Beynəlxalq sərgi mövsümü “AutoShow”
ilə açılır
2011-ci il beynəlxalq sərgi
mövsümü başladı. Bu gün avtomobil həvəskarlarının
çoxdan gözlədiyi bir hadisə - “AutoShow” 7-ci Azərbaycan
Beynəlxalq Avtomobil Sərgisi öz qapılarını
onların üzünə açacaq. Xəzəryanı
regionun ən böyük avtomobil sərgisi ilk dəfə
olaraq yeni “Bakı Ekspo” sərgi kompleksində keçiriləcək
və onun həm daxili, həm də xarici
meydançalarında təşkil olunacaq.
“Iteca Caspian LLC” və
onun tərəfdaşı Böyük Britaniyanın “ITE Group
PLC” şirkətləri sərginin təşkilatçıları
qismində çıxış edir. Artıq 5 ildir ki sərgiyə
Ümumdünya Sərgi Sənayesi Assosiasiyası (UFI) tərəfindən
verilmiş keyfiyyət nişanı onun beynəlxalq statusunu
bir daha təsdiq edir.Sərginin meneceri Babək Amaşov mətbuat
konfransında bildirdi ki, bu il sərgi öz adi təşkilat
formatını dəyişəcək. Belə ki, “AutoShow” sərgisinin
birinci iş günü mətbuat nümayəndələri və
sərgiyə dəvət edilmiş VİP qonaqlar
üçün eksklüziv ziyarət proqramı ilə
başlayacaq. Sərgi kompleksinin ərazisində KİV
nümayəndələri üçün brifinq keçiriləcək.
Sərginin növbəti üç iş günü
kompleksin qapıları bütün ziyarətçilər
üçün açıq olacaq. Bildirildi ki, “AutoShow 2011” sərgisində
100-dən çox şirkətin iştirak edəcəyi
gözlənilir. Hazırda “AutoShow” sərgisinin
iştirakçılarının siyahısına 14 ölkədən,
o cümlədən Azərbaycan, Almaniya, Danimarka, İtaliya,
Kanada, Çin, Malayziya, Rusiya, Litva, Türkiyə,
İsveçrə və Yaponiyadan olan şirkətlər
daxildir. Bu il “AutoShow” sərgisində
minik nəqliyyatı, kommersiya nəqliyyatı, bütün
növ nəqliyyat vasitələri üçün ehtiyat hissələri
və aksessuarlar kimi üç iri sektor təşkil olunacaq. “Bakı
Ekspo” mərkəzində keçirilən “AutoShow” sərgisinin
minik sektoru çərçivəsində avtomobil
istehsalı sektorunun “Hyundai”, “Jaguar”, “Land Rover”, “Volkswagen” və
s. bu kimi dünya istehsalçılarının
distribütorları bir araya gələcəklər. Builki sərginin
debütantı isə yerli avtomobil istehsalçısı
Naxçıvan Avtomobil Zavodu olacaq. İran şirkətləri
isə “Saipa” markalı avtomobili nümayiş etdirəcəklər.
Kommersiya tipli nəqliyyat sektorunda rahat sərnişin
avtobusları, yedəkçilər, özüboşaldanlar və
müxtəlif növ məhsulların daşınması
üçün yarımqoşqular nümayiş etdiriləcək.Sərgidə
əhəmiyyətli yeri isə avtoehtiyat hissələri
bölməsi tutacaq. Burada avtomobil yağları, filtrlər, avtokosmetika
və avtomobil kimyasının digər məhsulları üzrə
ən aparıcı ticarət nişanları təqdim
olunacaq. Qaraj-servis avadanlıqları sahəsində
ixtisaslaşmış Rusiya şirkətləri də builki sərginin
debütantları qismində çıxış edəcəklər.
Bundan əlavə ilk dəfə olaraq Kanada
istehsalçıları sərgidə öz innovasiyalı məhsullarının
- təhlükəsizliyin, habelə avtomobillər və digər
obyektlərin şüşələrinin möhkəmliyinin
yüksəldilməsi üçün nəzərdə
tutulmuş, eləcə də zərbə, güclü
külək, güllə, partlayış və
yanğından müdafiəni təmin edən zirehli
laminatın təqdimatı ilə çıxış edəcəklər.Beləliklə,
4 gün ərzində sərgi müxtəlif markalı
avtomobilləri potensial alıcılara nümayiş etdirmək
və dünyanın avtomobil sənayesinin tendensiyaları ilə
tanış olmaq imkanını yaratmaqla yanaşı perspektiv
texnologiyaları da nümayiş etdirəcək və əhalinin
nəqliyyat rahatlıq şəraitinin
yaxşılaşdırılmasında rol oynayacaq.
Nigar
Palitra.- 2011.- 16 mart.- S. 10.