Əbülfəs Qarayev: “Bu il Azərbaycana gələn turistlərin sayında 7 faiz artım var”

Dünən “Jumeirah Bilgah Beach Hotel”də Mədəniyyət və Turizm Nazirliyi, Ümumdünya Turizm Təşkilatı (ÜTT) və Azərbaycan Turizm Assosiasiyası tərəfindən «İpək Yolunu tanı: Kulinariya, mədəniyyət və turizm» mövzusunda beynəlxalq konfrans öz işinə başladı. Tədbirdə Azərbaycanın mədəniyyət və turizm naziri Əbülfəs Qarayev, ÜTT-nin baş katibi Taleb Rifai, Qırğızıstan, Qazaxıstan, Gürcüstan, Litva və Pakistandan nazir və nazir müavinləri səviyyəsində qonaqlar, İspaniya, Koreya, Rusiya, Bolqarıstan, İsveçrə, Belçika, İtaliya, Türkiyə, Böyük Britaniya, Özbəkistan, Tailand, Fransa, Almaniya və Çinin turizm təşkilatlarının, həmçinin yerli və xarici hökumət və qeyri-hökumət təşkilatlarının, dünyanın aparıcı KİV-lərinin nümayəndələri iştirak edir.

İl ərzində Azərbaycanda təxminən 40-a yaxın hotel açılır

Konfrans iştirakçıları əvvəlcə hotelin foyesində təşkil edilmiş turizm və kulinariyaya aid elmi kitab, broşür və digər çap materialları ilə tanış oldular, Azərbaycan sənətkarlarının əl işlərindən ibarət sərgiyə baxdılar. ÜTT-nin şöbə müdiri Alla Peresolovanın aparıcılığı ilə başlayan tədbirdə öncə qədim İpək Yolu üzərində yerləşən ölkələrin tarixi keçmişi və müasir inkişafından bəhs edən videoçarxın təqdimatı keçirildi. Sonra tədbirdə çıxış edən mədəniyyət və turizm naziri Əbülfəs Qarayev bildirdi ki, İpək Yolu üzərində yerləşən ölkələrin kulinariya, mədəniyyət və turizmini əhatə edən belə böyük konfrans Azərbaycanda ilk dəfədir keçirilir: “Belə bir tədbiri düzənləmək bizim üçün qürurvericidir. Azərbaycan mətbəxinin tarixi çox-çox qədimlərə söykənir. Tarixi İpək Yolu üzərində yerləşən ölkələr kifayət qədər böyük innovasiyaları, yenilikləri, mətbəx ənənələrini özündə təcəssüm etdirir. Biz də belə bir böyük ailənin - İpək Yolu ailəsinin bir üzvü olmaqdan qürur hissi duyuruq. Bu konfrans dövlətimizin başçısının diqqət mərkəzindədir və onun tərəfindən yüksək dəyərləndirilir. Əsrlər boyu tarixi İpək Yolu Şərq və Qərb arasında mədəniyyət, ideya, texnologiya və insan mübadiləsində mühüm rol oynayıb. 28 ölkənin üzv olduğu İpək Yolu Proqramının məqsədi birgə səylərlə İpək Yolu boyunca turizmi davamlı inkişaf etdirməkdən ibarətdir. Artıq Azərbaycanın Ümumdünya Turizm Təşkilatında öz yeri və nüfuzu var. Azərbaycanda çoxsaylı beynəlxalq festivalların və tədbirlərin keçirilməsi bunun bariz nümunəsidir. Bu konfransda Azərbaycan və ona qonşu olan ölkələrin mətbəxi, turizmi və digər ənənələri nümayiş etdirilir, ölkələr arasında əməkdaşlıqlar qurulur”. Nazir qeyd etdi ki, bu ilin sonuna qədər Azərbaycanda xüsusiləşdirilmiş turizm konfransı keçiriləcək ki, bu da dünya turizminə öz töhfəsini verəcək. Azərbaycan turizminin çox sürətli templərlə inkişaf etdiyini deyən nazir bildirdi ki, hər il ölkəyə gələn turistlərin sayında 10-15 faiz artım müşahidə olunur və il ərzində Azərbaycanda təxminən 40-a yaxın hotel açılır: “İki gün əvvəl Bakıda daha bir beşulduzlu beynəlxalq şəbəkə hotelləri qrupuna aid olan «Four Seasons» hoteli istifadəyə verildi. Bütün bunların hamısı turizmin ən mühüm istiqaməti olan xidmətin keyfiyyəti məsələsinə xüsusi yanaşma tələb edir. Biz artıq fəxr edirik ki, Azərbaycanda turizm sahəsi qeyri-enerji sektorunun əsas şaxələrindən biridir. Amma biz eyni zamanda bu xidmətləri də təşviq etməliyik. Azərbaycan Respublikasının verdiyi təşəbbüslərə göstərdiyi yüksək diqqət və dəstəyə görə BMT-nin Ümumdünya Turizm Təşkilatına öz dərin təşəkkürlərimi bildirirəm. Xüsusilə təhsil, maariflandirmə və təcrübə mübadiləsi sahəsində bizim bu nüfuzlu təşkilatla əlaqələrimiz çox güclüdür. Biz çox şadıq ki, Azərbaycanın turizm sahəsi iqtisadiyyatda yeganə sahədir ki, beynəlxalq səviyyədə Avropa və İpək Yolu ölkələri ilə yaxından əməkdaşlıq edir”. Nazir onu da bildirdi ki, 2013-cü ildə Bakıda 2-ci Beynəlxalq Mədəniyyətlərarası Dialoq Forumu keçiriləcək: “Mən düşünürəm ki, o zaman biz bugünkü konfransın nəticələrini hiss edəcəyik. Çünki bu tədbirin təsiri sadəcə İpək Yolu ölkələrinin mütəxəssislərinin fikir mübadiləsi ilə bitməyəcək. Konfrans İpək Yolu regionunun qida, kulinariya və mədəni turizm potensialının diqqət mərkəzinə çevrilməsinə imkan yaradacaq. Konfrans iştirakçıları kulinariya turizmi ilə yaxından tanış olaraq İpək Yolu ölkələrinin kulinariya təcrübəsinə dair fikir mübadiləsi aparmaq imkanı qazanacaqlar. Eyni zamanda isə tədbir ölkəmizdə yerləşən bütün turizm obyektlərinin fəaliyyətinə təsirini göstərəcək. Burada irəli sürülən fikirlər sadəcə təkliflər şəklində qalmayacaq. Konfransın davam edəcəyi iki gün ərzində müxtəlif səpgili görüşlər keçiriləcək, mətbəx nümunələrinə aid maraqlı təqdimatlar olacaq. Bu tədbir iştirakçı ölkələrin bir-birini daha yaxından tanımasına rəvac verəcək. Konfransın qonaqları görəcəklər ki, azərbaycanlılar çox açıq düşüncəli və sülhpərvərdirlər. Biz son tikəmizi belə sizlərlə paylaşmağa hazır bir millətik. Hamınıza maraqlı müzakirələr və məhsuldar əlaqələr qurmağı arzu edirəm.Konfransdan sonra qonaqlarımızın bir qismi Azərbaycanın zəngin ənənələri ilə tanış olmaq və milli azlıqların yaşayışı, həyat tərzini görmək üçün ölkəmizin müxtəlif regionlarına səfər edəcəklər”.

2030-cu ilədək turist kimi səyahətə çıxanların sayı 1,8 milyardı keçəcək

ÜTT-nin baş katibi Taleb Rifai belə bir konfransın Bakıda keçirilməsini yüksək qiymətləndirdi və Azərbaycan Prezidenti İlham Əliyev tərəfindən ölkədə turizmin inkişafına böyük diqqət və qayğı göstərildiyini xüsusi qeyd etdi. Azərbaycana üç dəfə səfər etdiyini söyləyən T.Rifai hər gəlişində burada bənzərsiz yeniliklər və inkişafın şahidi olduğunu vurğuladı. Konfransın işinə uğurlar arzulayan qonaq turizmin inkişafına dair marketinq, təbliğat, təşviqat, potensial quruculuq, insan qaynaqları və İpək Yolu ölkələri arasında viza rejiminin sadələşdirilməsi istiqamətində təkliflərlə çıxış etdi. Taleb Rifai vurğuladı ki, bu il bir milyarda qədər insan turist kimi müxtəlif yerlərə səfər edib və ümumilikdə 2012-ci il üzrə turizm səviyyəsi 5,2 faiz artıb. 2030-cu ildək turist kimi səyahətə çıxanların sayı 1,8 milyardı keçəcək. Daxili turizmin əhəmiyyətini qeyd edən qonaq bu sahənin də inkişafda olduğunu diqqətə çatdırdı. Turizmin inkişafında kulinariyanın mühüm rol oynadığını söyləyən T.Rifai bildirdi ki, bu sahənin ümumi çəkisində 30 faizədək inkişaf ərzaq və digər qida məhsullarının üzərinə düşür.

İpək Yolu ölkələri arasında Şengen vizasının analoqu yaradila bilər

İran İslam Respublikasının vitse-prezidenti, İran Mədəni İrs və Mədəniyyət Təşkilatının sədri Seyid Həsən Musəvi konfransın əhəmiyyətindən danışaraq tədbirin yüksək səviyyədə təşkil olunduğunu bildirdi. İran rəsmisi beynəlxalq turizmin inkişafı istiqamətində mühüm layihələrin reallaşdırılması, İpək Yolu Baş Assambleyasının yaradılması, İpək Yolu Gününün təsis olunması və “İpək Yolu Atlası”nın hazırlanması və bu kimi digər təkliflər səsləndirdi. Vitse-prezident assambleyanın ilk qurultayının gələn ilin sonunda İranda keçirilməsi, 2014-cü ilin “İpək Yolu” devizi altında elan olunması, Ümumdünya Turizm Təşkilatının bir gününün “İpək Yolu Günü” kimi qeyd edilməsi, İpək Yolu ölkələri arasında Şengen vizasına analoq olaraq sadələşdirilmiş viza rejiminin tətbiqi və “İpək Yolu Atlası”nın tərtib olunması təkliflərini bildirdi. Qeyd olundu ki, İran tərəfi bu atlasın yaradılmasını öz üzərinə götürmək istəyir. Konfrans işini «Qida və turizm: qlobal meyillər və imkanlar», «İpək Yolunun kulinariya məkanlarının aparıcı şəbəkəsi kimi qurulması» və «İnkişaf üçün qida» mövzularında sessiyalarla davam etdirdi. Gün ərzində tədbir çərçivəsində «İpək Yolu qlobal səyahət mediasında» və «Rəqəmsal dövr: sosial media və səyahət» adlı dəyirmi masalar, həmçinin Azərbaycan, Türkiyə, İtaliya və İspaniya mətbəxlərinin təqdimatı və ustad dərsləri təşkil olundu, Azərbaycanın və Gürcüstanın istehsalı olan şərabların dequstasiyası keçirildi. Qeyd edək ki, konfrans bu gün başa çatacaq.

Ümumdünya Turizm Təşkilatının baş katibi: “Azərbaycanda turizmin inkişafı göz önündədir”

Ümumdünya Turizm Təşkilatında (ÜTT) Azərbaycan üçün xüsusi iş yeri açılıb. Bunu jurnalistlərə açıqlamasında mədəniyyət və turizm naziri Əbülfəs Qarayev deyib. Nazir bildirib ki, ötən il Ümumdünya Turizm Təşkilatının baş katibi Taleb Rifai bu təşkilatda Azərbaycana xüsusi iş yerinin açılmasına söz verib və artıq bu proses həyata keçirilib: “Artıq Ümumdünya Turizm Təşkilatında Azərbaycanın nümayəndəsi çalışır”. Nazir onu da deyib ki, turizm sahəsində bu ilin nəticələri ondan xəbər verir ki, Azərbaycana gələn turistlərin sayında ötən ilə nisbətən 7% artım var: “Azərbaycan bu il turizm sənayesində 7 faiz artırma nail olub. Bu da yeni açılan mehmanxanalar, Azərbaycan keçirilən beynəlxalq tədbirlərdən irəli gələn inkişafdır”. Taleb Rifai isə jurnalistlərə açıqlamasında Azərbaycanda turizmin inkişafının göz önündə olduğunu bildirib: “Azərbaycan Avropa və Asiyanı birləşdirən İpək Yolu üzərində yerləşdiyindən ölkənin kulinariya və turizm potensialını təşviq edə və bunun nəticələrini görə bilərik. Bakıda gedən inkişafı hər səfərimdə hiss edirəm”. Azərbaycanda üçüncü rəsmi səfərində olduğunu deyən T.Rifai ölkəmizin ev sahibliyi etdiyi bu tədbirin əhəmiyyətindən də danışıb: “Şəhərin əvvəlki görünüşündən, uğur və nailiyyətlərə əsasən deyə bilərəm ki, Azərbaycanda turizm sahəsində ilbəil inkişaf müşahidə olunur. Turizm sahəsi Azərbaycan iqtisadiyyatında əhəmiyyətli yer tutur. Ümumiyyətlə, respublika rəhbərliyinin bu qədər diqqət ayırması təqdirəlayiqdir. Bu gün turizmin gücü inanılmazdır. May ayında Azərbaycanın ev sahibliyi etdiyi “Eurovision 2012” yarışmasını uğurla keçirməniz bir daha sübut edir ki, Azərbaycan gündən-günə inkişaf edir. Mən bu münasibətlə hər birinizi təbrik edirəm”.

Nigar Abdullayeva

Palitra.-2012.-7 sentyabr.-S.5.