“Gənc nəslin mənəvi
inkişafında incəsənətin rolu
böyükdür”
Gənc modelyer-rəssam
Aysel Davudqızı:
“Çalışdığım qədər gənclərə
fikirlərimlə kömək olub, onlara istiqamət göstərirəm. Modelyer olmaq istəyən
gənclər bu peşəni dərindən
öyrənməlidirlər”
Ölkəmizdə
həyata keçirilən gənclər siyasəti onların
fiziki-mənəvi baxımdan sağlam nəsil
kimi yetişdirilməsinə xidmət edir. Müxtəlif sahələrdə həyata
keçirilən tədbirlər gənclərin tariximizi, mədəniyyətimizi, incəsənətimizi
daha dərindən mənimsəməsinə
imkan verir. Bu gün gənclər idman yarışlarında
çıxış edir, muğam
müsabiqələrində iştirak edir, bir sıra rəsm sərgilərində
öz əsərlərini təqdim edirlər.
Bununla da belə
müsabiqələrdə, yarışlarda iştirak
etməsi gənclərimizin mənəvi inkişafında mühüm rol oynayır.
Budəfəki müsahibimiz məhz belə
gənclərdən biri, gənc modelyer-rəssam
Aysel Davudqızıdır:
-Mən gənc rəssam olaraq düşünürəm ki, gənc nəslin mənəvi inkişafında incəsənətin rolu böyükdür. Rəssam, modelyer, müğənni, istərsə də aktyor olsun, onların hər biri adi peşə sahiblərindən fərqli olaraq, həyata daha rəngarəng və yaradıcı gözlə baxırlar. Bu isə onların rəngli dünyasını əks etdirir. Deyərdim ki, incəsənət ruhun qidasıdır. Hətta stress yaşayan insanlar rəsm çəkməyə başladıqdan sonra özlərini yaxşı hiss edirlər. Psixoloqlar bir çox xəstələrini məhz rəssamlığa yönəltməklə müalicə edirlər. Çünki rəsm işləyərkən insan özünü unudur. Çəkdiyi şəkilin təsiri altında olur, bu isə çox gözəl bir duyğudur. Əsasən də stressdən əziyyət çəkən insanlar üçün böyük müalicədir. Biz rənglərlə işləyərkən rəng duyumunu da gözəlləşdiririk. Rənglərin ahəngini, rəngdən-rəngə keçməni, hər rəngin öz gözəlliyini hiss edirik. Rəssamlıq elə bir sənətdir ki, onu öyrənərkən insan anatomiyasını bilmək vacibdir, məsələn, biz bilməliyik ki, insan başı bədəndə 7 dəfə yerləşir. Biz insan portreti çəkərkən məhz bunlara diqqət etməliyik. Rəssamlarda hətta iti görmə qabiliyyəti vardır. Adi insanların görmədiyi xırda bir əyriliyi rəssam gözü tez görür. Hətta yoldan bir pişik keçirsə, biz onun skeletini artıq görürük, hər bir hərəkətini gözlərimizlə tuturuq. Bir ağaca baxarkən, kölgənin necə və haradan düşdüyünə diqqət edirik. Göydə buludların necə görünüşünə, necə hərəkət etdiyinə fikir veririk. Bunlar artıq biz rəssamların gündəlik həyat rejimidir. Çünki bu, ruhumuzdan gələn sənətdir.
- Gənc modelyer-rəssam kimi bu peşədə özünüzü necə görürsünüz? Necə oldu ki, bu sənəti seçdiniz?
- Modelyerliyə gəldikdə gənc modelyer-rəssam olaraq inanıram ki, yaxın gələcəkdə, özümü bu sənətdə, istədiyim yüksək pillələrdə görəcəyəm. Lap uşaq yaşlarımdan bu arzu ilə yaşamışam və moda aləmi ilə yaxından maraqlanmışam. Hər gün öz xüsusi fantaziyalarımla gəlinciklərimə geyimlər hazırlayırdım. İndi bəzi geyim modellərində, mənim uşaqlıqda düşünüb yaratdığım modelləri görəndə, çox sevinirəm. Mənim uşaq fikirlərimlə indiki dəb üst - üstə düşür. Modelyerlik 3 peşənin bir araya gəlməsi deməkdir. Hansılar ki, dərzilik, rəssamlıq və biçim-kəsim. Bu 3 sahə bir arada modelyerlik adlanır və bir-birini tamamlayır. Bir modelyer dərziliyi bilməsə, o, çəkdiyi eskizi göstərə bilməz, o baxımdan ki, modelyer çəkdiyi eskizi dərziyə anlatmalıdır ki, dərzi nə tikəcəyini bilsin, eləcə də biçim-kəsimi.
Rəssamlığa gəldikdə isə bu sənət mənim həqiqi mənada ruhumun qidasıdır. Mən özümü fırçalarsız, palitramsız və gözəl əsərlərimsiz təsəvvür edə bilmirəm. Əsərlərim mənim doğma balam- tək əzizdir, onları o qədər çox sevirəm ki, kiməsə əmanət etməyə belə çəkinirəm. O qədər həvəslə, ruhla, sevinclə, işləyərək ruhumu qoyuram ki, əsər bitdiyində bütün sevincimi orada tapıram. Kefsiz vaxtlarımda əsərlərimi düşünürəm və əhvalım düzəlir.
-Hansı sənətkarların əsərlərini dəyərləndirirsiniz və sizin üçün bir məktəb rolunu oynayıb?
- Əlbəttə ki, mən
də dəyərli rəssamlardan Fərhad müəllim,
Şəmsəddin Böyükdüzlü
müəllimdən, dərs almışam və daha çox özüm, öz üzərimdə
işləmişəm. Dahi dünya rəssamlarının əsərləri
ilə yaxından maraqlanıram. Lap kiçik yaşlarımdan Bob
Rossun əsərlərini, saatlarca
izləyirdim. Onlardan Salvador Dali, Modiglian,
Pikasor Pablo, Selapeni və.s göstərə bilərəm. Eləcə də Tahir Salahov, Səttar Bəhlulzadə, Toğrul
Nərimanbəyov və.
s bu kimi
dahi rəssamlar mənim üçün böyük məktəb olublar.
- Ötən müddət ərzində
sərgiləriniz təşkil
olunubmu?
- Əsərlərimlə bir çox sərgilərdə fəal
iştirak etmişəm. Bu yaxında Rusiya və Azərbaycanın birgə təşkil etdiyi "Qranatovoe Derevo" adlı sərgidə fəal iştirakıma görə,
diplomla təltif olundum, əsərim qonaqlar tərəfindən
çox maraqla qarşılandı. Hər kəs
o əsərimin ətrafında
şəkil çəkdirmək
istəyirdi, təbii ki, bu məni
çox sevindirirdi.
Baku Expo mərkəzində
"ADEX -2014" 33 ölkənin nümayəndəsi, 140-dan çox
şirkətin iştirak
etdiyi sərgidə, fəal iştirakıma görə sertifikatla təltif olundum. “ADEX-2014” sərgisi sülh mövzusunda idi. Mən bu sərgi üçün tank çəkdim,
amma tankı köhnəldib, pas atdırdım
və üstündə
güllər çəkdim,
içində kök
atmış ağac çəkdim, göyərçinlər
tankı əhatə etmişdi. Burada onu göstərmək
istəyirdim ki, müharibə olmasın,
o qədər sülh
olsun ki, tank bomba yox, gül
açsın. Bu əsərim hədsiz dərəcədə çox
alqışa səbəb
oldu. Hər kəs bəyəndi,
çox maraqlandılar,
hətta ukraynalı qonaqlar da çox
maraqlandılar. İndiyə kimi 10-dan çox sərgidə fəal iştirak etmişəm və əsərlərim dəyərləndirilib.
- Əsərlərinizdə
daha çox hansı amillərə üstünlük verirsiniz?
- Əsərlərimdə realizm və daha çox sürrealizm üstünlük
təşkil edir. Çəkdiyim şəkillər daha çox zəngin mövzusu ilə seçilir, mən çalışıram ki,
əsərlərimdə nəyisə
insanlara çatdırım.
Əsərlərimdən biri "Bəstəkarın
yarım qalmış
əsəri" adlanır
ki, bu əsərimdə
mövzu bir bəstəkarın tamamlaya
bilmədiyi əsərindən
gedir, qırıq musiqi aləti, köhnəlib yarı bölünmüş kağız
parçası. Burada onu
göstərmişəm ki,
bu bəstəkar əsəri tamamlaya bilməyib, bunun üçün o musiqi alətini belə qırmış, yarım
qalmış əsəri
məhv edib, onun nə qədər
əsəbi bir halını göstərir.
Amma bir tərəfdə bütöv gözəl təbiətdən gələn
saf meyvələr var, o isə onu göstərir ki, bəstəkarın ümidləri hələ
var və parçalanmayıb. Burada
da demək istəmişəm ki, insan nə qədər
əsəbi olsa da, daxilində bir sakitlik var , ümid
var.
Amma hələ
ki, fərdi sərgim təşkil olunmayıb. Mən çox istərdim
ki, mənə də bu şəraiti
yaratsınlar. Fərdi sərgim
ölkədaxili və
beynəlxalq səviyyədə
keçirilsin. Hələ ki,
beynəlxalq sərgilərə
çıxa bilməsəm
də yaxın gələcəkdə planlarımda
var.
-Bu gün gənclərin incəsənətə,
o cümlədən rəssamlığa
marağını necə
qiymətləndirirsiniz? İstedadlı gənclərimiz varmı və onlar bu
keyfiyyətlərindən nə
dərəcədə yararlanır?
- Ötən illərə baxanda bu il rəssamlığa
daha çox dəyər verilir. İstedadlı gənclərimiz çoxdur və onlar sərgilərdə fəal iştirak edirlər.
Modelyerliyə gəldikdə isə, hələ ki, bu peşəyə yetərincə dəyər
verilmir. Bu peşəyə
sahib olmaq istəyən
gənclərimiz çoxdur
və çoxları
mənə müraciət
edirlər. Çalışdığım qədər gənclərə
fikirlərimlə kömək
olub, onlara istiqamət göstərirəm.
Modelyer olmaq istəyən gənclər bu peşəni dərindən
öyrənməlidirlər. Yuxarıda qeyd etdiyim kimi,
dərzilik, rəssamlıq
və bicim-kəsimi bilməkləri vacibdir.
İnanıram ki, bu sənətə yaxın gələcəkdə daha
çox dəyər veriləcək. Bizim ölkədə
bu arzu ilə
yaşayan gənclər
də öz arzularına çatacaqlar.
Təbii
ki, müxtəlif mədəniyyət, incəsənət
sahələrini bilmək
də gənclərimizin
mənəvi inkişafına
öz təsirini göstərir.
- Gələcək planlarınız
nədir?
- Hazırda narkomaniya əleyhinə mövzu üzərində işləyirəm,
inşallah gözəl
bir əsər ərsəyə gətirəcəyəm.
Çalışıram bu əsərimdə
insanlara onu çatdırım ki, bu sizin sonunuzdur.
Bu pis vərdiş sizi ölümə sürükləyir, uzaq olun pis vərdişlərdən!
Mən bu əsərimdə insan beyninin necə məhv olduğunu, necə yavaş-yavaş beynin öldüyünü, qaralaraq
məhv olduğunu göstərirəm. Bu tip xəstə insanlar gözəllik dolu həyatlarını bax, beləcə qaraldıb sona çatdırırlar.
Halbuki, onların necə xoşbəxt həyatları ola
bilərdi və buradan gəclərə, yeniyetmə olanlara, özlərini narkomaniya qurbanına çevirmək
istəyən insanlara
səslənirəm - yol
yaxınkən dönün,
sonra hər şey gec ola
bilər. İrəliyə baxsanız necə
sevgi dolu həyat sizi gözləyir, ona çatmağa tələsin.
Mənim
kiçik, amma mövzu barədə zəngim əsərim bunu deyir insanlara.
Gələcək planlarım çoxdur. Onların həyata
keçirilməsi üçün
çalışıram. Bu günlərdə bir məktəblə razılığa gəlmişəm.
Artıq
peşəmi, sənətimi
uşaqlara öyrətmək
üçün onları
hazırlayacam.
Nigar Abdullayeva
Palitra.-2014.-8 noyabr.-S.11.