Unuda bilmirəm

Unuda bilmirəm

Yadıma düşürsən yaman,

Səni unuda bilmirəm.

Ey alagöz, qaşı kaman,

Səni unuda bilmirəm.

Qəbahət nə sevən kəsdə,

Dərdindən olmuşam xəstə.

Yerin var gözümün üstə,

Səni unuda bilmirəm.

Xoş keçməyir ayım,ilim,

Ünvanını söylə bilim.

Harda olsan ora gəlim,

Səni unuda bilmirəm.

Sevgidə olsan naşı yar,

Ürək qəm yükü daşıyar.

Nə edim ki, biixtiyar,

Səni unuda bilmirəm.

Bölüşməliyik

Gör neçə vaxt ötür

görüşümüzdən,

Biz yenə səninlə görüşməliyik.

Sanki kədər yağır

gül üzümüzdən,

Kədəri sevinclə dəyişməliyik.

Tamarzı qalmışıq zərif hislərə,

O xoş gülüşlərə, gözəl səslərə.

Həsrətlə baxınca

sevən kəslərə,

Biz olub keçəni bölüşməliyik.

Gəl ki, unutmayaq bir -birimizi,

Sevən qəlbimizdə xatirə izi.

Tanrıdan diləyib taleyimizi,

Biz ömür boyunca

sevişməliyik.

Məhəbbətim

Ürəyimə kədər dolmuş,

Boğazımda qəhər donmuş.

Eşqin yolu eniş-yoxuş,

Bu yolu aşmaq nə çətin-

Hardasan, ey məhəbbətim?

Ərşə çatıb naləm,ahım,

Ey and yerim,qibləgahım.

Axı sənsən tək pənahım,

Sonu yoxmu bu həsrətin-

Hardasan, ey məhəbbətim?

Darıxıram sənsiz yaman,

Diləyirəm səndən aman.

Gələcəksən bəs nə zaman,

Gəl bu yolda olaq mətin -

Hardasan, ey məhəbbətim?

Sən sevgimin şah əsəri,

Gəl unudaq dərdi,səri.

Nazlı nigar,gözəl pəri,

Bumu sevgiyə hörmətin -

Hardasan, ey məhəbbətim?

Tək sənə salmışam meyil,

Gəl Elnurun dərdini bil.

Sənsiz ömrüm ömür deyil,

Sən özüsən səadətin-

Hardasan, ey məhəbbətim?

Palitra.-2016.-6 may.-S.15.