Tar babalarımızın əmanət etdiyi bir sərvətdir...

Müsahibim Azərbaycan Milli Konservatoriyasının I kurs tələbəsi İdris Hüseynovdur. İlk öncə qəzetimizin oxucularına gənc nəslin nümayəndəsi İ. Hüseynov haqqında qısaca məlumat verim. İdris Hüseynov 1993-cü ildə Naxçıvan şəhərində anadan olub. Orta təhsilini həmin şəhərdə alıb. Peşəkar musiqilə məşğul olmağa 9 yaşından başlayıb. 5 illik musiqi məktəbini bitirdikdən sonra 2008-ci ildən Naxçıvan musiqi kollecində tar ixtisası üzrə təhsil alıb. Hal-hazırda Azərbaycan Milli Konservatoriyasının Xalq çalğı alətləri şöbəsinin tar sinfində təhsil alır. Gənc tarzən İdris Hüseynovla müsahibəni təqdim edirik:

-Musiqi ilə neçə yaşından məşğul olmağa başlamısınız? Musiqiyə bağlılıq ailədən gəlir, yoxsa, sizin xüsusi sevginiz olub?

- Musiqiyə olan sevgim ailəmdən gəlir. Atamla anam da musiqiçidir. Mən gözümü açandan evimizdə tar, fortepiano səsi eşitmişəm. Atam tarda ifa etdiyi üçün mənim də tara marağım olub. Amma əslində atam musiqiçi olmağımı istəmirdi. Tara olan sevgimi gördükdən sonra məni musiqi məktəbinə yazdırdı.

- İfa etdiyiniz musiqilərdə ən çox muğamlara üstünlük verirsiniz, yoxsa əsərlərə?

- Muğamlara. Muğam ifa etdiyim zaman daha çox zövq alıram. Yəqin ki, muğam bizim milli dəyərimiz olduğu üçün bu musiqiyə çox bağlıyam. Amma repertuarlarımda klassik və ən əsası dünya musiqiləri də yer alır.

- Hansı musiqi festivallarında çıxış etmisiniz?

- Naxçıvanda musiqi məktəbində oxuyanda bir neçə müsabiqədə iştirak etmişəm. Musiqi məktəbləri arasında Heydər Əliyevin anadan olmasının 85-ci ildönümünə həsr olunmuş IV Respublika müsabiqəsində II yerə layiq görüldüm.

- Musiqi təhsiliniz haqqında məlumat verərdiniz.

- Musiqi məktəbində ilk tar müəllimim atam olub. Tarın bütün sirlərini atamdan öyrənmişəm. Daha sonra isə Naxçıvan musiqi kollecində tar ixtisası üzrə təhsil aldım. Orada müəllimlərim bəstəkar Əkrəm Məmmədli və Tağı Tağıyev olub. O, mənimlə professional şəkildə məşğul olub. 2012-ci ildə Milli Konservatoriyanın Xalq çalğı alətləri şöbəsində tar ixtisasına qəbul oldum. Burada müəllimim Aslan Növrəslidir.

- Muğam müsabiqələrində iştirak etməyi düşünürsünüzmü?

-Əlbəttə. Bunun üçün hazırlaşıram. Çünki professional səhnə ilk əvvəl müsabiqədən başlayır və burada öz istedadını və bacarığını göstərirsən. Mən müsabiqələrdə iştirak etməyi çox yüksək qiymətləndirirəm. Ən əsası bu müsabiqəyə daha çox diqqət ayırdıqlarına görə böyük məmnunluq hissi duyuram.

-Bir gənc kimi cəmiyyətə baxışınız.... Bu gün incəsənət sahəsində gənclərin rolunu necə qiymətləndirirsiniz?

- Hal-hazırda musiqiyə axın çoxdur. Universitetdə, kollecdə təhsil alan tələbələr kifayət qədərdir. Amma hamı musiqiçi olmalıdır deyə bir şey yoxdur. Bu sahə elədir ki, gərək ilk növbədə istedad, musiqi duyumun və ən əsası bu sahəyə marağın olsun.

-Ətrafınızda olan gənclər daha çox nəyə meyil edir? İncəsənətimizdə nəyin dəyişilməsini istəyirsiniz?

- Ətrafımda olan gənclərin çoxu bayağı musiqiləri dinləyir. Bu da təbii ki, onların davranışlarına, mədəniyyətlərinə mənfi təsir göstərir. Telekanallarda bayağı musiqilərin yerinə muğam, xalq mahnıları səslənsə, daha yaxşı olar. Həmçinin efirlərdə yayımlanan verilişlərə diqqət edilsə, daha gözəl olar. Çünki efirlərə sabahımızın gəncləri baxır.

- Bir musiqiçi kimi bugünkü musiqiçilərin zövqü barədə nə deyə bilərsiniz?

- Çox az olsa da, yaxşı zövqü olan musiqiçilərimiz var. Amma çox heyf ki, tarda belə, bayağı musiqilər ifa olunur. Mən bunu milli dəyərlərimizə hörmətsizlik hesab edirəm. Çünki tar bizim babalarımızın əmanət etdiyi bir sərvətdir...

-Kamança ustadımız Habil Əliyevdir. Bəs sizin fikrinizcə, tar ustadımız kimdir?

- Mənim fikrimcə, Əkrəm Məmmədli yaxşı tarzəndir. Amma Ramiz Quliyevi onunla heç müqayisə etmirəm. Çünki hər kəsin öz yeri var. Bununla yanaşı, Elçin Haşımov, Malik Mansurov, Ağasəlim Abdullayevin də adlarını vurğulaya bilərəm.

-Dərs zamanı müəlliminizin hansı sirlərinə yiyələnmisiniz?

- Əkrəm müəllim mənə klassik musiqinin, Tağı müəllim isə muğamın incəliklərini öyrətdi. Konservatoriyada isə muğam müəllimim Ramiz Əzizovdur.

Xəyalə GÜNƏŞ

Palitra.-2013.-1 may.-S.15.