Şəhidlərin ili gəlir...

(20 Yanvar - şəhid günü)

Şəhidlərin ili gəlir...

Dünya elə həminkidi!

Yaxa çəkmə belə dərddən

Səninkidi, mənimkidi!

Yaddan çıxmaz Şəhid günü,

Var azadlıq doğma yurdda.

Tökülübdü Şəhidlərin

Bu torpağa qanı burda!

Xiyabanda olan qəbir,

Mənə demə kiminkidi?

Başdan başa, bu birbəbir

Sizinkidi, bizimkidi!

Dedik buna verin qiymət,

Ey dünyanın insanları!

Nahaq yerə kim axıdıb

Torpağıma bu qanları!

Yaş axıtdıq gözümüzdən,

Baxdı bizə hərə bir cür.

Bizim belə günümüzdən,

Kimsə aldı bir təşəkkür!

Qara geymə, a millətim,

Düşmən bizə gülə bilər.

İnanma ki, hər can deyən,

Dərdimizi bilə bilər!

Nə görmədik bu dünyada,

Nə çəkmədi öz başımız!

Heç bilməzdik düşmən üçün

Ağırıymış duz daşımız!

Qoy açılsın düşmənlərin

İsladılmış bu düyünü.

Çıxmaz xalqın yaddaşından

20 Yanvar - şəhid günü!

Fələk

Qatil kimi qılınc çalıb,

Göz yaşımla doyma, fələk!

Çəmənimə şaxta salıb,

Tər qönçəmə qıyma, fələk!

Atmayaydın bağrıma daş,

Axmayaydı gözümnən yaş.

Dözməz artıq bəlalı baş.

Dərd əlində qoyma, fələk!

Bir bulağam coşqun sulu,

Olub üstüm karvan yolu.

Nədir yenə gözüm dolu,

-Daş üstünə yayma, fələk!

Bir şimşəkdi çaxılıbdı,

Kövrək könlüm sıxılıbdı.

Qönçə gülüm yıxılıbdı,

Bunu ömür sayma, fələk!

Ürəyimdə sözüm qalıb,

Dağ olmuşam, dözüm qalıb?

Zirvələrdə gözüm qalıb,

Kor eyləyib oyma, fələk!

Vahid bağban, bağı belə...

İstəmirdim axı belə.

Naşı çəkdi, dağı belə,

Qamətimi əymə, fələk!

Sən xətrimə dəymə, fələk!

Fələyin insafı yoxdu,

nə deyim?..

Heyranam hökmünə mən də zamanın,

Bir şimşək üstümə çaxdı, nə deyim?

Sərhəddi olmazmı ahın, amanın

Arandı, nə deyim, dağdı, nə deyim?!

Karvanım bir yolun izinə düşdü,

Gözlərim yaylağın düzünə düşdü?

Sinəm bir ocağın közünə düşdü,

Qəlbimi sıxanlar sıxdı, nə deyim?!

Hökm etmə üstümə, ömrümün qışı,

İslanıb yolumun torpağı, daşı,

Dərd əhli olsam da, deyiləm naşı

Məndən üz döndərsə, bəxtdi, nə deyim?!

Varmı harayımız, varmı ünümüz,

Dağ olub dözürük hələ yenə biz.

Bu bizim ömrümüz, bizim günümüz,

Qaradı, nə deyim, ağdı, nə deyim?!

Daha artıq nə gizlədim, nə danım,

Bahar üstə qış da görsən döz, canım.

Axan Araz ya göz yaşım, ya qanım,

Fələyin insafı yoxdu, nə deyim?!

Vahidin talandı torpağı, daşı,

Ellər bildimi ki, cavandı yaşı?

Belə ağarmazdı, ağardı başı,

Bir qışın qarıdı, yağdı, nə deyim?!

Qarabağsız qara

baxtım qarıyar!

İndi məni nə danışdır, nə dindir,

Heç bilmirəm belə həsrət nədəndir.

Qürbətdə də Vətən elə vətəndir,

Qarabağsız qara baxtım qarıyar,

Belə dərdlə kim yaşayar, yarıyar?

Çox görmüşəm, yuxularım çin olmur,

Kölgə basmış quzeylərim gün olmur,

Artıb dərdim, günü-gündən min olmur?!

Qarabağsız qara baxtım qarıyar...

Belə dərdlə kim yaşayar, yarıyar?

Yanan yerim quru deyil, yaş deyin.

Mən bu dərdə dözə bilsəm, daş deyin!

Belə ömrə bir baharsız qış deyin,

Qarabağsız qara baxtım qarıyar,

Belə dərdlə kim yaşayar, yarıyar?

Vahid Dumanoğlu

Palitra.-2015.-20 yanvar.-S.15.