“Bir neçə universitetə qəbul
olsam da, İstanbul Texniki Universitetini seçdim”
Ayan Ağazadə:
“Taekvondo və kapoeyra ilə məşğul olmağım təhsilimə mənfi
təsir
etmir”
“Palitra”nın xaricdə
təhsil
alan gənclərlə bağlı rubrikasının
budəfəki qonağı Ağazadə Ayandır. Ayan, Türkiyədə ali təhsilini davam etdirən savadlı,
aktiv gənc olmaqla yanaşı idman fəaliyyətində də
bir sıra uğurlara imza ata bilib. O, həm də
bir vaxtlar teleaparıcı kimi də
tamaşaçıların sevimlisi olub. Ayan Ağazadə
ilə
olan müsahibəni oxuculara təqdim edirik.
-Ayan xanım, özünüz
barədə ətraflı məlumat verərdiniz.
-Mən,
Ağazadə
Ayan, 1995-ci ildə Bakı şəhərində anadan olmuşam və
134 nömrəli
orta məktəbi
bitirmişəm.
Orta məktəbdə oxuyarkən məktəbin ictimai həyatında
aktiv iştirak etmişəm.
4 yaşımdan rəqslə, bədii
gimnastika və rəssamlıqla
məşğul
olmuşam. Hətta, orta məktəbin ictimai
həyatında
aktiv iştirakıma,
dərslərimdə və
rəssamlıqda
qazandığım uğurlara
görə
bir neçə diplomla təltif
olunmuşam. 5 yaşımdan
etibarən
isə
4 il ərzində "Space" telekanalında "Böyüklər bizi görməyəndə" verilişinin aparıcısı
olmuşam. 2007-ci ildə
isə
ANS telekanalında "Bala
dili" verilişinin
aparıcısı oldum.
Bundan başqa "Təbəssüm" və
"Lalələr " rəqs
ansambllarının üzvü
olarkən
bir neçə dəfə Azərbaycanı
Türkiyənin
Ankara və
Mersin şəhərlərindəki
festivallarda təmsil etmişəm.
- Bəs necə oldu ki, Türkiyədə təhsil almaq qərarı
verdiniz? Bu ölkədə təhsil şərtləri çətin
deyil ki?
-Uşaqlıqdan mənim ən böyük arzularımdan
biri xaricdə təhsil almaq olub. Orta məktəbi bitirdikdən sonra təhsilimi
xaricdə
davam etdirmək qərarına
gəldim
və
hətta
bir neçə universitetə
qəbul
olundum. Onların içərisindən İstanbul Texniki Universitetində
İqtisadiyyat fakültəsini seçməli
oldum. O ki qaldı seçimimin məhz
Türkiyə
olmasına, buna səbəb kimi deyə
bilərəm ki, Türkiyədə
Avropanın ən reytinqli ingilisdilli universitetlərinin daha çox olmasıdır. Türkiyədəki təhsili
heç də asan adlandırmaq olmaz. Biz orada
təkcə nəzəriyyədən deyil, həmçinin
gözəl
praktiki dərslərdən də
bəhrələnirik.
-Tələbələrimizin aktivliyi
hansı səviyyədədir? İctimai diaspor
işlərində fəallıq
göstərirsinizmi?
-Tələbələrimizin
əksəriyyəti universitetin ictimai həyatında
aktiv iştirak edirlər.
Əksər tələbələrimiz müxtəlif
təşkilatların
üzvləridirlər. Yəni, təşkilatlar
da aktivlik göstərirlər, gənclərimizlə işləməyi sevirlər.
Buna misal olaraq
“AZEDER” təşkilatını
göstərə bilərəm. Bu qurum mütəmadi olaraq müxtəlif tədbirlər keçirir və tədbirlərdə bizim tələbələr
fəallıq
göstərirlər. Konkret olaraq mənim
fəaliyyətimə gəldikdə isə
hər
zaman aktiv olmağa çalışıram.
Lakin idmana vaxtımın çoxunu ayırıram deyə,
ictimai işlərdə hər zaman aktivlik göstərmək mümkün olmur. Vaxt azlığı belə yerdə
öz sözünü
deyir.
-Rəqs, bədii gimnastika, daha sonra isə
kapoeyra və taekvondo ilə
məşğul
olmusunuz. Hansı daha çətindir? Rəqs
və
bədii
gimnastika xanım üçün məqbul sayılır, kapoeyra və
taekvondo ilə məşğul
olmağınız bir
qədər çətinliklər yaratmadı ki?
-İdmanın hər növü özünə görə
çətin
və
əziyyətlidir. Həyatımın vacib hissələrindən
biri idmandır. Mən, kapoeyra və taekvondo döyüş növləri
ilə
ciddi məşğul oluram.
2012-ci ildə
kapoeyra üzrə respublika çempionatında
ikinci yer tutmuşam, 2013-cü ildə isə
kapoeyra üzrə dünya çempionatında
iştirak etmişəm. “Sizin üçün
belə
idman növlərinə üstünlük verməyi çətinlik
yaratmır ki” sualınıza gəldikdə isə
bir çoxlarının
mənim
bu seçimimə ilk reaksiyası demək olar ki, neqativ
idi. Bu məsələyə bir qədər "şübhəli"
yanaşanların içində mənim
anamın da adını çəkmək olar.
İdmanla məşğul
olursansa, zədələr
də
qaçılmaz olacaq.
Təbii ki, məndə də idman məşğuliyyətləri zədələrsiz
ötüşmədi.
Lakin taekvondo və kapoeyrada
zədələrin sayı
bədii
gimnastikadan qat-qat çox idi. Ümumiyyətlə, bir şeyi
qeyd edim ki, mən
uşaqlıqdan rəqs etməyi
çox sevirdim, konsert və
festivallarda çıxışlarımdan
isə
daim məmnun qalırdım.
Ən çox
qürurverici anlardan biri isə o idi ki, mən
bu festivallarda öz vətənimi təmsil
edirdim və səhnəyə
çıxırdım. Böyüdükcə maraqlarım dəyişdi və
mən
daha ciddi idman növünə üz tutdum. Seçimim isə
rəqslə döyüşü özündə birləşdirən Braziliyanın idman döyüş növü
kapoeyra oldu.
- Deyirlər,
ikinci yer tutmağın özü də
çempionatın qalibi
olmağına bərabər sayılır. Siz də
2012-ci ildə
kapoeyra üzrə 2-ci yerə
layiq görülmüsünüz.
- Haqlısınız. Amma kapoeyra
üzrə
ilk çempionatımda çıxış
etmək
təəssüf
ki, mənə
qismət
olmadı. Yarışlardan bir qədər öncə
həkimlərim və
valideynlərim
qəti
surətdə məni
məşqlərdən uzaqlaşdırdılar.
İdmandan imtina etmək mənim
üçün təsəvvüredilməz
bir mənəvi
zərbə idi. Lakin həkimlərin obrazlı şəkildə desəm,
təqibinə baxmayaraq, çoxsaylı müalicə
prosedurlarından sonra
nəhayət ki, məşqlərə qayıtdım.
İkinci çempionata hazırlıqlara
başladım və bu hazırlıqlar da, demək
olar ki, asan keçmədi. Çünki həmin
ərəfədə
bütün vaxtımı
və
gücümü universitetə hazırlaşmağa sərf edirdim. Bütün bunlara baxmayaraq,
mən
əzmkarlıq
göstərərək respublika
çempionatında ikinci
yerə
çıxa bildim.
Bu yerə
layiq görüldüm
və
kapoeyra üzrə milli komandamıza üzv seçildim. Bundan sonra isə
mən
təhsil
almaq üçün
İstanbula getməli oldum. Bu səbəbdən
də
Bakıdakı yarışlarda
iştirak edə bilmədim.
-Türkiyədə necə, bu fəaliyyətinizi davam etdirə bildinizmi?
- Əlbəttə. İstanbula gələrkən
ilk növbədə, buranın kapoeyra idman klubları ilə
maraqlandım və sevimli idmanımı Türkiyədə davam etdirmək qərarına gəldim. İstanbuldakı məşqlər məni
qane etmədiyindən,
qərara
gəldim
ki, olimpiya döyüş növü
olan taekvondo ilə
məşğul
olum. Taekvondoda təcrübəmin hələ ki, olmaması səbəbindən irimiqyaslı yarışlarda
iştirak etməmişəm. Bu yarışlarda iştirak etmək üçün
idmançının qırmızı-qara
və
ya qara kəməri olmalıdır.
Mənim isə
hələ ki, qırmızı kəmərim var. Türkiyədə taekvondo ilə 4-5 ay məşğul olandan sonra klub
yarışlarında iştirak
etməklə üçüncü yerə layiq görüldüm.
-Ayan xanım, televiziya fəaliyyətiniz də
olub. Bir çox hallarda
televiziyada aparıcı
işləmək gənclər üçün tramplin rolunu oynayır. Yəni, buradan müəyyən dövlət işlərinə getmək
üçün istifadə edirlər
və
daha perspektivli qurumlara baş vururlar. Nə əcəb,
sizdə
belə
maraq olmayıb?
- Öncə onu deyim ki, uşaq olarkən vaxtımın çoxunu anamın işlədiyi televiziya kanalında keçirirdim. Anam montaj otaqlarında, çəkiliş meydançalarında işləyərkən, mən də sözün həqiqi mənasında beləcə televiziya təcrübəmi artırırdım. Bu təcrübə mənə gələcəkdə uşaq verilişinin aparıcısı olarkən gərək oldu. Aparıcılıqdan böyük zövq aldığıma baxmayaraq, məktəbdəki dərslərimdən və sevimli idmanımdan geri qalmaq istəmirdim. Buna görə mənim seçimim oxumaq və gələcəkdə iqtisadçı olmaq idi. Qısası, mən də dediyiniz amillərə meyil etməmişəm və heç vaxt telekanal fəaliyyətimdən tramplin kimi istifadə etmək niyyətim olmayıb.
- Aktiv
gənc
kimi bugünkü Azərbaycan
gəncliyini
necə
xarakterizə edərdiniz? Ümumiyyətlə,
sizin kimi
çoxşaxəli fəaliyyət
xəttini
seçmək istəyən
gənclərimizə
hansı məsləhətləri
verərdiniz?
-Həmvətənlilərimə və həmyaşıdlarıma məsləhətim bu olardı ki, ürəyinizin səsinə qulaq asın. O, sizi heç vaxt aldatmaz və düzgün qərarların qəbulunda köməyiniz olar. İstədiyiniz kimi addım atın. Çünki bu, sizin həyatınızdır. Yanlış addımlardan heç kəs sığortalanmayıb. Səhviniz olsa belə, bu, sizin üçün həyat dərsi və yeni başlanğıcın bünövrəsi olacaq. Özünüzə inanın, özünüz olmağa çalışın. Siz bu həyatda təkrarolunmazsınız, həyat isə, təəssüf ki, çox qısadır və özünüzü bir kimsəyə bənzətməyə dəyməz. Və nəhayət, xoşbəxt olun! Bütün bu məsələlərə fikir verilsə, insan uğurla irəliləyə bilər.
-Gələcəkdə
həyata
keçirmək istədiyiniz
hansısa planlarınız varmı?
-Planlarım çoxdur, bunların əsası - öz sənətim üzrə gözəl mütəxəssis olmaq və idmanda ən yüksək zirvələri fəth etməkdir. Sizin qəzetinizə isə çoxlu oxucu və uğurlar arzu edirəm. Peşənizdə və həyatınızda ən yüksək zirvələrə çatmağı arzulayıram. Seçdiyiniz yol şərəfli yoldur və gənclər üçün yer ayırdığınız üçün də ayrıca təşəkkürümü bildirirəm.
Tural Tağıyev
Palitra.-2014.-4 fevral.-S.5.