Görən küçə varmı vüsal adında?

Görən küçə varmı vüsal adında?

Səni bu dünyada unutmaq çətin,

Sən mənim ruhumun əziz qonağı.

Ətrini saxlayır hər döngə, hər tin,

Gözümdə alışır lalə yanağın.

***

Nə yaxşı hər dərdə tabı tapmısan,

Bir üzü yolan da, yumşağın da var.

Deyirlər özünə babı tapmısan,

Deyirlər ailən, uşağın da var.

***

Ürəyim nə qaya, nə daş deyildi,

Bağçam da yoxuydu, sənə gül dərim.

Yaş o yaş deyildi, o yaş deyildi.

Mən sənin evinə elçi göndərim.

***

Bir doğma küçəmiz vardı, yadında?

Baxmazdıq, yağanda nə yağış, nə qar.

Görən küçə varmı vüsal adında?

Yoxdursa, qoysalar nə yaxşı olar.

06.10.2023

Kənddə görüş

Nə vaxtdı həsrəti qəlbimi sıxır,

Yenə yolum düşdü doğma kəndimə.

Uşaqkən keçdiyim hər yol, hər cığır,

Çoxdan gözləyirmiş məni sən demə.

***

Gözlərim dikilib meşəyə, dağa,

Qoymayım işimi gərək sabaha.

Gedirəm bacımı başa çıxmağa,

Qocalıb, adam da tanımır daha.

***

Üzlərə baxıram, qəm-kədər dolu,

Ağrıdıb özgənin azarı məni.

Köçüb gözlərimə qəbristan yolu,

Çağırdı anamın məzarı məni.

***

Ana, sənsizliyin sinəmi odlar,

Hanı qaladığın gur yanan ocaq?

Başıma yığışıb doğmalar, yadlar,

Tək səni axtarır gözlərim ancaq.

21.05.2021

Bircə gülüşlərin qalıb yadımda

Çay kimi ruhuma axmısan bəlkə,

Elə bil gözümdə huri-mələksən.

Payızda qarşıma çıxmısan, bəlkə,

Sən durna köçündən düşən lələksən.

***

Eləcə çəkildin duman-çən kimi,

Bilmədim incidin hansı söz üstə.

Kimdi səni sevən mən sevən kimi,

Qəlbimi istədin, dedim "baş üstə".

***

Sevgimiz üstündə əsə bilmədik,

Gecikdik ocağı qalamaq üçün.

Həsrətin ömründən kəsə bilmədik,

Vüsalın ömrünə calamaq üçün.

***

Tale qara gəlsə, heç vaxt ağ olmur,

Sən getdin, qırıldı qol-qanadım da.

Dəyişmisən, səni tanımaq olmur,

Bircə gülüşlərin qalıb yadımda.

12.10.2023

Hara qaçım ürəyimin əlindən...

İşıq saçır göydə Ayın yerinə,

Axıb gedir düzdə çayın yerinə.

Beş pay verir, bircə payın yerinə,

Hara qaçım ürəyimin əlindən?

***

Bazarında ziyanı çox xeyirdən,

Səxavətdi köhlənini səyirdən.

Heç bilmirsən nə göydədi, nə yerdə,

Hara qaçım ürəyimin əlindən?

***

Küsülüdü, nə vaxtdı göz-qaşımla,

Vuruşdadı, savaşdadı yaşımla.

Elə gün yox dalaşmasın başımla,

Hara qaçım ürəyimin əlindən?

***

Əzəl gündən bir qanadlı quş oldu,

Kövrək oldu, həzin oldu, boş oldu.

Bir də gördün ağlayana qoşuldu,

Hara qaçım ürəyimin əlindən?

***

Çiynin verib, bir yükü cəm çəkəndə,

Sızıldayıb, dilənçi qəm çəkəndə.

Danlamışam buluddan nəm çəkəndə,

Hara qaçım ürəyimin əlindən?

***

Sevgi dolu bir dünyadı, görən kim?

Bənövşədi, qızılgüldü, dərən kim?

Arzusunu, istəyini verən kim?

Hara qaçım ürəyimin əlindən?

09.10.2023

Mənim ürəyimi sərgiyə qoyun

Həyat əzəl gündən oyundu, oyun,

Üzə gülsələr də, yenə təksiniz.

Mənim ürəyimi sərgiyə qoyun,

Sevgiylə doludu, görəcəksiniz.

***

Yaxşının çiynində dayanıb dünya,

Yaxşını qoruyun hər an, demişəm.

Yatmışdı, deyəsən oyanıb dünya,

Yaxşıya ürəyim qurban demişəm.

***

Qanqala bənzəyir yaman adamlar,

Sevgini ömrümün himi bilmişəm.

Yoluma çox çıxıb duman dumanlar,

Hamını ürəyim kimi bilmişəm.

***

Qaldırın yaxşının şələsin bir az,

Qəlbi daş yanından kiriyib gedər.

Tələsin görməyə, tələsin bir az,

Bəlkə buz ürəklər əriyib gedər.

***

Həyat əzəl gündən oyundu, oyun,

Üzə gülsələr də, yenə təksiniz.

Mənim ürəyimi sərgiyə qoyun,

Sevgiylə doludu, görəcəksiniz.

07.10.2023

Dağda gecələyir Tanrı, görəsən?

Payızda yolunu salasan dağa,

Zirvənin başında qarı görəsən.

Gələ dağ balının ətri, qoxusu,

Ağac koğuşunda varı görəsən.

***

Yarğan da, məpə də gözəl görünə,

Çılpaq ağaclarda yüz əl görünə.

Hər yanda gözünə xəzəl görünə,

Dünyanın rəngini sarı görəsən.

***

Quş qonmaz qayadan bir qaş hellənə,

Şıdırğı yağışdan dərə sellənə.

Dərəyə baxanda, baş gicəllənə,

Dərəni bütöv yox, yarı görəsən.

***

Dayanıb yamacla, yamac döş-döşə,

Yada ərlər düşə, ərənlər düşə.

Qəlbindən bir duyğu kecə, ötüşə,

Dağda gecələyir Tanrı, görəsən?

15.10.2023

Fəxrəddin Teyyub

Olaylar.- 2023.- 20-26 oktyabr, №39.- S.23.