“Təhsilə sinergetik
yanaşma tətbiq etmək
lazımdır”
Füzuli Qurbanov: “Sinergetik
yanaşma qlobal düşüncə formalaşdırır”
“Sinergetika”
həm də fəlsəfənin tədqiq etdiyi
bir sahədir. AMEA Fəlsəfə,
Hüquq və Sosiologiya
İnstitutunun İdrak
nəzəriyyəsi və elmin fəlsəfəsi
şöbəsinin müdiri, fəlsəfə
elmləri doktoru Füzuli
Qurbanovla layihə çərçivəsində
söhbətimiz elmin sinergetika
sahəsi və bununla bağlı Azərbaycanda
olan tədqiqatlar, mövcud
durum və problemlər barəsindədir.
F.Qurbanov öncə sinergetika
ilə bağlı məlumat verməklə söhbətə
başladı:
- Sinergetika yunan sözü olub, hərfi mənası kollektiv hərəkət deməkdir. Bu termini ilk dəfə bizim işlətdiyimiz mənada 1970-ci ildə alman fiziki Herman Haken elmə daxil edib. O, fizika üzrə tələbələrə dediyi mühazirədə lazerin öyrənilməsində kollektiv hərəkətlərin sinxronlaşma və harmoniyanın rolunu qabartmağa çalışıb. Burada, əsasən, məqsəd nədir. Necə olur ki, çoxsaylı elementi olan sistem hansısa gücün təsiri altında xaotik durumdan nizamlı hərəkətə keçir? Sinergetika məhz belə çoxtərkibli elementlərdən ibarət sistemin çoxhərəkətli nizamını, harmoniyasını öyrənir. Bundan başqa, sinergetika nizamlı hərəkətlərdən xaotik hərəkətə keçidi də öyrənir. Sinergetika daha sonra Avropanın digər yerlərində öyrənilməyə başlayır. Həmçinin Amerikada bununla bağlı hazırda institutlar elmi tədqiqatlarında sinergetik metodlardan istifadə ediblər. Rusiyada Kurdyumovun rəhbərlik etdiyi bir qrup sinergetikanın metodlarından istifadə edərək sinergetik sistemləri öyrənib. Daha sonralar isə sinergetika sahəsi inkişaf etməyə başlayıb və yeni-yeni məsələlər ortaya çıxıb. Sinergetikanın metodları vasitəsilə bioloji və sosial sistemləri öyrənməyin mümkün olub-olmaması araşdırılmağa başlayıb. Cəmiyyətin bu metodlarla öyrənilməsi aktuallıq kəsb etməyə başlayıb. Burada da birmənalı fikir yoxdur. Belə ki, bir qrup alim deyir ki, cəmiyyəti sinergetik metodlarla öyrənmək mümkündür və onlar sosial sinergetika anlayışından danışırlar. Digərləri isə buna şübhə ilə yanaşır və deyir ki, sinergetika təbiətşünaslıqdan yaranıb. Deyirlər ki, təbiətşünaslıqda yaranmış metodların sosial sahəyə tətbiqi heç də həmişə gözlənilən effekti vermir. Bu zaman həm metodoloji, həm də praktiki nəticə almaq baxımından qüsurlar ola biləcəyini düşünənlər də var. Bütün bunlara baxmayaraq, 1970-ci ildən bu yana sinergetikanın cəmiyyətdə öyrənilməsinin tətbiqi ilə ciddi surətdə məşğul olurlar. Elə həmin illərdə - təqribən 1974-cü ildə alman alimi Vaydlix Klaus sosiodinamika adlı bir nəzəriyyə yaratmağa girişib. Onun da əsas məqsədi sinergetik metodlar vasitəsilə cəmiyyəti öyrənmək olub. 2010-cu ilə olan duruma görə bu sahədə vəziyyət belədir ki, Vaydlixin apardığı işlər dünyanın diqqətini çəkib. Onun miqrasiyanın, əhalinin öyrənilməsi, şəhərləşmə məsələləri, ayrı-ayrı müəssisələrin iqtisadi fəaliyyətinin modelləşdirilməsi ilə bağlı apardığı araşdırmalar çox maraq cəlb edir. Bu baxımdan cəmiyyətin öyrənilməsi üçün Vaydlixi aparıcı alimlərdən biri sayırlar. Daha sonra bir neçə rus alimi cəmiyyətin öyrənilməsi istiqamətində iş aparır. İndi ruslar üçün aktual olan məsələlər mentalitetin öyrənilməsi, cəmiyyətin yeni siyasi və sosial sistemə keçidinin sinergetik məsələləri, insan davranışlarının, etikasının transformasiyaları, psixoloji transformasiyalar, cəmiyyətin inkişafı ilə dövlətin inkişafı arasında qarşılıqlı əlaqələr, dövlətin strateji məqsədlərinə çatmaq üçün hansı faktorların aktual olması ilə bağlı məsələlər, incəsənətin öyrənilməsi ilə bağlı tədqiqatlar aparırlar. Eynilə Qərbdə də həm mentalitetin, həm də cəmiyyətin öyrənilməsi ilə bağlı sinergetik yanaşmadan güclü yararlanılır. Məsələn, bununla bağlı ABŞ-ın iki mərkəzinin adını çəkmək olar. Biri Santape Mürəkkəblik İnstitutudur ki, onun rəhbəri Nobel mükafatı laureatı Hell-Mandır. Digəri Sinqulyarlıq Universitetidir. Sonuncusu 2007-ci ildə yaranıb və cəmi 30 tələbəsi var. Burada dünyanın heç bir yerində keçirilməyən çox müasir fənlər tədris olunur. Məsələn, robotların idarə edilməsi, idarəetmənin idarə edilməsi, dünyanın qlobal inkişafı ilə bağlı olan aktual elmi aspektləri özündə ifadə edən fənlər və sair. Qlobal iqtisadiyyat, qlobal geosiyasət, qeyri-standart fənlərdir ki, onlar 30 nəfər seçilmiş tələbəyə tədris olunur. Bu 30 nəfər dünyanın gələcək idarə edilməsinə hazır olan kadrlar olacaq. Bu gənc tələbələrdə əvvəlcə qlobal düşüncə formalaşdırılır. Yəni təkcə robot necə işləyir yox, o robotun özü-özünü idarə edə biləcək, kopyalanmış nano-robotların necə idarə edilməsi öyrədilir. Gələcəkdə insanların özünü məhv etməyə qalxa biləcək robotların necə idarə edilməsi tədris edilir. Həmçinin iqtisadiyyat necə inkişaf etməlidir ki, qlobal miqyasda mənəviyyatla, ekologiya və siyasətlə ziddiyyət yaratmasın və sair bu kimi məsələlər ciddi tədris edilir. Sinergetik yanaşmalar bu kimi tədqiqat məsələlərində ciddi nəticələrə gətirib çıxarmaq üçün öyrədilir.
- Bu
sahədə Azərbaycanla bağlı hansı səviyyədə
tədqiqatlar gedir və sinergetikanın,
ümumiyyətl,ə bizdəki durumu necə
xarakterizə edilə bilər?
- Bizdə də bir neçə mütəxəssis sinergetika ilə məşğul olur. 1987-ci ildə Moskvada SSRİ Elmlər Akademiyasının Fəlsəfə İnstitutunda bu sahə ilə tanış olmuşam. Həmçinin orada sinergetika ilə bağlı namizədlik dissertasiyasını müdafiə etmişəm. Mövzum sinergetikanın fəlsəfi problemləri ilə bağlı olub. Baza təhsilim riyaziyyat olduğu və sinergetikada da riyaziyyatın yükü çox olduğu üçün onu qavramaq şansım olub. Daha sonra Azərbaycan Milli Elmlər Akademiyasının Fəlsəfə İnstitutunda bu sahədə tədqiqatlarımı davam etdirmişəm və doktorluq dissertasiyasını müdafiə etmişəm. Mövzum bu dəfə sinergetikanın yeni elmi təfəkkürü necə formalaşdırdığı barədə olub. Hazırda isə Azərbaycan cəmiyyətinin öyrənilməsinə sinergetikanın tətbiqi məni maraqlandırır. Burada özəl metodologiya işləmək lazımdır. Hər bir cəmiyyətin öyrənilməsi üçün ayrıca metodologiya olmalıdır. Dünya üzrə, hələlik daha çox Anri Puankredən gələn qeyri-xətti diferensial tənliklər nəzəriyyəsindən istifadə edilir. Sinergetik modellər də o nəzəriyyəyə uyğun qurulur. Məsələn, Vaydlix o nəzəriyyədən yararlanır. Həmçinin “Markov zəncirləri”ndən, Quroviçin tənliklərindən istifadə edilir. Hər bir halda bütün incəliklərinə baxmayaraq, burada yanaşma qeyri-xətti diferensial tənliklərdən istifadəyə əsaslanır.
-Bu
sahə ilə bağlı hansısa təşəbbüslər
varmı?
- Belə bir təşəbbüsümüz var ki, Lütfi Zadənin qeyri-səlis məntiqinin sinergetika ilə sintez əsasında yarana biləcək yeni bir metodologiya üzərində işləyək. Bu tezisi mən bir il bundan öncə AMEA-nın Rəyasət Heyətində etdiyim məruzədə irəli sürmüşəm. Bununla bağlı da konkret tədqiqatlar davam edir. Yəni öncə bunun metodoloji əsasını yaratmaq lazımdır. Belə bir sintez mümkündür. Mənə görə, Lütfi Zadənin qeyri-səlis məntiq nəzəriyyəsinin xeyli üstünlükləri var. Çünki o, prosesləri, xüsusilə sosial prosesləri daha mütəhərrik, ətraflı və geniş ifadə etmək imkanlarına malikdir. Amma başqa məsələdir ki, bu imkanları sinergetik yanaşma ilə elmi bazada sintez etmək lazımdır. Faktiki olaraq bu, yeni bir nəzəriyyənin yaranması ola bilər. Məsələn, özlüyümdə mən onun adını “qeyri-səlis sinergetika” qoymuşam. Əgər belə bir sinergetika mümkün olacaqsa, “qeyri-səlis” sözü heç də az dəqiqlik ifadə etmir. Bu, müasir cəmiyyətlərdə tam dəqiqliklə elementar səviyyəyə qədər elmi ifadənin mümkünsüzlüyünə işarədir. Həmçinin ona işarədir ki, burada biz mümkünlüyn hansı dərəcədə fraqmentliyini aydınlaşdırmaya bilərik. Amma bizi yekun nəticə maraqlandırdığından burada yekun mənzərəni ifadə etmək olar. Lütfi Zadənin məntiqi ilə bu ifadə daha manevrli bir model təklif edə bilər.
-Sinergetika sahəsi tədqiqat obyekti kimi yəqin ki, bizdə çox az alimləri cəlb edir. Həmçinin tədris fənni kimi sinergetika, yəqin ki, çox nadir fənlərdəndir...
- Bakı Dövlət Universitetində iki il magistrlər və bakalavrların bir qisminə bu fənn mənim tərəfimdən tədris edilib. BDU-da bu sahə ilə bağlı işlənilib və mühazirələrdə də bu mövzuya toxunulub. Orasında haqlısınız ki, bütövlükdə Azətbaycan təhsil sistemində sinergetik yanaşma yoxdur...
-Buna
səbəb nədir?
- Səbəb çox sadədir.
Müqayisə edək: İsraildə Sinergetika
fakültəsi var. Avropanın, Qərbin
müxtəlif ölkələrində müxtəlif aspektlərdə
bu yanaşmaya əsaslanan
proqramlar dərc edirlər. Amma Rusiyada
tanınmış sinergetiklərdən biri
Budanov deyib ki, mən Moskva Dövlət
Universitetində sinergetika ilə
bağlı hazırladığım kursları keçirə
bilmirəm. Səbəb odur
ki, cəmiyyət bu kimi ideyaları tam mənimsəməsi
və inkişaf etdirməsi üçün müəyyən təkamül
mərhələlərindən keçməlidir. İkinci bir tərəfdən
təhsil siyasətini aparanlar bu məsələnin
aktuallığını dərindən dərk etməlidirlər.
Çünki sinergetika
təkcə ayrıca fınn deyil, həm
də müasir elmi təfəkkürdə
baş verən qabaqcıl elmi
ideyaların ifadəsidir. Ona görə də
təhsil siyasətini yeridən qurum bunu dərk edib
sinergetikanı təhsildə tətbiq etmək üçün sistemli iş aparmalıdır. Hələ ki belə bir sistemli iş yoxdur. Bunu təmin etmək üçün
təhsil, elm siyasətində ciddi yer
ayrılmalıdır. Əgər bunu etməsək,
getdikcə bütövlükdə Azərbaycan gənclərinin
və tələbələrinin təfəkkür tərzi
baxımından digərlərindən geridə qalması
qaçılmaz olacaq. Çünki
sinergetik yanaşma hər şeydən öncə qlobal düşüncə
formalaşdırır. Geniş və əhatəli
yanaşma qabiliyyəti
formalaşdırır. Sinergetik yanaşma ilə ümumi fonu, sistemi
bütövlükdə görmək mümkün
ola bilər.
İlkin AĞAYEV
Palitra.-2016.-12 may.-S.11.