Novosibirskdə yaşayan Əli Muradov: “Harada oluramsa olum, Vətənimi heç nəyə dəyişmərəm”

 

“Azərbaycan mahnılarından da klassik əsərlər ifa etməyə çalışıram. Əsasən unudulmuş mahnıları tapıb oxuyuram”

 

Layihə çərçivəsində növbəti müsahibimiz skripka və vokal ifaçılığı üzrə bir sıra müsabiqələrin qalibi olan, İspaniyada keçirilən qala-konsertin 1-ci dərəcəli laureatı diplomuna layiq görülən və hazırda Novosibirskdə yaşayan Əli Muradovdur: 

- Mən Rusiyada doğulmuşam və hazırda Novosibirskdə yaşayıram, mayın 17-də 11 yaşım tamam olacaq. Hazırda 4-cü sinfi bitirirəm, musiqi məktəbində də 5-ci sinfə keçirəm. Həm vokal, həm skripka şöbələrində təhsil alıram. Nəinki məktəbdə, Novosibirsk Filarmoniyasında və Operada keçirilən konsert proqramlarında tez-tez iştirak edirəm. Bu yaxınlarda filarmoniyada akademik orkestrlə çıxışım oldu. Azərbaycan diasporunun təşkil etdiyi bütün tədbirlərdə də iştirak edirəm. Burada tez-tez Azərbaycan gənclər təşkilatlarının tədbirləri olur. Leyla Əliyevanın rəhbərlik etdiyi Rusiya Azərbaycanlı Gənclər Təşkilatının (AMOR) ən gənc üzvüyəm. Burada da AMOR-un filiali var və mən tədbirlərdə azərbaycanlı kimi gəncləri təmsil edirəm. Azərbaycanlı uşaqlarla əsasən diasporun tədbirlərində görüşürük. Müxtəlif dillərdə, o cümlədən Azərbaycan dilində, italyanca da mahnılar ifa edirəm. Hətta ana haqqında italyanca mahnı oxuduğum konsertdə bəzi insanlar gözyaşları ilə mənə yaxınlaşırdılar. Məktəbdə ingilis dili öyrənirəm, əlavə olaraq isə artıq 3 ilə yaxındır italyan dili dərsləri alıram. İtalyan dilini öyrənməyimi valideynlərimdən özüm xahiş etdim. Çünki oxuduğum klassik əsərlərin, ariyaların çoxu italyanca oldugu üçün əvvəl sözlərini basa düşmürdüm, indi isə götürdüyümüz yeni əsərlərin sözlərini artıq başa düşürəm və daha ürəkli oxuyuram. Doğma ana dilimi də təmiz bilirəm, evdə öz dilimdə danışıram, rus dili də ki öz yerində.

- Musiqi fəaliyyətin dərslərinə problem yaradırmı?

- Bəli, hərdən olur. Müsabiqə qabağı məşqlərlə bağlı, ya da səfərdə olanda bəzən dərslərin bir neçə gününü buraxmalı oluram. Ancaq çalışıram ki, dərslərimi çatdırım, buraxılan materialları oxuyuram və sinifdə heç kimdən geri qalmıram. Məktəbdə qiymətlərim əladır, medalistlərin qrupundayam, yalnız idman dərsindən bir 4 qiymətim var. Ümumiyyətlə, idmanı çox sevirəm, amma vaxtım olmur. Heç üzgüçülüyə vaxt tapa bilmirəm, amma şahmat oynamağı bilirəm. Demək olar ki, səhər çıxıb, axşam gəlirəm. Səhər 8-də məktəbə, 2-dən sonra həftədə 2 dəfə vokal, 2 dəfə skripka, solfecio dərsləri, musiqi ədəbiyyatı dərslərinə gedirəm. Hələ müsabiqə qabağı, hətta bazar günləri də hər gün məşqlərdə oluram. Konservatoriyaya gedirəm. Skripka müəllimim Rusiyanın Əməkdar incəsənət xadimidir və Qlinka adına Konservatoriyanın dosentidir. Vokal müəllimim isə beynəlxalq müsabiqələr laureatıdır. Azərbaycanlı olduğumu getdiyim müsabiqələrdə hər kəs bilir. Mən də çalışıram ki, Azərbaycanı bacardığım qədər tanıdım. 

- İspaniyada keçirilən qala-konsertin qalibi kimi bununla bağlı nə deyərdin?

- Türkiyədə, İspaniyada, Sankt-Peterburqda, Krasnoyarskda, Moskvada beynəlxalq müsabiqələrdə və qala-konsertlərdə iştirak etmişəm. Bu sonuncu müsabiqədə İspaniyanın mərkəzi meydanında qala-konsert və diplomların təqdimat mərasimi keçirildi. O konsertdə yalnız qaliblər çıxış edirdi. Mən hələ müsabiqənin nəticəsini bilmirdim. Çünki nəticə konsertin sonunda bilinəcəkdi. Ancaq adımı qala-konsertin iştirakçılarının siyahısında görəndə sevindim. Mərkəzi meydanda Dvorjakın “Melodiya”sını ifa etdim. İspanlar tərəfindən çox yaxşı qarşılandı. Çünki onlar klassikanı çox sevirlər. Sonda diplomlar təqdim edildi və mən 1-ci dərəcəli laureat diplomuna layiq görüldüm. Konsertin səhəri günü yolda bir neçə ispan məni tanıyıb yaxınlaşdı və soruşdular ki, sən skripkaçı oğlansan? Yəqin ki, meydanda konserti izləyən tamaşaçılardan idilər. İspan dili ilə italyan dili bir-birinə çox oxşayır və mən ona görə bəzən başa düşürdüm.

- Həm skripka ifaçısı, həm də vokalçı kimi çıxış edirsən. Gələcəkdə bunların hansının ardınca getmək istərdin?

- Mən vokalı daha çox sevirəm. İtaliyada vokal üzrə təhsilimi davam etdirmək istəyirəm. Ancaq skripkada da vokal kimi, eyni uğurlarım olduğuna görə hələki paralel gedir. Heyfim gəlir, skripkanı ata bilmirəm. Vokalçı olmaq istəyirəm. Əsasən klassik əsərlər, ariyalar ifa edirəm. Baxın, Şubertin, Bethovenin, Vivaldinin əsərlərinə müraciət edirəm. Alman, italyan, rus dilində klassik əsərlər oxuyuram, skripkada da klassik əsərlər ifa edirəm.

- Repertuarında Azərbaycan mahnılarına yer verirsənmi?

- Azərbaycan mahnılarından da klassik əsərlər ifa etməyə çalışıram. Əsasən Rəşid Behbudovun, Müslüm Maqomayevin repertuarından mahnılar seçib oxuyuram. Ancaq neopolitan mahnılarını çox sevirəm. İtalyan dilində oxumaq xoşuma gəlir, Pavarottiyə, Boçelliyə, Lorettiyə çox qulaq asıram. Tofiq Quliyevin mahnılarını oxuyuram. Hazırda Rəşid Behbudovun ifa etdiyi, Rauf HacıyevinƏziz şəhər”mahnısının üzərində çalışıram. İnşallah, bu yay Bakıda efirə dəvət ediləndə ifa edəcəm. Bundan başqa Rəşid BehbudovunMalçik iz Karabaxaadlı mahnısını oxuyacam. Əsasən unudulmuş mahnıları tapıb oxuyuram. Bu baxımdan da bu mahnını oxumaq istədim, “Malçik iz Karabaxamahnısını heç kim oxumur, unudulub, amma çox gözəl mahnıdı. Rusiyada verilişlərə çox dəvət olunmuşam. Hətta burada telekanallarda bir neçə dəfə mənim haqqımda verilişlər hazırlanıb. Azərbaycanda da bir sıra telekanallarda müxtəlif verilişlərin qonağı olmuşam. Mənim haqqımda oçerklər hazırlanıb.

- Bakıya tez-tez gəlirsən?

- İldə 2 dəfə gəlirəm. Dekabrın 26-da Filarmoniyada Fidan Xuraman Qasımovaların konsertinə dəvət olunmuşdum. Orkestrin rəhbəri Rauf Abdullayev idi. Konsert çox yaxşı keçdi. İtalyanca Pavarottinin repertuarındanTorna A Surryentoəsərini ifa etdim. Solo konsert vermək istərdim, amma hələ çox kiçiyəm. Azərbaycanı çox sevirəm. Harada oluramsa olum, Vətənimi heç nəyə dəyişmərəm. Biz ailədə 2 qardaşıq, böyük qardaşım 5 yaş məndən böyükdür. O da Bakını çox sevir. İkimiz yayın gəlişini səbirsizliklə gözləyirik. Bakının gözəl, görməli yerlərini gəzirəm. Azərbaycanın bölgələrini, rayonlarını gəzməyi sevirəm. Tez-tez dənizə gedirəm. Bakı Bulvarı çox xoşuma gəlir.  

 

 

Nigar Abdullayeva

 

Palitra.-2012.-16 may.-S.12.