“Mədəniyyətlə bağlı beynəlxalq
elmi tədbirlərə gənc alimlərimizin
ezam olunmasına şərait
yaradılır”
AMEA
nəzdində fəaliyyət göstərən Gənclərin
İntellektual İnkişaf Mərkəzinin və Gənc
alimlər, Aspirantlar və Magistrlər Cəmiyyətinin rəhbəri
İlqar Orucov: “Alimlərimizin elm müstəvisində də
bu mövzu ilə bağlı öz sözlərini layiqincə
demələrinə çalışırıq”
Mədəniyyətin
elmi müstəvidə tədqiq olunması, bu yöndə
aparılan tədqiqatların nəticələri ilə
bağlı geniş miqyasda tanışlıq aktual məsələlərdəndir.
Bu işdə xüsusilə də gənc
alim və tədqiqatçıların aktiv olması mədəniyyətin elmi müstəvidə tədqiqi və ümumi inkişafında xeyli
vacib məqamlardandır. Bu
baxımdan layihə çərçivəsində AMEA nəzdində
fəaliyyət göstərən Gənclərin İntellektual İnkişaf
Mərkəzinin və Gənc alimlər, Aspirantlar
və Magistrlər Cəmiyyətinin rəhbəri İlqar Orucovun fikirlərini
öyrəndik. İ.Orucov bizimlə
söhbətə Azərbaycan mədəniyyətinin
inkişafı ilə bağlı görülən ümumi işlər barədə fikirlərini
bildirməklə başladı:
- Azərbaycan mədəniyyətinin inkişafı ilə baglı bir məsələni xüsusi vurğulamaq istəyirəm. Bu yöndə Heydər Əliyev Fondunun intensiv fəaliyyəti və onun rəhbəri Mehriban xanım Əliyevanın xüsusi xidmətləri var. Azərbaycan mədəniyyətinin nümunələri, Azərbaycanın milli, mədəni abidələri YUNESKO-nun mədəni irs siyahısına daxil edilib. Bununla bağlı olaraq ümumiyyətlə, dövlətin həyata keçirdiyi siyasət kifayət qədər uğurludur. Hesab edirəm ki, bu istiqamətdə atılan addımlar olduqca həm nəzərəçarpandır, həm də uzun illərdən bəri qalmış problemlərin qısa müddətdə həll edilməsinə verilən çox önəmli, həlledici töhfələrdir.
- Azərbaycan mədəniyyətinin
elmi baxımdan tədqiq olunması məsələləri ilə
bağlı hansı fikirləriniz var? Məlumdur ki, müxtəlif elmi-tədqiqat institutları
öz profillərinə uyğun
olaraq mədəniyyəti bu
və ya digər baxımdan tədqiq edirlər...
-
Bilirsiniz ki, mədəniyyətlə bağlı mədəniyyətşünaslıq
elmi var. Kulturologiya elmi,
həmçinin mədəniyyəti tədqiq edən AMEA
qurumları var. Buraya
Fəlsəfə, Sosiologiya və Hüquq İnstitutu,
Memarlıq və İncəsənət İnstitutu,
Arxeologiya və Etnoqrafiya
İnstitutu və digərlərini aid etmək olar. Bu istiqamətdə konkret
işlər görülür, tədqiqatlar
aparılır. Eyni zamanda
həmin elmi müəssisələrdəki
konkret kafedralar da bu cür
tədqiqatlarla məşğul olurlar. Hesab edirəm ki, son illərdə elm
sahəsində və elm adamlarının
mədəniyyətin tədqiqi sahəsində işləri var. Kimsə fikirləşə bilər ki, bu işlər qənaətbəxş
deyil, daha çox işlər görmək olar. Amma bugünkü
reallıq ondan ibarətdir ki,
digər sahələrdə olduğu kimi, bu sahədə də
bizim alimlərimizin uğurları mövcuddur və bunları danmaq
mümkün deyil.
- Azərbaycan mədəniyyətinin
xarici ölkələrdə təqdim və təbliğ
olunması ilə bağlı nə deyə bilərsiniz?
-
Uzun illərdir ki, bu sahədə tədbirlər həyata
keçirilir. Məsələn, dövlət səviyyəsində
xarici ölkələrdə Azərbaycan
Mədəniyyəti Günləri təşkil olunur. Hesab edirəm ki, bunlar
Azərbaycan mədəniyyətinin beynəlxalq arenada təbliğ olunması və Azərbaycan
xalqının həqiqətən də əsrlərdən bəri
formalaşmış qədim mədəniyyətinin dünyaya təbliği istiqamətində mühüm addımlar sayılır.
Xüsusilə Heydər Əliyev Fondunun bu istiqamətdə də fəaliyyəti çox məhsuldar və uğurludur. Bundan başqa mədəniyyətin təbliği ilə
bağlı müxtəlif vətəndaş
cəmiyyəti institutları var. İctimai təşkilatların bu istiqamətdə fəaliyyəti barədə
də qeyd edilməlidir. Bu
gün vətəndaş cəmiyyəti
qurumları milli məsələlər, mədəniyyətimizin
təbliği ilə bağlı daha çox təşkilatlanıblar. İyirmi illik müstəqillik
ərzində bu yöndə xeyli işlər görülüb.
Biz müstəqilliyin bizə verdiyi imkanlardan bu məsələdə də xeyli
yararlana bilirik.
İnanıram ki, gələcəkdə biz bu sahədə daha böyük uğurlara imza
atacağıq. Mədəniyyət anlayışı geniş bir termindir. Bu anlayış
özündə müxtəlif
istiqamətləri ehtiva edir. Məsələn, Azərbaycan musiqisinin təbliği də mədəniyyətin
təbliğidir. Azərbaycan mətbəxinin, incəsənətinin,
milli adətlərimizin,
bayramlarımızın, folklorumuzun təbliği
mədəniyyətə aiddir. Bütün bunların yüksək səviyyədə
təqdimatı mədəniyyətimizin təbliğinə
xidmət edir. Bu sahədə
xüsusilə də diasporumuzun fəaliyyətini
qeyd etməyə dəyər. Bundan başqa bizim artıq son illərdə
diaspor təşkilatlarımızın fəaliyyəti
xeyli güclənib. Onların Azərbaycan
mənafeləri naminə ümumi koordinasiya olunması, güclərini və səylərini
birləşdirmələri mədəniyyətimizin yüksək
səviyyədə dünyada təbliği
ilə bağlı da töhfələrini
verir. Diaspor
qurumlarımız Azərbaycan mədəniyyətinin müxtəlif
sahələr üzrə təbliğ olunması istiqamətində
çox ciddi işlər
görürlər. Biz müxtəlif ölkələrdə tədbirlərdə
olarkən görürük ki, Azərbaycanın milli
bayramları və əlamətdar günlərdə diaspor təşkilatları bu
istiqamətlərdə uğurlu fəaliyyət
həyata keçirirlər, tədbirlər
reallaşdırırlar.
- Sizin rəhbəri olduğunuz
qurum mədəniyyətə aid hər hansı tədbirlərin
və ya araşdırmaların aparılması ilə
bağlı təşəbbüskar kimi
çıxış edibmi?
-
AMEA-nın nəzdində fəaliyyət göstərən, rəhbəri
olduğum Gənclərin İntellektual İnkişaf Mərkəzinin
struktur bölmələri olaraq akademiyanın bütün
bölmələrində gənc alimlər şuraları
yaradılıb. Bu istiqamətdə
Fəlsəfə, Sosiologiya və Hüquq İnstitutunun Gənc
Alimlər Şurasının nümayəndələrinin fəaliyyətini
xüsusilə qeyd etmək istəyirəm.
Onlar mədəniyyət və ona yaxın mövzuda dəfələrlə
seminarlar təşkil ediblər. Kulturologiya ilə bağlı onlar
tərəfindən dəyirmi masalar, simpoziumlar təşkil olunub.
Eyni zamanda Folklor İnstitutunun Gənc
Alimlər Şurası və həmin şuranın üzvlərinin
bu yöndə elmi-tədqiqatlarını
özündə əks etdirən monoqrafiyalar
çap olunub. Onlar müxtəlif elmi məqalələrlə
bu mövzuda
çıxışlar ediblər. Bizim təşkil
etdiyimiz, gənc alimlərin
yaradıcılığı ilə bağlı tədbirlərdə
gənc kulturoloqların bu mövzuda
çıxışları olur. Onlar bu istiqamətdə olan tədqiqatlarını təqdim edirlər.
Eyni zamanda bizim bir elmi
jurnalımız çap olunur.
Həmin jurnalda mütəmadi olaraq tədqiqatlar aparan gənc
alimlərin işləri ilə tanış olmaq
mümkündür. Bu
isə onu deməyə əsas verir ki, bu
sahədə gənc alimlərimizin xeyli
işləri var.
- Gənc alimlər mədəniyyətlə
bağlı keçirilən beynəlxalq elmi konfranslara
qatılmağa nə dərəcədə həvəs
göstərirlər? Bu sahədə onlara yaradılan şəraiti
necə qiymətləndirirsiniz?
- Gənc alimlərin müxtəlif beynəlxalq elmi konfranslarda iştirak səviyyəsi son illərdə xeyli dərəcədə artıb. Bu sahədə vaxtilə bizim üçün ciddi problem olan beynəlxalq elmi tədbirlərə çıxış məsələsi əsasən həllini tapıb. Məsələn, bu yaxınlarda bizə müraciət etmiş bir gənc etnoqraf mətbəx mədəniyyəti ilə bağlı tədqiqat işi aparır. O, həm kitabının, monoqrafiyasının çap olunması, həm də Türkiyədə keçiriləcək mədəniyyətşünaslıqla bağlı beynəlxalq toplantıda Azərbaycanı təmsil etmək üçün müraciət edib. Biz artıq onunla bağlı məsələyə baxmışıq və onun səfər xərclərini ödəyəcəyik. Ümumiyyətlə, bu məsələdə əməkdaşlıq təkcə türkdilli ölkələrlə məhdudlaşmır. MDB respublikalarında keçirilən mədəniyyətlə bağlı beynəlxalq tədbirlərə də gənc alimlərimizin ezam olunmasına şərait yaradılır. Onların müxtəlif elmi mərkəzlərlə əməkdaşlığı təmin edilir. Bütün bunlar Azərbaycan mədəniyyətinin eyni zamanda elmi baxımdan yüksək səviyyədə təqdim olunmasını nəzərdə tutur. Biz bu imkanlardan istifadə edərək alimlərimizin eyni zamanda elm müstəvisində də bu mövzu ilə bağlı öz sözlərini layiqincə demələrinə çalışırıq.
İlkin AĞAYEV
Palitra.-2012.-20 iyun.-S.11.