sizdə necə bu arzu var?

- Bütün ifaçılarda olduğu kimi, təbii ki, məndə də bu istək var. Cənab prezidentimiz İlham Əliyev və xanımı Mehriban Əliyevanın iştirakı ilə ötən il Bakı Marionet Teatrının açılışı oldu. Açılış zamanı rejissor Tərlan Qorçunun 14 pərdəlik "Leyli və Məcnun" muğam operasının marionet tamaşası təqdim edildi. Tamaşa zamanı mən Leyli obrazını, dəyərli ustadım Mənsum İbrahimov isə Məcnun obrazını səsləndirdi. Kuklalar tamaşanı canlandırdılar, biz isə ifa etdik. Çox gözəl tamaşa alındı. Mənsum müəllim özü də qeyd etdi ki, bir çox tələbələri ilə "Leyli və Məcnun" - da tərəf müqabili olub. Lakin, səsləndirmə halında ilk dəfə mənimlə birgə oldu. Kuklalar o qədər canlı və içdən oynadılırdı ki...

- Efirlərdə gec - gec görünməyiniz səbəbi tənbəllikdi, ya dəvətlərlə bağlıdı?

- Deməzdim, tənbəlliklə bağlıdı. Bir məsəl var ki, çağrılan yerdən ar eləmə, çağrılmayan yeri dar eləmə. Əgər çağrılıramsa, dəvət olunuramsa ora gedirəm. Tənbəl olsam, Dövlət kanalının, İctimai kanalın verlişlərinə, çəkilişlərinə də getmərəm.

Təbii ki, hər çağrılan yerə də getmək olmur.

- Hər zaman sənətdə istər ustadlar, istərsə də gənclər arasında müəyyən narazılıqlar, problemlər olur. Maraqlıdı, indi gənc nəsil muğam ifaçıları aralarındakı anlaşılmazlığı necə həll edirlər?

- Əgər bir insanla xasiyyətcə heç bir uyğunluğum yoxdusa, onunla bir ortamda olmamağa çalışıram, yoldaşlıq, dostluq əlaqələri qurmura. Yəni, bütün hallarda kənar oluram o insandan. Dostluq münasibətində olduğum xanəndələr arasında sənətlə bağlı ciddi problem yaşamamışam. Əgər hər - hansısa problem olarsa, öz aramızda həll edirik.

- Gələcək planlarınızda nələr gözlənilir?

- Hal - hazırda tarzən Rövşən Qurbanovun ansamblı ilə iki mahnı üzərində çalışırıq. Bu aralar trio halında çox ifalarımız oldu. Ona görə fərqlilik olsun deyə, bu dəfə mahnı janrı üzərində işləyirik.

Xarici ölkələrə dəvət olarsa, təbii ki, sevə - sevə dövlətimizi təmsil etməyə hazırıq. Necə ki, 2015 - ci ildə Milan Expo sərgisində, 2014 - cü ildə Fransada Azərbaycan şəhərciyinin açılışında, Budapeştdəki müsabiqədə və bir çox xarici ölkələrədə Azərbaycanımızı uğula təmsil etməyə çalışmışam.

- Sosial şəbəkələrdə bir o qədər də aktivliyiniz hiss olunmur. Yaşıdlarınız sosial şəbəkələrədən sizə, sənətinizə münasibəti necədi, dinləyicilərinizlə sosial şəbəkə vaistəsilə əlaqə yarada bilirsinizmi?

- Facebook və instagramda səhifələrim var. Amma tanımadığım insanların məni izləməsini əngəlləyirəm. Bu səhifələrdə şəxsi fotolorımı, videolarımı paylaşıram. Şəxsi profol kimi istifadə edirəm. Çalışıram az insanlar izləsin.

- Hansı muğamları sevirsiniz?

- Muğamlardan ən çox Segahı, Bayatı - Şirazı sevirəm. Segahı sevməmə səbəb, yəqin ki, Qarabağlı olmamdı (gülür). Bayatı - Şiraz muğamlarımızın gəlinidi. Çox həzindi, dinlədikcə, ifa elədikcə insan yaxşı mənada tərki - dünya olur.

- Sonda pedoqoji və televiziyadakı fəaliyyətinizdən danışmağınızı istəyirəm...

- 2011- ci ildə müsabiqə bitdikdən sonra qalib ifaçıları Dövlət kanalında solist kimi çalışmağa təklif olundu. Artıq 5 ildi ki, Ana kanalımızda çalışıram. Məhz dövlət kanalımızın dəstəyi ilə trio, orkestrla birgə ifalarımız, dəstgah ifalarımız lentə alındı. Lentə alınan ifalar kanalın "Qızıl fond" - unda saxlanılır. Mənim ifamda "Mirzə Hüseyn" dəstgahı və "Şahnaz" fondda saxlanılır.

2011 - ci ildən də Şuşa Qala dərəsi uşaq musiqi məktəbində fəaliyyətə başlamışam. Burada uşaqlarla birgə həm örənirəm, həm də öyrətməyə çalışıram. Qeyd edim ki, tələbələrimdən Fatimə Hüseynova 2015 - ci il Televiziya Muğam müsabiqəsində iştirak etdi. 5 - 6 həftə müsabiqədə iştirak etdi. Düşünürəm ki, bu həm mənim, həm də tələbəmin uğurudu.

NigarNigar

Olaylar.- 2017.- 21 fevral.- S.12.