“Bu gün heç bir gəncin kiminsə alətinə çevrilib, küçələrdə ora-bura sürünməklə gəncliyini bada verməsinə həvəsi və istəyi yoxdur”

21-ci əsrdə dünyada gənclər həm siyasi, həm iqtisadi, həm də mədəni həyatın əsas yükünü öz çiyinlərinə götürüblər. Belə olan halda cəmiyyətin aparıcı qüvvəsini gənclər təşkil etmiş olur. Gənclər nə qədər savadlı, nə qədər mədəni və yüksək şüura malik olarsa, cəmiyyət də o qədər sürətlə inkişaf etmiş olar.

Biz gənclərin üzərinə düşən ən əsas vəzifə isə keyfiyyətli təhsil almaqla, Azərbaycan cəmiyyətinə, dövlətinə və dövlətçiliyinə savadlı, təcrübəli kadrlar qazandırmaqdır. Bunun üçün isə gənclik illərini, gənclik enerjisini səmərəli sərf etmək lazımdır, çünki bu illər bir daha qayıtmayacaq. Bu illərin həsrəti bizlərə “kaş ki”, “əgər” sözlərini dəfələrlə təkrarlamağa məcbur edəcək. Bu sözləri təkrarlamamaq istəyiriksə, elə cavan ikən hər bir addımımızı düşünərək atmalıyıq. Çünki həyatdakı hər addımın öz hökmü var. Azərbaycan gəncləri bu gün istər Vətəndə, istərsə də ölkədən xaricdə çox böyük uğurlar qazanırlar. Bu uğurlar cənab Prezident İlham Əliyevin gənclərə göstərdiyi diqqət və qayğısından irəli gəlir. Məsələn, istər olimpiya oyunlarında, istər başqa idman yarışlarında, istərsə də intellektual sahələrə aid yarışlarda Azərbaycanı təmsil edən gənclərin qalib olması artıq təəccüb doğurmur. Gəncliyə hər cür uğur imkanları dövlət tərəfindən təmin edilib. Bu gün Azərbaycan gənclərinin xarici ölkələrdə təhsil alması ilə bağlı dövlət proqramı həyata keçirilir ki, nəticədə minlərlə gəncimizin ən prestijli, keyfiyyətli xarici universitetlərdə qabaqcıl mütəxəssislər kimi yetişməsi təmin edilib. Beləliklə, Azərbaycan gəncliyi tək idmanda yox, bütün sahələrdə uğur qazanır, Vətən bayrağını ucalara qaldırırlar ki, bu sahələrin içərisində təhsilin, gəncliyin savadlı kadrlar kimi yetişməsinin, əsaslı şəkildə təkmilləşməsinin də xüsusi yeri var. Bununla bağlı əlavə olaraq xüsusi proqramlar, layihələr həyata keçirilir, təlimlərdə gənclər bir mütəxəssis və lider olaraq daim özlərini təkmilləşdirməkdədirlər. Mən belə gənclərimizlə qürur duyuram. Ümumiyyətlə, Azərbaycan gənci deyərkən mənim gözümün önündə vətənpərvər, dövlətinə, ailəsinə sadiq və savadlı bir gənc obrazı canlanır. Qeyd edim ki, mən də bir gəncəm və bunu yüksək dəyərləndirməyə çalışıram. Bəzi mətbuat orqanlarında “Azərbaycanda gənclərin iştirakı ilə mitinq olacaq” deyə populist yazılar dərc olunur. Bu cür dezinformasiya yayanlar tələbələrin də adını xüsusilə hallandırmağa və bununla diqqət çəkməyə çalışırlar. Bu məsələyə Bakı Dövlət Universiteti Sosial elmlər və psixologiya fakültəsinin politologiya ixtisasının tələbəsi kimi münasibətimi bildirərkən deyirəm: Azərbaycan gəncliyi bütünlüklə bizim dövlətçiliyi bəyənir, qoruyur və gələcəkdə də savadlı bir kadr kimi formalaşdırmaq üçün bu dövlətin yaratdığı imkanlardan bəhrələnmək istəyir. Bu dəqiqə bütün tələbələrin əsas fikri dərslərində, özünü təkmilləşdirməkdə, kitabda və təlimlərdə olmalıdır ki, sabah bu cəmiyyətə savadlı bir gənc kimi çıxa bilsinlər, cəmiyyəti irəli aparmaqda töhfəsini versinlər. Əgər biz əsl vətənpərvər övladlarıqsa və Azərbaycanın gələcəyini düşünürüksə, maksimal dərəcədə öz intellektual səviyyəmizi artırmalıyıq, hər hansı bir xarici dil öyrənməliyik, yeni texnologiyalarla yaxından tanış olmalıyıq - bir sözlə, bizim əsas fəaliyyətimiz təkmilləşmək olmalıdır. Yuxarıda qeyd etdiyim kimi, şayiələri qulaqardına vurub, Vətən uğrunda, dövlətimiz uğrunda, xalqımız uğrunda çalışmalıyıq-oxumalıyıq. Azərbaycan müharibə şəraitində yaşayan bir ölkədir. Liviyada, Misirdə baş verən hadisələrdə gənclərin kənar ölkələrin, xarici güclərin, kəşfiyyat orqanlarının ssenarisi əsasında hazırlanmış siyasi böhranda alətə çevrilməsi, destruktivlik nümayiş etdirməsi, nəticədə ölkələrinin dağılması, hələ də ciddi insan tələfatının davam etməsi ilə nəticələnib. Sirr deyil ki, ərəb ölkələri neft ilə zəngin olan ölkələrdir və bu ölkələrdə baş verən hadisələr bəzi neft hərisli xarici qüvvələrin maraqlarına xidmət edir. Belə təxribat çağırışlarına cavab vermək onu göstərir ki, oradakı gəncliyin öz milli düşüncəsi, vətənpərvər təfəkkürü yoxdur və ondan necə istəyirlər, elə də istifadə edirlər. Hər bir gənc cəmiyyətin üzvü kimi öz ölkəsinə, ictimaiyyətinə, sabahına yaxşı işlərlə heç bir xeyir verə bilmirsə, bu, artıq bir faciədir. Amma qeyd edilən bu nəhs hadisələrdən fərqli olaraq Azərbaycan gəncliyi ciddi milli məfkurəyə və vətənpərvər düşüncəyə sahibdir. Heç bir xarici bizə vətənpərvərliklə bağlı dərs keçə bilməz və bilməməlidir. Çünki öz inkişafımızı özümüzdən başqa heç kim təyin edə bilməz və bunu etmək istəməz də. Uzaqgörən Azərbaycan gəncliyi, Azərbaycan tələbələri bu məqamı çox yaxşı dərk edir. Buna görə də GƏNCLİK Azərbaycan cəmiyyətinin, dövlətçiliyinin, milli mənafeyinin keşiyindədir, bunu bir mənəvi və Vətən borcu olaraq hər şeydən üstün tutur. Çünki onu da bilir ki, özünün inkişafı yalnız sabit quruluşda və bu sabitlikdən yararlanıb özünü inkişaf etdirməyindədir. Bu gün heç bir gəncin kiminsə alətinə çevrilib küçələrdə ora-bura sürünməklə gəncliyini bada verməsinə həvəsi və istəyi yoxdur. Ona görə də bunu dərk edən bütün Azərbaycanın gəncliyi Azərbaycan dövlətçiliyindən, milli istiqlaldan möhkəm yapışmalı və onu qorumalıdır. Sonda ümummilli lider Heydər Əliyevin bu kəlamı ilə yazımı başa çatdırmaq istərdim : “Mən həmişə fəxr etmişəm, bu gündə fəxr edirəm ki, mən Azərbaycanlıyam !”

Elçin Hüseynov

Palitra.- 2011.- 11 mart.- S. 7.