Yeni sağlamlıq meydançaları gənc nəslin fiziki inkişafında böyük rol oynayır

Gənc nəslə sağlam həyat tərzini təbliğ etmək, onların fiziki və mənəvi inkişafına yardım etmək dövlətin prioritetləri sırasında yer alır

Layihə çərçivəsində təqdim etdiyimiz yazı yeni istifadəyə verilən sağlamlıq meydançalarının gənc nəslin fiziki-mənəvi inkişafında oynadığı rolla bağlıdır. Qeyd edək ki, bir neçə gün əvvəl Dənizkənarı Milli Parkın ərazisində Bakı sakinləri üçün açıq havada yeni sağlamlıq meydançasının təqdimatı olub. İdman qurğusu Azərbaycan Milli Olimpiya Komitəsinin təşəbbüsü, “Baltika-Bakı” şirkətinin dəstəyi ilə yaradılıb.

Açılış mərasimində Azərbaycan Milli Olimpiya Komitəsinin (MOK), Milli Paralimpiya Komitəsinin, “Baltika-Bakı” şirkətinin, Dənizkənarı Milli Park İdarəsinin nümayəndələri, tanınmış idmançılar, jurnalistlər iştirak ediblər.

Azərbaycan MOK-un vitse-prezidenti Çingiz Hüseynzadə bildirib ki, hazırda Azərbaycan dünyanın aparıcı idman dövlətlərindən birinə çevrilib. Ölkədə beynəlxalq səviyyəli müxtəlif idman yarışları keçirilir. O bildirib ki, ümumi sahəsi 550 kvadratmetr olan sağlamlıq meydançasının ərazisində 15 trenajor yerləşdirilib. Bu trenajorlar Bakının bütün sakinləri üçün nəzərdə tutulub: “Dənizkənarı bulvarda yaradılmış sağlamlıq meydançası MOK-un paytaxt sakinlərinə hədiyyəsidir. Meydançanın universal olması onun üstünlüklərindən biridir. Meydançadan istər 12 yaşından böyük olan uşaqlar, istər yaşlılar, istər professional idmançılar, istərsə də idmanla yeni məşğul olanlar istifadə edə bilərlər. Sağlamlıq meydançasını inşa edərkən fiziki imkanları məhdud olan şəxsləri də unutmamışıq. Onlar üçün meydançada 2 xüsusi trenajor qoyulub. Əlil arabasından istifadə edən vətəndaşlar isə xüsusi girişdən keçib meydançaya gələ bilərlər”. “Baltika-Bakı” şirkətinin baş direktoru Sergey Tolmaçov bildirib ki, başçılıq etdiyi şirkət sosial məsuliyyətli qurum kimi fəaliyyət göstərdiyi regionlarda xeyriyyəçiliklə məşğul olur, sponsor yardımı göstərir, o cümlədən idmanın inkişafına kömək edir: “İstərdik ki, yeni idman meydançası Bakı sakinlərinin sağlamlıqları üçün faydalı vaxt keçirə biləcəkləri məkana çevrilsin. İdman sağlamlıqdır”.

Dənizkənarı Milli Park İdarəsi rəisinin müavini Nazim Məcidov, Milli Paralimpiya Komitəsinin vitse-prezidenti Şaiq Həmidov və digər natiqlər paytaxt sakinlərinə göstərdikləri diqqət və qayğıya görə təşkilatçılara minnətdarlıqlarını bildiriblər.

Bakı bulvarında belə bir idman meydançasının istifadəyə verilməsi gənc nəslin sağlamlığının qorunmasında böyük rol oynayır. Uşaq və yeniyetmələri mənfi vərdişlərdən uzaqlaşdıraraq onların idmana yönləndirilməsi gənc nəslin fiziki və mənəvi inkişafında böyük rol oynayır. Bulvar ərazisində yerləşən, ictimaiyyət üçün açıq olan və istifadəsi pulsuz olan idman meydançası lazımi idman qurğuları ilə təmin edilib. Yaxın gələcəkdə bulvar ərazisi genişləndikcə, pulsuz idman meydançalarının sayının da artırılması nəzərdə tutulur. Həmin meydançadan istifadə edənlərin böyük əkəsriyyətini yeniyetmələrin təşkil etməsi sevindirici haldır. Dövlət bu yolla sağlam həyat tərzini təbliğ edir və bunun üçünü müasir üsullardan istifadə edir. Bakı bulvarı gənc nəslin ən çox axın etdiyi yerlərdən biridir. Belə ərazidə pulsuz idman qurğularının olması onların idmana marağının artmasına şübhəsiz ki, müsbət təsir göstərəcək. Gənc nəslə sağlam həyat tərzini təbliğ etmək, onların fiziki və mənəvi inkişafına yardım etmək dövlətin prioritetləri sırasında yer alır. Bu siyasəti idmanın inkişafı çərçivəsində dəyərləndirmək daha doğru olar. Bu gün ölkəmizdə idmanın inkişafı istiqamətində həyata keçirilən işlər Azərbaycan idmanının dünyadakı nüfuzunu xeyli artırıb. Bu inkişaf və nüfuz idmançılarımızın beynəlxalq yarışlarda əldə etdiyi medalların və ölkəmizdə keçirilən beynəlxalq turnirlərin sayında əksini tapıb. Bu iki bir-birinə bağlı olan məsələnin arxasında Azərbaycan dövlətinin gördüyü nəhəng iş və əmək dayanır. Azərbaycan dövləti idmanın inkişafında nə qədər maraqlı olduğunu həyata keçirdiyi siyasət və bu sahəni prioritetlərindən biri elan etməsi ilə ortaya qoyub. Məlumdur ki, idmanla məşğul olanların böyük əksəriyyəti gənclər və bu sahədə böyük gənclik ordusu cəmləşib. Deməli, idman cəmiyyətin ən aktiv təbəqəsi olan gəncləri öz ətrafına cəmləməklə pis vərdişlərə meyillənməyin qarşısını alır. Müasir dövrümüzün tələbləri elədir ki, mənfi vərdişlərin qarşısını almaq çox çətinləşib. Xüsusilə gənclər arasında müxtəlif mənfi vərdişlərin yayılma arealı və təsr vasitələri çox artıb. İnternetin həyatımıza bu qədər sürətlə daxil olduğu, qloballaşmanın mənfi təsirlərindən qorunmağın bu qədər çətin olduğu bir zamanda idmanın inkişaf etdirilməsi çox aktualdır. Belə ki, idmanı kütləviləşdirməklə, bu sahəyə daha çox yeniyetmə və gənci toplamaqla həm dünyada ölkəmizi təmsil edən idmançılar yetişdirmək, həm də mənfi vərdişlərdən uzaq sağlam gənc nəsil yetişdirmək mümkündür. Azərbaycanın idman sahəsində qazandığı uğurlar sağlam gənc nəsil yetişdirilməsində də böyük nailiyyətlər əldə edilməsi ilə nəticələnib. Şübhəsiz ki, bu uğurların arxasında Azərbaycanda dövlət başçısının rəhbərliyi aldtında həyata keçirilən idman siyasəti dayanır. Hansı ki, həmin siyasət həm ölkəmizin idman ölkəsi kimi tanınmasını təmin edib, həm də ölkədə idman ətrafında böyük gənclik ordusu toplayıb. Bu məsələdə bölgələrdə inşa edilərək yerli sakinlərin istifadəsinə verilən müasir Olimpiya Kompleksləri böyük rol oynayır. Dünyada az belə ölkə tapıla bilər ki, qısa müddət ərzində demək olar ki, bütün bölgələrini müasir idman qurğuları ilə təmin edə bilsin. Azərbaycada dövlət başçısının həyata keçirdiyi siyasətin əsas özəlliklərindən biri də ondan ibarətdir ki, müasir idman qurğuları inşa edilərkən kompleks şəkildə işlər həyata keçirilərək müasir infrastruktur yaradılır. Bu amillər isə yeniyetmə və gəncləri idmana istiqamətləndirir. Azərbaycan Prezdentinin qeyd etdiyi kimi ölkəmizdə güclü nəsil yetişib: «Azərbaycanda çox güclü gənc nəsil yetişir, o cümlədən idman sahəsində. Regionlarda Olimpiya İdman Kompleksi tikilib ki, bizim uşaqlar, yeniyetmələr bu komplekslərdən səmərəli şəkildə istifadə edirlər. Yəni, idman infrastrukturunun yaradılması nəticəsində biz hər bir bölgədə idmanla məşğul olmaq üçün gözəl şərait yaratmışıq. Bizdə istedadlı idmançılar çoxdur - uşaqlar, gənclər, yeniyetmələr. Təsadüfi deyildir ki, yeniyetmələr arasında I Olimpiya Oyunlarında Azərbaycan 11-ci yerə çata bilmişdir. Bu, dünya miqyasında çox böyük nəticədir. Yəni, gənc nəsil yetişir. Onlar yaxın illərdə böyüklər arasında keçiriləcək yarışlarda da iştirak edəcəklər. Olimpiyaçılarımızın da əksəriyyəti gənclərdir. Bizim Olimpiya çempionumuz Toğrul Əsgərovun heç 20 yaşı yoxdur. Yəni, bu insanlar, bu gənclər, bu idmançılar son illər ərzində yetişib, püxtələşib və artıq dünyanın bir nömrəli idman yarışının qalibləri olmuşlar. Yəni, bütün bu işlərin təməlində düşünülmüş siyasət və ardıcıl, məqsədyönlü fəaliyyət dayanır. Mən çox şadam ki, gənclərimiz idmana meyillidirlər. Azərbaycan dövlətində idmana və xüsusilə, idmançılara hörmət, qayğı, dəstək gəncləri də, uşaqları da idmanla məşğul olmağa sövq edir. Mən hesab edirəm ki, hər bir bölgədə, - bu, artıq reallıqdır, - idmançılara daha da böyük diqqət və dəstək göstərilməlidir”.

Anar Miriyev

Palitra.-2014.-7 may.-S.11.