Dünyamalı
Vəliyev: “Biliklərə əsaslanan iqtisadiyyatı qurmayan,
insan kapitalını inkişaf etdirməyən dövlətlər
axırıncı yerlərdən birini tutacaqlar”
“İnsan kapitalının
formalaşması ilə bağlı elmi müzakirələr”
layihəsi çərçivəsində fikirlərini
öyrəndiyimiz alim Azərbaycan Universitetinin Ümumi
iqtisadiyyat kafedrasının müdiri, iqtisad elmləri namizədi
Dünyamalı Vəliyevdir.
- İnsan kapitalı anlayışı
altında nə başa düşülür?
- İnsan kapitalı anlayışı
altında insanın inkişafı üçün ona
yatırılan kapital başa düşülür. Bu, ayrıca termin kimi son
dövrlərin məhsuludur. Biz qlobal
iqtisadiyyata keçmişik və sözsüz ki, bazar
iqtisadiyyati yolunu seçmişik, bunun da əsasında insan
kapitalı dayanır. Əvvəllər
iqtisadiyyatın əsasını sərvət təşkil
edirdi. Bu gün isə sərvətin
olması əsas deyil və burada əsas insan
kapitalıdır. Müasir dövrdə o dövlətlər
inkişaf edir və tərəqqiyə nail olur ki, onlar insan
kapitalının inkişafına xüsusi diqqət
ayırırlar və müasir dövrün tələblərinə
uyğunlaşırlar.
- İnsan kapitalının formalaşması
istiqamətində aparılan siyasəti necə qiymətləndirirsiniz?
- Burada dövlətin apardığı siyasət
aydındır. Prezident
İlham Əliyevin “Neft kapitalını insan kapitalına
çevirməliyik” ifadəsi tez-tez işlədilir. Və
haqlı olaraq da işlədilir. İnsan kapitalının
inkişafı üçün çox işlər
görülür. Bu özünü təhsilin, səhiyyənin
inkişafında, gənclərin xarici dövlətlərin ən
tanınmış universitetlərinə göndərilməsində
göstərir. Bilirsiniz ki, ölkəmizdə çoxlu məktəblər
tikilir. Bu proseslərdə də insan kapitalının
inkişafı siyasəti özünü göstərir. Amma bu gün demək olmaz ki, bütün
problemlər həll olunub. Kifayət qədər problemlər var. Məsələn,
elə təkcə təhsilin problemlərinin içinə
daxil olsaq, orada kifayət qədər nöqsan tapa bilərik.
Biz təhsildə çox
uyğunlaşdırmalar aparmışıq,
çalışmışıq ki, təhsil sistemimizi Avropa təhsil
sisteminə uyğunlaşdıraq. Bunun
üçün biz Boloniya təhsil sisteminə
keçmişik. Lakin bununla bərabər
hələ də çətinliklərimiz və problemlərimiz
var.
- Biliklərə əsaslanan iqtisadiyyatı necə qurmaq
olar?
- Biliklərə əsaslanan iqtisadiyyatdan
danışmazdan əvvəl qeyd etmək lazımdır ki,
inkişaf etmək üçün iqtisadiyyatın amilləri
var: xammal, material, texnika və sair. Bunların da
yaranması üçün investisiya lazımdır. Burada investisiyalara, yatırımlara ehtiyac var. Bu,
iqtisadiyyatın maddi tərəfidir. Bir də
var biliklərə əsaslanan iqtisadiyyat. Müasir
iqtisadiyyat biliklərə əsaslanan iqtisadiyyatdır. İnformasiyaya əsaslandığına görə
buna “informasiya iqtisadiyyatı” da deyirlər. Bu isə dövrün tələbidir. Burada əsas amil yenə də deyim ki, sərvət,
xammal deyil. Məsələn, Yaponiyanın
heç nəyi yoxdur, heç bir təbii sərvəti
yoxdur, amma biliyə əsaslanan iqtisadiyyat yaradıb və
çox böyük sürətlə inkişaf edir. Çin də bu iqtisadiyyatı qəbul edib və eləcə
də digər inkişaf etmiş dövlətlər bu
yoldadır. Yenə də deyirəm, bu,
günümüzün tələbidir.
- Büdcədən ayrılan vəsaitin böyük
hissəsi təhsilə sərf olunur. İldən-ilə
də bu vəsait artır. Bu addımlar
ölkəmizdə insan kapitalını formalaşdıra bilərmi?
- Ümumiyyətlə, mən bunun pulla, manatla
ölçülməsinin tərəfdarı deyiləm. Ola
bilsin ki, təhsilə bir milyard və ya yarım milyard manat vəsait
qoyulsun və bunun daha çox səmərəsi olsun və ya
daha çox pul qoyulsun və lap az səmərə
olsun. Burada həmin vəsaitin xərclənməsinin
səmərəliliyindən söhbət getməlidir. Həmin o bir milyard manat necə istifadə olunacaq?
Bunun səmərəliliyinin
ölçüsü nədən ibarətdir? Təhsil sisteminin son nəticəsi bu gün bizi qane
edirmi? Bilirsiniz ki, qəbul imtahanları təzə
başa çatıb və hələ də müzakirələr
gedir. Məsələn, ən böyük problemlərdən
biri budur ki, abituriyentlər repetitorsuz ali məktəblərə
daxil ola bilmirlər. Bu artıq bizim təhsil
sisteminin səmərəliliyinin, büdcədən təhsilə
ayrılan pulların səmərəliliyinin göstəricisidir.
Deməli, ayrılan pullar kifayət qədər səmərəli
istifadə olunmayıb ki, bu uşaqlar təhsil müəssisələrində
təhsil alıb universitetə daxil ola
bilmirlər. Amma repetitorlara əlavə pul verərək
hazırlaşır və universitetə daxil olurlar.
- Xarici təhsil müəssisələrinə dövlət
hesabına gənclərimizin göndərilməsi və orada
təhsil almaları insan kapitalının inkişafına təsir
göstərəcəkmi?
- Əlbəttə, təsir göstərəcək. Bu çox lazımlı bir
şeydir. O zaman, 1980-ci illərdə ümummilli lider
Heydər Əliyevin Rusiya məktəblərinə təhsil
almaları üçün göndərdiyi tələbələr
indi cəmiyyətdə öz bəhrələrini verirlər.
Onlar indi cəmiyyətdə müəyyən
mövqe tutublar. Bizim dövlət proqramına əsasən
xarici dövlətlərin universitetlərinə göndərilən
beş min tələbə də orada təhsil
alıb gələndən sonra burada insan kapitalının
inkişafında böyük xidmətlər göstərəcəklər.
Onların çox böyük əhəmiyyəti
var. Məsələn, mən sizə Azərbaycan Universitetini
misal kimi gətirə bilərəm. Biz
çalışırıq ki, universitet çərçivəsində
səlahiyyətimiz daxilində Avropa və Amerikanın təhsil
sistemini tətbiq edək. Bu da nədən
ibarətdir. Biz ən azından orada
keçirilən dərsləri burada keçirik. Amma burada bir məqam da var ki, orada elə fənlər,
elə dərslər keçirilir ki, burada o dərsləri
keçmək olmur. Elə sahələr
var ki, o sahələrdə Azərbaycanda mütəxəssis
yoxdur. Burada əsas məsələ odur
ki, Avropa təhsil sisteminə formaca keçməyin heç
bir mənasi yoxdur. Biz məzmunca keçməliyik.
Orada hansı dərslər tədris olunursa, həmin
dərslər də burada keçilməlidir. O dərsləri
Avropadakı kimi keçməyə bizdə kadr yoxdur. Bu gün mənim rəhbərlik etdiyim Ümumi
iqtisadiyyat kafedrasının müəllim heyətinin
yarıdan çoxu Avropa və Amerikada təhsil almış
insanlardır. Onların köməyi
olmadan biz o sistemi burada tətbiq edə bilmərik.
- Bəs başqa dövlətlərin müəllimləri
bura gəlib tədris edə bilərmi?
- Onların müəllimləri bura gələrək
burada tədris etməzlər. Avropa və Amerika ölkələrində
universitedə və ya hər hansı bir tədris müəssisəsində
dərs deyən müəllimə altı-yeddi rəqəmli maaş verilir. Bunu burada tətbiq
etmək mümkünsüzdür. Burada
bir məqamı da qeyd etmək lazımdır ki, xaricə təhsil
almağa göndərilən tələbələr bura
qayıtdıqdan sonra işlə təmin olunmalıdırlar.
Əgər biz xaricdə təhsil almış şəxslərə
iş versək, onları lazımi yerlərdə işlə
təmin etsək, onda bizdə insan kapitalı inkişaf
etmiş olar. Burada onu da qeyd etmək
lazımdır ki, xaricə tələbə göndərmək
asandır, amma onları burada işlə təmin etmək
çətindir. Mən onu da bildirmək
istəyirəm ki, insan kapitalının inkişaf etdirilməsi
tamamilə yeni bir sahə və eyni zamanda yeni bir problemdir.
Hansı dövlət insan kapitalının
inkişaf etdirilməsinə, biliklərə əsaslanan
iqtisadiyyata əsaslanırsa, gələcək də elə
onlarındır. Biliklərə əsaslanan
iqtisadiyyatı qurmayan, insan kapitalını inkişaf etdirməyən
dövlətlər axırıncı yerlərdən birini tutacaqlar.
İnsan kapitalının inkişaf etdirilməsi,
biliyə əsaslanan iqtisadiyyatın qurulması təkcə
büdcədən vəsaitlərin ayrılması ilə
bitmir. Mən böyük həcmdə pul
ayrılmalarının tərəfdarı deyiləm. Mən onun tərəfdarıyam ki, həmin puldan səmərəli
istifadə olunsun. Təhsilin məzmununda səmərəlilik
olsun, biz Avropa, Amerika sistemini daha yaxşı formada tətbiq
edə bilək. Burada Avropa sisteminə
uyğun olaraq universitetlərə çoxlu imkanlar verilsin.
Bununla bağlı çoxlu işlər
görülməlidir. Gənclərin
yetişdirilməsi istiqamətində də işlər
görülməlidir. SSRİ
dövründə işlə təmin olunma var idi və
universiteti bitirənlərə təyinat verilirdi. Bu gün isə verilmir. Təbii
ki, bu, bazar iqtisadiyyatının tələbidir. Çünki burada tələbələr
arasında da rəqabət olmalıdır.
Əlimərdan Sultanov
Palitra.- 2010.- 15
oktyabr.- S. 6.