Mingəçevirin mədəniyyət
müəssisələri şəhər sakinlərinin tələbatını
ödəməyə çalışır
Layihə çərçivəsində budəfəki təqdimatımız Mingəçevir şəhərilə bağlıdır. Şəhər Mədəniyyət və Turizm İdarəsindən «Palitra»ya verilən məlumatda mədəniyyət sahəsində həyata keçirilən tədbirlər və şəhərin mədəni həyatı öz əksini tapıb:
-
Mingəçevir Şəhər Mədəniyyət və
Turizm Şöbəsinin tabeliyində 316 min nüsxə kitab
fondu olan 16 kütləvi kitabxana, o cümlədən Mərkəzi
və Mərkəzi Uşaq Kitabxanası, şəhid
F.Qasımov adına Uşaq İncəsənət Məktəbi,
2 uşaq musiqi məktəbi, Tarix Muzeyi və onun filialı
olan Şəhidlərin Xatirə Muzeyi, A.İbrahimov adına
Dövlət Rəsm Qalereyası, 3 Mədəniyyət Evi, 3
klub müəssisəsi, şəhid M.Mirzəyev adına
Dostluq və Mədəniyyət İstirahət Parkı fəaliyyət
göstərir. Bu mədəniyyət
müəssisələrində 550 nəfər
çalışır. Eyni zamanda Sahil parkı, S.Vurğun bağı, Heydər Əliyev
seyrangahı, Heydər Əliyev meydanı mingəçevirlilərin
sevimli istirahət yerləridir. Mədəniyyət və Turizm
Şöbəsi il ərzində müxtəlif
mədəni tədbirlər həyata keçirir.
İlin əvvəlində tərtib edilən
tədbirlər planına uyğun olaraq keçirilən tədbirlər şəhər
sakinləri tərəfindən razılıqla
qarşılanır. Mingəçevirin mədəniyyət
müəssisələri şəhər sakinlərinin tələbatını
ödəməyə çalışır. Mingəçevir
şəhəri ərazisində ölkə əhəmiyyətli
5 abidə və yerli əhəmiyyətli
2 abidə qeydiyyata alınıb. Mingəçevir
Dövlət Dram Teatrının binası
ölkə əhəmiyyətli memarlıq abidəsidir. Bina 1952-ci ildə energetiklərin mədəniyyət
sarayı kimi tikilib.
Binanın əsas fasadı milli
memarlıq üslubunda tikilmiş
binalarla əhatə olunmuş
meydana baxır. 1968-ci ildə
Dram Teatrı yaradılan
zaman bina həmin teatrın istifadəsinə verilib. Şəhər ərazisində
üç arxeoloji abidə qeydiyyata alınıb. Bunlar İlk və Orta Tunc dövrünə
aid yaşayış yeri,
Son Tunc və İlk Dəmir dövrünə aid yaşayış
yeri və küp qəbirlər nekropoludur. Mingəçevir
şəhərində qeydə
alınmış iki yerli əhəmiyyətli abidələrdən biri şəhərin Nizami prospektində yerləşən,
faşizm üzərində
qələbənin 30 illik
yubileyi münasibətilə
ucaldılan "Ana Vətən"
abidəsi, digəri isə şəhərin cənub-qərbində yerləşən,
orta əsrlərə
aid edilən arxeoloji abidə yaşayış
yeridir.
Şəhərin tarixinin əks olunduğu məkan
Şəhərin tarixini ən yaxşı əks etdirən məkan Tarix Muzeyidir. Məlumat üçün
bildirək ki,
1946-1953-cü illərdə Mingəçevirdə görkəmli
alim S.Qazıyevin rəhbərliyi ilə aparılan qazıntılar
zamanı bu ərazilərdə 20 minə
qədər maddi-mədəniyyət
abidələri tapılıb.
Bu eksponatlar öyrənilməsi
üçün Elmlər
Akademiyasına göndərilib
və bundan sonra 50 eksponatla Mingəçevir Şəhər
Tarix Muzeyi fəaliyyətə başlayıb.
Mingəçevir Şəhər
Tarix Muzeyinin zəngin fondu var. Belə ki, şəhərimizin
tarixinin b.e.ə. III-I
əsrlərə qədər
gedib çıxdığını
sübut edən nadir eksponatlar var. Tunc dövrünün sonu, Dəmir dövrünün
əvvəllərinə aid olan bəzək əşyaları, əmək
alətləri, tunc xəncərlər, gil qablar, küp qəbirlərdən tapılmış
qədim bəzək əşyaları, əmək
alətləri, məişət
əşyaları muzeyin
fondunu bəzəyir. Hazırda muzeydə 14697 eksponat var və bunlardan
12167-i nümayiş etdirilir.
Muzey 9 mərtəbəli yaşayış
binasının I mərtəbəsində
uyğunlaşdırılmış binada yerləşir.
1918-ci ildə yaradılmış
Azərbaycan Demokratik Cümhuriyyətinə aid materiallar,
fotoşəkillər, Mingəçevirdə
SES-in tikilməsi ilə
bağlı qərarlar,
fotoşəkillər, ilk quruculuq
illərinə aid fotoşəkillər,
o zamandan indiyə qədərki şəhərin
sənayesi, mədəniyyəti,
təhsili və səhiyyəsi sahələrində
gedən inkişafı
özündə əks
etdirən eksponatlar, Böyük Vətən müharibəsi veteranlarının
fotoşəkilləri, sənədləri,
əsgər məktubları
və müharibə zamanı ıstifadə olunmuş müxtəlif silah növləri, Mingəçevir DRES-nin tikilməsi ilə bağlı fotoşəkillər,
20 Yanvar və Xocalı faciələrinə
aid panolar, quruculuq illərinə aid böyük
fotoşəkillər, o illərə
aid iş otağını
göstərən ekspozisiya
və s. materiallar nümayiş etdirilir. Tarix Muzeyi iki
əsas şöbədən
ibarətdir: Qədim Mingəçevir şöbəsi
və Müasir Mingəçevir şöbəsi.
Qədim
Mingəçevir şöbəsində
1948-ci ilə qədər
şəhərimizdə yaşayan
insanların yaşayış
tərzini əks etdirən ekspozisiyalar qurulub. Müasir Mingəçevir şöbəsində isə
XX əsrin əvvəllərində
Azərbaycan Xalq Cümhuriyyətinin yaranması
tarixindən indiyə
qədərki ictimai-siyasi
hadisələri əks
etdirən ekspozisiyalar
qurulub. Şəhərimizdə Şəhidlərin Xatirə Muzeyi də fəaliyyət göstərir. Muzey bir
böyük zaldan, iki otaqdan, bir
fond otağından ibarətdir.
Binanın ümumi sahəsi
198 kvadratmetr, ekspozisiyaya
ayrılan sahə 150 kvadratmetrdir. Şəhidlərin Xatirə Muzeyinin fondu zəngindir. Şəhid ailələrinin
muzeyə bağışladığı
şəhidlərə aid şəxsi
əşyalar, onların
ailələrinə yazdıqları
əsgər məktubları,
şəhidlərin fotoşəkilləri,
sənədlər, “Azərbaycanın
Milli Qəhrəmanı”
adına layiq görülmüş 6 şəhidin
büstü, “Azərbaycan
Bayrağı” ordeni ilə təltif olunmuş 7 gəncin yağlı boya ilə kətan üzərində işlənmiş
portreti, “İgidliyə
görə medal”la təltif olunmuş 4 həmyerlimizin yağlı
boya ilə kətan üzərində
işlənmiş portreti
və Şəhidlər
Xiyabanında dəfn olunmuş ilk şəhidin
kətan üzərində
yağlı boya ilə işlənmiş portreti qorunub saxlanılır.
Uşaqlara vətənpərvərlik hisslərinin aşılanmasına
xüsusi fikir verilir
Şəhərin mədəni həyatında
kitabxanaların böyük
rolu var. Mingəçevirdə
ilk kitabxana 1956-cı ildə
yaradılıb. Kitabxana fəaliyyətə kiçik bir otaqda 4229 nüsxə kitabla başlayıb.
Onun oxucuları Mingəçevir
şəhərinin ilk qurucuları,
SES-in tikintisində çalışan
fəhlə və mühəndislər olublar.
Şəhər böyüdükcə kitabxananın fəaliyyəti
genişlənib, oxucuların
sayı artıb.
1978-ci ildə şəhər kitabxanaları
mərkəzləşdirilərək Mingəçevir Şəhər
Mərkəzləşdirilmiş Kitabxana Sistemi yaradılıb. Mərkəzləşdirilmiş
Kitabxana Sisteminə M.P.Vaqif adına
Mərkəzi Şəhər
Kitabxanası və 11
filial-kitabxana daxildir. MKS-in kitabxana fondu 315074 nüsxədən ibarətdir.
M.P.Vaqif adına Mərkəzi Kitabxananın Xidmət şöbəsinə yeni gələn oxucuya kitabxanadan istifadə qaydaları, kitabxanaya yazılma, kitabdan istifadə, saxlanılma, qaytarılma müddəti və s. haqqında məlumat verilir. Oxucuya anket açılır və o, kitabxananın üzvü sayılır. Xidmət şöbəsi yaşından asılı olmayaraq müxtəlif oxucu kateqoriyalarına bütün nəşr növləri ilə xidmət göstərir. Bu il üçün olan məlumata əsasən, şöbənin kitab fondu 56017 nüsxədir. Komplektləşdirmə və kitabişləmə şöbəsi kitabxanaya yeni daxil olmuş ədəbiyyatı, dövri mətbuatı mütəmadi olaraq operativ şəkildə işləyir və struktur bölmələrə çatdırır. Silinən ədəbiyyatın fonddan çıxarılması əməliyyatını yerinə yetirir. Şöbə filiallar üçün əlifba və sistemli kataloq tərtib edir. Metodika-biblioqrafiya şöbəsi isə Mərkəzi Kitabxana və filiallarda aparılan uçot-hesabat işlərinə, keçirilən mədəni-kütləvi tədbirlərə metodiki köməklik edir, Milli Kitabxanadan, F.Köçərli adına Uşaq Kitabxanasından, C.Cabbarlı adına Gənclər Kitabxanasından alınan metodiki vəsaitlərin müzakirəsini və struktur bölmələrdə tətbiqini təşkil edir. Kitabxanın ən mühüm şöbələrindən biri Uşaq şöbəsidir. Şöbə 2012-ci ilin fevral ayına qədər Mərkəzi Uşaq Kitabxanası kimi fəaliyyət göstərib, hazırda Mərkəzi Kitabxananın Uşaq şöbəsi kimi öz fəaliyyətini davam etdirir. Fəaliyyətində qarşısına qoyduğu əsas məqsəd məktəbəqədər və məktəbyaşlı uşaqlara xidmət etmək, onların dünyagörüşünün formalaşmasına, təhsildə uğurlar əldə etməsinə kömək etmək, uşaqlarda vətənpərvərlik hisslərinin aşılanmasında fəal iştirak etməkdir. İnformasiya-resurs şöbəsi kitabxananın veb-saytının idarə olunması, şəbəkənin antivirus proqramının, habelə lokal və internet şəbəkəsinin fəaliyyətini təşkil edir, nəzarət funksiyasını həyata keçirir. Şöbə kitabxananın elektron kitabxanasının yaradılması, nəşrlərin elektron formaya çevrilməsi işini təmin edir. İl ərzində kitabxanalarda tədbirlər planına uyğun olaraq müxtəlif səpgili tədbirlər reallaşdırılır.
Anar Miriyev
Palitra.-2012.-5 iyun.-S.13.