Yaşıl donlu, al duvaqlı,

mavi gözlü  sevdiyim...

 

AZƏRBAYCAN adlı bir gözəli sevmək, VƏTƏN adlı bir varlığa aşiq olmaq yəqin ki, çoxumuzun qismətində var. Bu duyğu ilahi eşqə bərabər Alın Yazısıdı. Doğulduğun torpağa vurulmaq, onu canına-qanına hopdurmaq İlahidən gələn bir vergidir.Tanrı insanı yaradanda bu sevgidən ayrıca pay verib, onu müqəddəsləşdirib.

 

Gözümü ilk dəfə Azərbaycanda açdım, qulağım anamın şirin - şəkər laylasını Azərbaycan dilində  eşitdi, yeriməyə - yürüməyə  Azərbaycan torpağında başladım. Və bu başlanğıclar məni böyütdü. Mənimlə bərabər  Tarının bəxş etdiyi  Vətən sevgisiböyüdü, Azərbaycan  eşqi könlümdə yuva qurdu. Bu yuvanı kimsə dağıda bilmədi,  kimsə ora əl uzadıb nəyisə dəyişmək gücü tapmadı. Çünki bu YUVAnın kərpici namus, əxlaq, şərəf və qeyrətdən hazırlanıb. Bu hisslər Azərbaycan sevgisinin, Vətən eşqinin  çox böyük atributları, 28 may isə gözqamaşdıran, ən qiymətli aksesuarıdı.

Niyə məhz 28 may? 100 il əvvəl məhz bu gün Azərbaycan adlı məmləkət üç rəngli bayrağına büründü. Məhz o gün  Azərbaycanın şərəf və ləyaqət ölçüsünü özündə ehtiva  edən bir tarix yarandı. Məhz o gün  mavi gözlü Azərbaycan bir boy ucaldı, daha da gözəlləşdi, dünyaya meydan oxudu - əyninə geydiyi yaşıl donu,  başına qoyduğu al  duvağı ilə. Yaşıl donlu Azərbaycan günə çıxdı, başındakı  al duvağı onun  mavi gözlərinin baxışını dəyişdi. O vaxta kimi əsarətdə yaşayan, işğalda inləyən Azərbaycan "Cümhuriyyət" yarlığı ilə  azadlığa çıxdı. Məhz həmin gün doğuldu Azərbaycan Cümhuriyyəti.

Doğuşun mübarək, sevgili Cümhuriyyət!

Gəlişin mübarək,  yaşıl donlu, al duvaqlı, mavi gözlü, sevgilim!

 

***

 

Könlümün sevgili məhbubu mənim

Vətənimdir, vətənimdir, vətənim... (c)

 

Vətən Anamızdı, eləcə də Anamız Vətəndi. Bu iki varlığı bir-birindən ayırmaq olmaz,  daha doğrusu, mümkün deyil. Ananı sevməmək olarmı? Olmaz. Vətən də elədi. Onu sevməmək üçün hansı əsas tapılmalıdır ki, həmin eybəcər hissi daşıya biləsən? Sevgizis yaşamaq çaylaq daşına bənzəyir. Suyu azalmış  çayın  ortasındakı daşın üstünü gün qızdırır, altını su soyudur. O daşı götürəndə üst tərəfi əlini yandırır, o biri tərəfi  üşüdür, göynədir. Vətən sevgisindən məhrum olanlar həmin buz soyuqluğunun daşıyıcılarıdır. Kİ... onlar daim göynəyirlər, titrəyirlər. Hansı ana övladının pis gününü istəyər? Heç bir ana bunu arzulamaz, o, övladının ağır gününü görməmək üçün  gözünü verməyə hazırdı. Ana  doqquz ay bətnində  gəzdirdiyi övladlarını bir-birindən ayırmır, birini o birindən üstün tutmur. Vətən də belədi, sevgisi çoxşaxəlidi, Günəş istisi qədər boldu, tükənməzdi. Qoynunda bəslədiyi bütün millətlərin nümayəndələrinə eyni qayğını göstərir, eyni sevgini paylayır.

Dünyada yaşayan xalqların 200-dən bir qədər çox dövləti var. Hər  dövlət özünün vətən missiyasını yerinə yetirir. Amma Azərbaycan dövlətinin Vətən missiyasını müşaiyət edən vətəndaş sevgisi, oğul-qız məhəbbəti  digərlərindən fərqlənir. Hər  dövlətin Vətən adı ilə doğuldüğü gün var və hər  millət öz vətənini sevir. Biz  sevirik. Mən isə daha fərqli sevirəm. Onu qarşılıqsız  sevirəm, təmənnasız aşiqəm, heçummadan vurğunam 100 il əvvəlki Cümhuriyyətin bu günkü Azərbaycan adlı məmləkətinə. O mənim yaşıl donlu, al duvaqlı, mavi gözlü  sevgilimdi.

 

      ***

 

Vətən  canlı tarixdi...

Düz 100 il əvvəl Azərbaycanı canı-qanı qədər sevən, onun yolunda  fədakarlıq edən insanlar gələcək xoş günlərə  hesablanmış müstəqil Azərbaycan dövlətini qurdular. Düz 100 il əvvəl Azərbaycanın müstəqil bayrağı, gerbi, himni dünya dövlətlərinin  eyni atributları sırasında  yer aldı. Üçrəngli bayrağıımız təkcə Azərbaycan səmasında deyil, həm də dünyanın  başqa dövlətlərinin ərazisində öz əzəməti ilə dalğalandı.

100 il əvvəlin 28 May günü əvvəlki və sonrakı illərin eyni günü ilə çox fərqlənir. Bir zamanlar təqvimdə  sıradan bir gün gün kimi yazılan 28 May  tarixi 1918-ci ildən başlayaraq  23 ay şanlı tarix kimi qeyd olundu. Bu 23 ayda Azərbaycan müstəqilliyinin əlindən tutdu, onu buraxmamağa çalışdı.

28 May tarixi Azərbaycan dovlətciliyinin bərpası, xalqımızın istiqlalına qovuşması, oz əzəli torpaqlarına sahib durduğu tarixdir. Dunya dovlətləri sırasında Azərbaycan adlı məmləkət yarandı, onun paytaxtı, ərazisi, sərhədləri elan edildi, bu dovlətin sahibinin azərbaycanlılar olduğu bildirildi. İnsan sahib olduğunun dəyərini biləndə onun  yeri ucalarda olur. Mənim sevgili Cümhuriyyətim 23 ay yaşasa da izi könüllərda qaldı.  Zaman-zaman bir qəlbdən digərinə ötürüldü.

28 May tarixi Azərbaycan dovlətciliyinin bərpası, xalqımızın istiqlalına qovuşması, oz əzəli torpaqlarına sahib durduğu tarixdir. Dunyanın dovlətləri, millətləri sırasında Azərbaycan adlı məmləkət yarandı, onun paytaxtı, ərazisi, sərhədləri elan edildi, bu dovlətin sahibinin azərbaycanlılar olduğu bildirildi. İnsan sahib olduğunun dəyərini biləndə onun  yeri ucalarda olur. Azərbaycan Cümhuriyyəti 23 ay yaşasa da yeri könüllərda yaşadı. Zaman-zaman bir qəlbdən digərinə ötürüldü.

Həmin tarixin yaradıldığı vaxtdan 100 il keçib. 100 illik tarixin mübarək, sevgili Cümhuriyyətim!

 

***

 

Bu gün Cümhuriyyətin 100 yaşı tamam olur...

Bu gün yaşıl donlu, al duvaqlı, mavi gözlü  sevgilimin yubiley günüdür. Bu yubileyin  öz mistikası var. Yüz ildi bu günü  gözləyən  sevgili Cümhuriyyətim özünün şərəfi, ləyaqəti və qüruru ilə Cəfər Cabbarlının Vətən  eşqini bu misrada daşıyır:

 

Qollarilə türk ellərin bütün qucmaq istiyor,

Yaşıl donlu, mavi gözlü, al duvaqlı sevdiyim.

 

Züleyxa NADİR

 

Olaylar.- 2018.- 26-29 may.- S.5.