AMEA-nın Mərkəzi Elmi Kitabxanasında yeni kitabların təqdimatı keçirilib

Ötən gün AMEA Mərkəzi Elmi Kitabxanasında (MEK) noyabr ayı ərzində MEK-ə təqdim olunan kitabların təqdimatı keçirilib.

Kitabxana-Xidmət şöbəsinin müdiri Aygün Səfərova təqdimatı giriş sözü ilə açaraq, Mərkəzi Elmi Kitabxananın beynəlxalq kitab mübadiləsi barədə tədbir iştirakçılarını məlumatlandırıb. Təqdimatçı Fondların Formalaşdırılması bölməsinin əməkdaşı Sevil Əliyeva MEK-in mübadilə apardığı ölkələr haqqında məlumat verərək, qeyd edib ki, Mərkəzi Elmi Kitabxana cəmiyyətin bir hissəsi kimi xarici ölkələrlə mədəni-elmi əməkdaşlığın genişlənməsi istiqamətində çalışır. Bakı Dövlət Universitetinin müəllimi, filologiya elmləri doktoru Vaqif Sultanlı oxu mədəniyyətinin formalaşmasında bu səpkidə təqdimatların keçirilməsinin təqdirəlayiq olduğunu ifadə edib. O, xarici ölkələrin kitabxanalarında Azərbaycan bölməsinin yaradılması təklifini irəli sürub. Araşdırmaçı-jurnalist, "Diaspor" jurnalistləri birliyinin sədri Fuad Hüseynzadə dünya universitet kitabxanalarında Azərbaycan guşəsinin yaradılması və bu layihənin daha da perspektivli olması üçün Mərkəzi Elmi Kİtabxananı birgə əməkdaşlığa dəvət edib. AMEA Fəlsəfə İnstitutunun elmi işçisi İlham Soltanov kitab və kitabxanaların mənəvi əxlaqımızın formalaşmasında müstəsna rol oynadığını vurğulayıb. BDU-nun müəllimi, fizika-riyaziyyat elmləri doktoru, Əməkdar elm xadimi Şahlar Əsgərov, AMEA İqtisadiyyat İnstitutunun əməkdaşı, iqtisad üzrə fəlsəfə doktoru Yaşar Məmmədov, AMEA Memarlıq və İncəsənət İnstitutunun əməkdaşı, sənətşünalıq üzrə fəlsəfə doktoru İmaş Hacıyev, AMEA Molekulyar Biologiya və Biotexnologiya İnstitutunun əməkdaşı Ələmdar Məmmədov tədbirlə bağlı fikirlərini bölüşərək mədəniyyətimizin, tariximizin təbliğində bu cür tədbirlərin keçirilməsinin əhəmiyyətindən bəhs etdilər. Sonda tədbir iştirakçıları sərgi ilə tanış olub xatirə şəkli çəkdiriblər.

Fuad

Palitra.-2016.-25 noyabr.-S.4.