“Kitabxanamız şəhər sakinləri üçün bir növ mədəni mərkəz rolunu oynayır”

Layihə çərçivəsində növbəti müsahibimiz Səbail Rayon Mərkəzləşdirilmiş Kitabxana Sisteminin direktoru Nüşabə Ələkbərovadır:

- Səbail Rayon Mərkəzləşdirilmiş Kitabxana Sistemi bu rayonda yerləşən kitabxanaların bazasında yaradılıb. Bu qurum özündə Mərkəzi Kitabxana və 6 kitabxana filialını birləşdirir. Kitabxana 1924-cü ildə Bakı Xalq Maarif Şöbəsinin nəzdində yaradılıb. Özünəməxsus yaranma tarixi olan bu elm məbədi bu günə kimi uzun və çətin yol keçib, ənənələrini qoruyub saxlaya bilib. Fəaliyyəti dövründə kitab təbliğatını yaxşılaşdırmaq məqsədilə yeni iş üsullarından istifadə edib. Bu gün kitabxanada məlumatın toplanması və oxuculara çatdırılması, yeni texnologiyalardan istifadə və kitabxana proseslərinin avtomatlaşdırılması istiqamətində bir sıra işlər görülməkdədir. 2009-cu ilin fevral ayında İnformasiya Mərkəzinin açılması kitabxananın fəaliyyətində mühüm bir hadisə oldu. İnformasiya Mərkəzi ilə yanaşı kitabxananın saytı və elektron kataloq da istifadəçilərin ixtiyarına verilib. Hazırda kitabxanada Oxuculara xidmət (abonement və oxu zalı), Kitabişləmə və komplektləşdirmə, Metodika və biblioqrafiya, Elektron-informasiya, Kütləvi tədbirlərin təşkili şöbələri fəaliyyət göstərir. Kitab fondumuzda 200 minə yaxın nüsxə saxlanılır. Kitabxanamız gənc nəslin təlim-tərbiyəsi, onların ölkəmiz üçün layiqli vətəndaş kimi yetişməsi, xalqın mədəni səviyyəsinin yüksəldilməsi istiqamətində fəaliyyət göstərir, şəhər sakinləri üçün bir növ mədəni mərkəz rolunu oynayır. Uşaq və gənclər öz vaxtlarının böyük bir qismini bu kitabxanada keçirir, dərslərə hazırlaşır, mütaliə edir və bir-biri ilə ünsiyyətdə olurlar. Bu gün kitabxana yaradıcı, daim yeniləşmə prinsipindən çıxış etməklə intellekt-informasiya mərkəzinə çevrilir. Əsas oxucu kontingentimiz hazırda məktəb şagirdləri, ali məktəb tələbələri və digər yaş qruplarından olan insanlardır. Ancaq ən çox gənclərdir ki, onlar ixtisasla, peşə seçimi ilə bağlı daha çox kitablara müraciət edirlər. Yay aylarında oxucu kütləsi bir qədər az olur və bu da onunla bağlıdır ki, tədris ili hələ başlamayıb. Sentyabr ayından oxucu axını başlayır. Oxucular hətta kitabxanaya gəlmədən də internet vasitəsilə kitabxanamızın saytına daxil olaraq elektron kataloqa baxmaqla istədiyi kitabın burada olub-olmaması ilə bağlı məlumat əldə edə bilərlər. Bu yalnız bizim mərkəzi kitabxanaya aid deyil. Yəni cari ilin yanvar ayından Səbail rayon kitabxanaları Mərkəzləşmiş Kitabxana sistemində birləşib və bizim saytda hər bir filial haqda məlumat verilir. Filiallarda olan kitablar və yeni daxil olan kitablar haqda oxuculara məlumat çatdırılır. Eləcə də kitabların rəsmi, annatasiyaları var. Davamlı olaraq tədbirlər keçiririk. Kitab sərgiləri təşkil edirik. Kitab təqdimatları olur ki, bunlar barədə də saytda oxucularımıza məlumat veririk.

- Bədii ədəbiyyata maraq varmı?

- Ümumilikdə bədii ədəbiyyata maraq var. Çünki ötən illərə baxdıqda fondumuzun əksər hissəsi təzələnib. Müasir Azərbaycan oxucularının dünya ədəbiyyatına olan mənəvi tələbatını təmin etmək məqsədilə ölkə Prezidenti cənab İlham Əliyevin “Dünya ədəbiyyatının görkəmli nümayəndələrinin əsərlərinin Azərbaycan dilində nəşr edilməsi haqqında” 2007-ci il 24 avqust tarixli sərəncamına əsasən, 150 cildlik “Dünya ədəbiyyatı”nın nəfis şəkildə nəşri həyata keçirilib. 130 adda kitaba - dünya ədəbiyyatında estetik çevrilişlərə səbəb olmuş söz sənəti ustadlarının indiyə qədər tərcümə edilməmiş dəyərli nümunələrinə Azərbaycan dilində yenidən ruh verilib. Azərbaycan vətəndaşının dünyagörüşünün formalaşmasında bu sərəncamın xüsusi rolu var. Gənclərin bu kitabları oxumasında heç bir problem yoxdur. Çalışırıq oxucularımıza yaxşı şərait yaradaq. Məsələn, yayda kitabxanamızı soyuducu sistemlər, qışda istilik sistemləri ilə təmin edirik. Eyni zamanda hər bir oxucu gəldikdə kitabxana işçilərindən də mehriban, isti münasibət görür. Səbail Rayon Mərkəzləşdirilmiş Kitabxana Sistemi də respublikamızda yerləşən digər kitabxanalar kimi 35 adda 455 nüsxə “Dünya ədəbiyyatı” seriyasından kitabları hədiyyə olaraq əldə edib və hazırda oxucularının ixtiyarına verir.

- Kitabın təbliği ilə bağlı hansı tədbirlər həyata keçirilir?

- Hər zaman olduğu kimi, kitabxanada bayramlar və yubileylərlə bağlı geniş və maraqlı kütləvi tədbirlər - görüşlər, kitab sərgiləri, ədəbi-bədii gecələr, oxucu konfransları, kitab təqdimatları, mühazirələr, söhbətlər keçirilir. Bu tədbirlər kitabxananın ictimaiyyətlə əlaqəsini möhkəmləndirməyə imkan verir, gənc nəslin daha çox nümayəndəsinin kitaba yaxınlaşmasına şərait yaradır. Şəhərimizin mədəni həyatı kitabxananın işində daim əks olunur. Mədəniyyət və Turizm Nazirliyinin, Bakı Şəhər Mədəniyyət və Turizm İdarəsinin təşkilatçılığı ilə keçirilən tədbirlərdə kitabxana yaxından iştirak edir. Prezident İlham Əliyev tərəfindən 2011-ci ilin “Turizm ili” elan olunması, dövlət müstəqilliyimizin bərpasının iyirminci ildönümü və mədəniyyət sahəsində həyata keçirilən yeni layihələrlə bağlı tədbirlər reallaşdırılmaqdadır.

Dövlət dilimiz olan Azərbaycan dili zaman-zaman inkişaf edib zənginləşən dillərdən biridir. Bu gün Azərbaycan dili təkcə 9 milyonluq müstəqil Azərbaycanın deyil, planetimizin 70 ölkəsində yaşayıb-yaradan 50 milyona yaxın nəhəng bir xalqın dilidir. Bununla bağlı bugünlərdə Səbail rayon MKS-nin Mərkəzi Kitabxanası və filiallarında müxtəlif tədbirlər təşkil edildi. Səbail Rayon MKS-nin Mərkəzi Kitabxanasında "Dili yaşadan onun mənsub olduğu xalqdır” adlı tədbir keçirildi. Oxucular və kitabxananın kollektivi baş metodist Ş.Babaşovanın Ana dili haqqında məruzəsini dinlədilər. Dilimizin saflığından, onun zənginliyindən danışan iştirakçılar belə tədbirlərin mütəmadi olmasını arzuladılar. Oxuculara Ana dilinin vacibliyi, qorunması haqqında tövsiyələr edildi. Sonda “Azərbaycan Respublikasının dövlət dili” adlı kitab sərgisinin nümayişi oldu.Bundan başqa bu yaxınlarda Milli Mətbuat Gününə həsr olunmuş tədbir keçirildi. Tədbirdə “Əkinçi” qəzetinin əsl mənada xalqa həyatı olduğu kimi göstərən, cəmiyyətdəki nöqsan və bəlalar haqqında düşünən, məsləhət verən bir qəzet olduğu barədə məlumat verildi. Tədbir iştirakçıları da “Əkinçi”nin Azərbaycan mətbuatının inkişafında mühüm rol oynadığını, Azərbaycan dilində ilk qəzet olduğunu vurğuladılar. Tədbirin sonunda “İlk Azərbaycan qəzeti - “Əkinçi”” adlı slayda baxış keçirildi. Bu təqdimat bütün iştirakçılar tərəfindən maraqla qarşılandı.Həmçinin Səbail Rayon Mərkəzləşdirilmiş Kitabxana Sisteminin Mərkəzi Kitabxanasında “İçərişəhər oxucuların gözü ilə” adlı görüş keçirilib. Bu tədbir də iştirakçılar tərəfindən maraqla qarşılandı.

Bundan başqa kitabxanamızda 26 İyun Azərbaycan Silahlı Qüvvələri Günü münasibətilə hərb tariximizin tədqiqatçısı Şəmistan Nəzirli ilə görüş keçirildi. Tədbirə Bakı Şəhər Mədəniyyət və Turizm İdarəsinin əməkdaşları, elm və sənət adamları, Bakı Şəhər Mərkəzləşdirilmiş Kitabxana Sistemlərinin Direktorlar Şurasının üzvləri və Ş.Nəzirlinin yaradıcılığını yaxından izləyən oxucular dəvət olunmuşdu. Görüşdə tariximizin öyündürücü, dəyərli səhifələrinə işıq salan, XIX-XX əsrlərdə yaşamış generallarımızın ömür və döyüş yolunu araşdıran tədqiqatçının qələminə məxsus əsərlərdən söhbət açıldı, Azərbaycan Silahlı Qüvvələrinin yaranma tarixi haqqında maraqlı məlumatlar verildi. Ulu öndər Heydər Əliyevin müstəqilliyimizin əsası olan güclü və qüdrətli ordumuzun formalaşmasında göstərdiyi xidmətlər, bu gün hərbi sahəyə dövlətimizin verdiyi önəm xüsusi vurğulandı. Tədbirdə tədqiqatçının “Qoridən gələn qatar” sənədli povestinin yeni nəşri oxuculara təqdim olundu.

Nigar

Palitra.- 2011.- 5 avqust.- S.7.