AYAĞA DUR, AZƏRBAYCAN!

Təhməzov Cavid Əvəz oğlu Bərdə rayon sakini I Qarabağ müharibəsi qazisi Təhməzov Əvəz Təhməz oğlunun ailəsində 1994-cü il iyun ayının 25-i dünyaya gəlib. Çətin həyat yolu keçib. Əvvəllər ana himayəsində olsa da sonralar atası da oğlunun qayğısına qalıb. Züleyxa xanım oğlu böyüyənə qədər necə deyərlər gözü ilə od götürüb.

-O, mənim hər şeyim idi, -deyir şəhid anası Züleyxa xanım. -Köməkçim idi, məsləhət yerim idi, arxam, dayağımdı. Yoxluğu qəlbimdə elə bir sağalmaz yara açıb ki, hər gün sızıldayır.

Cavid orta təhsilini Yevlax şəhər Q. Məhərrəmov adına 4 nömrəli tam orta məktəbdə almışdır. 2012-ci ildə həqiqi hərbi xidmətə çağrılıb və Naxçıvanda "N" hərbi hissədə kəşfiyyatçı kimi hərbi xidmətə başlayıb. 2014-cü ildə hərbi xidmətini başa vurduqdan sonra 2016-cı ildə yenidən müddətdən artıq həqiqi hərbi qulluqçu, xüsusi təyinatlı kəşfiyyatçı minaaxtaran kimi davam etməyə başlayıb.

Şəhidimiz ailəli olub və 2 oğul övladı Vətənə əmanət qaldı. Ümid və Cəsur. Çətin uşaqlıq dövrü keçsə də Cavid övladlarını çox sevən bir ata olub.

Xidmət müddətində Cavid özünü təsdiqləyə bilmişdi. Onu yaxşı kəşfiyyatçı kimi dəyərləndirirdilər. Bir dəfə anası Züleyxa xanıma demişdi: Vətəni mənim kimi oğullar qorumalıdır. Özü də fikir eləməyin, mən ölərəmsə, dövlətim mənim ailəmə də, uşaqlarıma da sahib çıxar, deyib.

Cavid 2020-ci il 12 iyulda olan Tovuz döyüşlərində də iştirak edib.

Bu o zaman idi ki, hər kəs artıq qələbəyə, zəfərə susamışdı. Ünlü şair Məmməd Araz həyəcan təbili çalırdı:

Nə yatmısan, qoca vulkan, səninləyəm!

Ayağa dur, Azərbaycan, səninləyəm!

Səndən qeyri

biz hər şeyi bölə billik!

Səndən qeyri

biz hamımız ölə billik!

Bu o zaman idi ki, Ali Baş Komandanımız son qərarını vermişdi: Azərbaycan nəyin bahasına olursa-olsun, qalib gəlməlidir.

Vətən müharibəsi başlşayan gündən isə döyüşlərə qatılıb. Suqovuşanın, Ağdərə, Murov, Talış yüksəkliklərinin və digər ərazilərin alınmasında yaxından iştirak edib. 1 oktyabr 2020-ci il tarixində Suqovuşanın işğaldan azad olunması uğrunda gedən döyüşlərdə qəhramanlıqla şəhid olub. Oktyabrın 10 da isə Yevlax şəhərində şəhidlər xiyabanında dəfn olunub.

Onu tanıyan hər kəs barəsində çox mehriban, səmimi və mərd biriydi, deyir. Ana heç qəbul edə bilmir Cavidin yoxluğunu.

-Sən bu yeni dövrü görməsən də daim yaddaşlarda yaşayacaq, görülən işlərdə müharibədə qazandığın qələbələrin izləri olacaq, Cavid balam,-söyləyir atası Əvəz kişi.

Məzarın nurla dolu olsun, şəhid Cavid, igid kəşfiyyatçı!

Təhməzov Cavid Əvəz oğlu ölümündən sonra Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin sərəncamı ilə "Vətən uğrunda", "Suqovuşanın azad olunmasına gözə" və "Cəsur döyüşçü" medalları ilə təltif olunmuşdur. Sonsuzadək ürəyimizdə yaşayacaqdır!

Əminə Yusifqızı

Olaylar.- 2021.- 8-14 oktyabr.- S.18.