Turizm ili” çərçivəsində magistrantların ilk layihəsi uğurlu alınıb

 

Prezident İlham  Əliyevin məlum sərəncamı əsasında 2011-ci il "Turizm ili" elan olunub. "Turizm ili" elan olunması ilə bağlı turizmin müxtəlif istiqamətlərinin inkişafı, turizm xidmətlərinin keyfiyyətinin yaxşılaşdırılması, peşəkar mütəxəssislərin hazırlanması, viza problemlərinin həlli, regionlarda turizmin inkişafı, turistlərin tarixi mədəniyyət abidələrinə aparılması məqsədilə yeni marşrutların və şəhər turlarının yaradılması, sərgilərdə turizm şirkətlərinin və hotellərin aktiv iştirakı, və s. məsələlər nəzərdə tutulub.  

 

Naxçıvan Dövlət Universitetinin Magistratura üzrə dekanlığının nəzdində bu il yaradılmış Tələbə Turizm Assosiasiyası 23-28 iyul tarixində Naxçıvan - Qəbələ - Naxçıvan istiqamətində ilk tur layihəsini həyata keçirib. Məqsəd magistrantların  elmi tədqiqat fəaliyyətlərini genişləndirmək, doğma diyarımızın turistiktarixi yerləri ilə tanışlıq olub. İyulun 23-də Naxçıvandan başlanan səfərdə ilk dayanacaq yeri kimi iyulun 24-də Bakı şəhərində Qız Qalası, Şirvanşahlar Saray Kompleksi, İçərişəhər, Miniatür Kitab Muzeyi ilə tanışlıqdan sonra səfər Qobustan istiqamətində davam edib. Daş yaddaşımızın yaşadıcısı olan qayaüstü təsvirlərlə tanışlıqdan sonra marşrut Qəbələ istiqamətində hərəkətini davam etdirib. Tur müddətində magistrantlardan və müəllimlərdən ibarət 24 nəfərlik heyət Magistratura üzrə dekan, tarix üzrə fəlsəfə doktoru Elbrus İsayevin rəhbərliyi ilə  Qəbələ və İsmayıllı rayonları,  Şamaxı və Şəki şəhərləri, qədim Albaniyanın paytaxtı Çuxur Qəbələ, öz qədimliyini bu günqoruyub saxlamış Lahıc qəsəbəsi, Şamaxı Astrofizika Rəsədxanası ilə tanış olublar. Eyni zamanda iyulun 23-də başlamış və avqustun 5-dək davam edəcək III Qəbələ Beynəlxalq Musiqi Festivalında tur heyəti də iştirak ediblər. Tur heyəti Qəbələ arxeoloci ekspedisiyasının rəhbəri, tarix elmləri doktoru, professor Qafar Cəbiyev, Bakı Musiqi Akademiyasının rektoru Fərhad Bədəlbəyli, Nyu-York Konservatoriyasının professoru Validə Rəsulova və başqaları ilə görüşüblər. Tur iyulun 27-də başa çatıb. Magistrantlar və müəllimlərdən ibarət heyət iyulun 28-də Naxçıvana qayıdıblar. Belə turların qarşıdakı illər ərzində də təşkil olunması nəzərdə tutulub.

 

 

 Məmməd Babayev,

Naxçıvan Dövlət Universitetinin

Mətbuat tarixi ixtisaslaşması üzrə I kurs

 

Palitra.- 2011.- 9 avqust.- S.10.