Nargilə Qafarova: «Rayonumuzun mədəni
həyatı kifayət qədər zəngindir»
Layihə çərçivəsində
müsahibimiz Qəbələ Rayon Mədəniyyət və Turizm
Şöbəsinin müdiri Nargilə
Qafarovadır. O, qəzetimizə müsahibəsinə rayonun mədəni həyatında baş verən hadisələri xatırlatmaqla
başladı:
- Rayonumuzun mədəni həyatı
kifayət qədər zəngindir. İl ərzində
müxtəlif mədəni tədbirlər keçiririk.
Tarixi günlər, milli
bayramlar, tanınmış simaların
anım günləri ilə
bağlı tədbirlərimiz kifayət qədər olur. Bu tədbirlər sırasında cari
ilin əvvəlində rayonun
klub tipli mədəniyyət
müəssisələrində «Şən yolka»
adlı məktəblilər üçün Yeni il şənliklərini, Gənclər Günü münasibətilə mədəniyyət
müəssisələrinin bədii özfəaliyyət
kollektivlərinin gənclər üçün
musiqili proqramlarını, Beynəlxalq Ana Dili Günü
münasibətilə bədii qiraət müsabiqələrinin
təşkilini qeyd edə bilərəm. Novruz bayramı münasibətilə rayonun
Zərifə Əliyeva parkında rayon Mədəniyyət
Evinin «Çinar» instrumental ansamblının, C.Məmmədquluzadə
adına Xalq Teatrının, «Bulaq başı» folklor qrupunun, Hacallı kənd Mədəniyyət Evinin «Gülüstan» folklor qrupunun ifasında konsert proqramları təşkil olunub, meydan
tamaşaları göstərilib. Bildiyiniz
kimi, bu il müstəqilliyimizin bərpasının
20-ci ildönümüdür və bu munasibətlə bütün
respublikada olduğu kimi, rayonumuzda da geniş tədbirlər
həyata keçirilir. Bu
məqsədlə Mədəniyyət və Turizm
Şöbəsi üzrə tədbirlər planı
hazırlanıb və plana uyğun olaraq tədbirlər
həyata keçirilir. May
ayında Qəbələ qalasına yürüş
təşkil olunub, Qəbələ
Dövlət Rəsm Qalereyasında rəsm sərgisi
açılıb. Bu silsilədən olan tədbirlərimiz davam
etdirilir. Beynəlxalq Uşaqları
Müdafiə Günü münasibətilə
Uşaq Yaradıcılıq Mərkəzi
ilə birgə Heydər Əliyev parkında bayram
konserti hazırlanıb. Tədbirdə rayon incəsənət məktəbinin şagirdlərdən
ibarət ansamblı yüksək fəallıqla
çıxış edib.Qəbələ Rayon
Mədəniyyət və Turizm
Şöbəsi hərbi hamilik işini daim diqqət mərkəzində
saxlayır. Cari ilin yanvar və aprel
aylarında orduya
çağırış vaxtları hazırlanmış qrafik üzrə hərbi komissarlıq
önündə konsert proqramları təşkil
olunub. Rayon Mədəniyyət
Evinin «Çinar» instrumental ansamblı Novruz
bayramı münasibətilə rayonun Qəmərvan
kəndi ərazisində yerləşən sərhədçilərin
hərbi zastavasında konsert proqramı ilə
çıxış edib. Bir məsələni də
qeyd edim ki, Mədəniyyət və Turizm
Şöbəsi «Şəffaflığın
artırılması və korrupsiyaya
qarşı mübarizə məqsədilə Milli
Fəaliyyət Planı»ndan irəli gələn vəzifələrin
icrası məqsədilə bir sıra tədbirlər
həyata keçirib. Belə ki, Mərkəzi Kitabxana Sistemi və onun
filiallarında bu məqsədlə mətbu
orqanların sərgisi həyata keçirilib.
Klub müəssisələrində hüquq məsləhətxanası təşkil
olunub. Qəbələ Dövlət Rəsm
Qalereyasında «Rüşvətə yox
deyək» başlığı altında karikatura
sərgisi reallaşdırılıb. Yanğın təhlükəsinin aradan qaldırılması üçün
Qəbələ Rayon Mədəniyyət
və Turizm Şöbəsi üzrə bütün müəssisələrdə müvafiq işlər həyata keçirilib. Belə ki,
müəssisələrə baxış keçirilib,
yanğın törədə biləcək bütün
halların qarşısı alınıb. Baxış
zamanı müəssisələrdə elektrik
şəbəkələri, sobalar, qaz olan müəssisələrdə
qaz xətləri və cihazları saz vəziyyətə gətirilib. Müəssisələrin
zirzəmisində və damında təmizlik işləri
aparılıb. Məlumat üçün
bildirim ki, rayon Mədəniyyət Evinin
köhnə binası sökülüb və
hazırda yeni binanın tikintisi
gedir. Rayon Tarix-Diyarşünaslıq
Muzeyinin və Heydər Əliyev Mərkəzinin
su hovuzu işlək vəziyyətdədir.
- Gənclərin mədəni tədbirlərdə
iştirakı hansı səviyyədədir?
- Gənclərlə
işə xüsusi diqət ayırırıq. Onları pis vərdişlərdən
uzaqlaşdırmaq, milli-mənəvi ruhda tərbiyə etmək
üçün üzərimizə düşən işləri
icra edirik. Gənclər bizim gələcəyimizdir və bu
istiqamətdə görülən işlər böyük əhəmiyyət
kəsb edir. Narkotik vasitələrin qanunsuz dövriyyəsi və
gənclərin pis vərdişlərdən kənarlaşdırılması
məqsədilə klub tipli müəssisələrdə gənclərlə
görüş təşkil olunub. Görüşlərdə
gənclər arasında izahat işləri aparılıb. Bu
məqsədlə Mərkəzləşdirilmiş Kitabxana
Sistemi və onun filiallarında guşələr
yaradılıb, İncəsənət Məktəbi və Rəsm
Qalereyasında həvəskar rəssamların əl işlərindən
ibarət «Ağ ölüm» başlığı altında rəsm
sərgisi təşkil olunub. Mədəniyyət
işçilərinin hər ay çağırış məktubu
üzrə ixtisasartırma kursuna göndərilməsi işi
davam etdirilir. Mədəniyyət müəssisələrinin
bədii özfəaliyyət kollektivlərinin, folklor
qruplarının, incəsənət məktəbi şagirdlərinin
respublika müsabiqələri və sərgilərində
iştirakı təmin olunur. Bu baxımdan 28-30 aprel tarixlərində
«Baku Expo Center»də keçirilən II Ümumrespublika Daxili
Turizm Sərgisində turizm obyektləri nümayəndələrinin
və xalq tətbiqi sənətkarlarının
iştirakı təmin olunub. 16-20 may tarixlərində İncəsənət
Məktəbinin şagirdləri Ucar şəhərində
keçirilən Milli Musiqi Alətləri
İfaçılarının V Respublika Müsabiqəsində
iştirak ediblər.İyun ayında Bakı şəhərində
«Azərbaycan - doğma diyar» devizi altında keçirilən
milli azlıqlar festivalında Nic qəsəbə Mədəniyyət
Evinin «Cəngi» qrupu iştirak edib və diplomla təltif
olunub.Hazırda «Elektron Azərbaycan» proqramı ilə əlaqədar
olaraq Qəbələ rayonu üzrə maddi və qeyri-maddi mədəni
irs barədə məlumatların toplanılması işi
davam etdirilir.
- Qəbələdə
keçirilən musiqi festivalının rayonun mədəni həyatındakı
yerini necə qiymətləndirirsiniz?
- Çox yüksək. Deyim ki, musiqi festivalı təkcə Qəbələnin deyil, Azərbaycanın da mədəni həyatında çox böyük hadisə sayılır. Dünyanın ən nüfuzlu musiqi xadimlərinin Qəbələyə toplaşması ölkəmizin təbliği, mədəni dəyərlərimizin, musiqimizin dünyaya çatdırılması baxımından mühüm əhəmiyyət kəsb edir. Qəbələ Beynəlxalq Musiqi Festivalı artıq gözəl bir ənənəyə çevrilib. Bu festival günləri səhnədə dahi Azərbaycan və dünya bəstəkarlarının əsərləri səsləndirilir. Gənc ifaçılarla yanaşı dünya şöhrətli musiqiçilər bu səhnəyə çıxırlar. Burada klassik və kamera musiqisi, muğamlarımız ifa olunur. Ümumiyyətlə, Azərbaycan öz musiqi mədəniyyəti ilə hər zaman fərqlənir və Heydər Əliyev Fondu ölkəmizin musiqi irsinin qorunub saxlanılması və təbliği yolunda bir sıra iri layihələr həyata keçirir. Qəbələ Beynəlxalq Musiqi Festivalı Azərbaycan və dünya musiqisinin, mədəni dəyərlərin qorunub saxlanılması üçün Heydər Əliyev Fondu tərəfindən atılan növbəti addımdır. Bu festival bütün iştirakçılar, xüsusilə də gənc ifaçılar üçün həddindən artıq önəmlidir. Azərbaycan mədəniyyətinin təbliğinə xidmət edən bu festival həm də ölkəmizin musiqi ənənələrinin dünyada tanıdılması üçün bir vasitədir. Ənənəvi hal almış bu festival musiqi tədbiri kimi qısa bir müddətdə əsas məqsədə nail olub. Çünki Qəbələ bütün musiqiçilərin, tamaşaçıların, sənətsevərlərin tanınmış və sevimli görüş yerinə çevrilib. Festival iştirakçıları qonşu rayonlara səfər edərək orada da konsert proqramları ilə çıxış ediblər. Yəni bu festival təkcə musiqi bayramı deyil, Azərbaycanın təbliği və tanıdılmasıdır. Hesab edirəm ki, belə səviyyəli festivalın artıq ənənəvi şəkildə hər il keçirilməsi Azərbaycan mədəniyyətinin inkişafında yeni mərhələnin əsasını qoyub.
Anar Miriyev
Palitra.- 2011.- 9 avqust.- S.6.