İnsanı və insanlığı
kamilləşməyə səsləyən vətəndaşlıq
poeziyası
Şair
Xanəli Kərimlinin müxtəlif illərdə nəşr
etdirdiyi “Ay işığında” (1998), “Anamdan məktub”
(2001), “Bu da bir nağıldı”(2004),”Payız
duyğuları”(2013) şeir kitabları və şairin
yaradıcılığı ilə bağlı
yayımlanmış ”Şairə məktub”(2007),
“Sözün Əlincə qalası”(2011) məqalələr
topluları, fəlsəfə
doktoru Sabir Bəşirovun “Xanəli Kərimli:Bir ömrün
nağılı”(2011) monoqrafiyası ilə yanaşı,
2016-cı ıldə ”Qanun” nəşriyyatında işıq
üzü görən və şairin 65 illiyinə həsr
olunmuş “Bir ömrün işığı” kitabı da
qarşımdadır. Bu kitabların hər biri
mənim üçün əzizdir, əzizdir ona görə
ki, bu kitablar şairin öz dəst-xətti ilə yazıb mənə
bağışladığı əvəzsiz hədiyyəsidir
. Həm də şair dostum, şəxsiyyətinə hörmət
bəslədiyim , çətində ürəyimi ona
aça biləcəyim X. Kərimlinin söz
sovqatıdı, söz payıdı. Dost sovqatı , dost
payı da şirindi. Mən o şair haqqında
, onun ədəbi yaradıcılığı haqqında
söz açmaq istəyirəm ki, adlarını yuxarıda
sadaladığım kitablarını bir şair duyğusu,
düşüncəsi ilə mütaliə etmişəm,
düşünmüşəm və düşündükcə
də qələm dostum X. Kərimlini
poeziyanın, söz aləminin , zamanın əlində olan “ələyi”ndən
keçirmişəm və içimdə şair haqqında
söz demək ehtiyacını duyub , şair
yaradıcılığına üz tutub çox götur
-qoydan sonra ürəyimi oxucularla bölüşmək istəmişəm.
Əvvəla, şair Xanəli Kərimli tanıdığım Xanəli Kərimlidir. O, dağlar qoynunda böyüyüb boya -başa çatdığı qədər də pakdı, safdı . Elə bil ki, Şahbuz bulaqlarının dupduruluğu, saflığı, dağlarının pak, təmiz ab-havası onun daxili aləmindədir. O, poeziyaya da təbiət qoynundan, təbiət qoynundakı səfalı Mahmudoba kəndindən gəlib.
Xalq şairimiz Z. Yaqub demişkən:
İnsan oğlu Tanrını təbiətlə dərk edir.
Təbiəti duyanlar Allaha yaxın olur.
Birinci Allaha yaxınlıq ona təbiətindən gəlir.Təbiətdə
gördüyü təbiət hadisələrini, fəsillərin
növbələşməsi, gülün-çiçəyin
dağları qoynuna alması, gecələr səmaya baxanda
ulduzlu kəhkəşan şairi düşundürməyə
bilməzdi.Düşüncə və inancları zəminində
şair Allaha yaxındır və Allah adamıdır. Tanrının
varlığı və Tanrının müxtəlif müstəvilərdə
dərki ona atası və anası tərəfindən
aşılanmışdır.O, uşaqlıqdan
Tanrının şükürlü bəndəsidir ki,
poyeziyasında Tanrıya bağlılıq, Tanrının və
insanın dərki onun yaradıcılığından
qırmızı xətlə keçir.
Tanrıya
bağlılıqdan söz düşmüşkən qeyd
edim ki , şairin
yaradıcılığı ilə bağlı nəşr
edilən kitablarda bəzi məqalə müəllifləri
onun yaradıcılığında sufizm ab -havasnın da
özünü göstərdiyini söyləyirlər. Bu barədə
elm adamları-akademiklərimiz ,
professorlarımız, tənqidçilərimiz çox
yazıb. Mən də onu demək istəyirəm ki , istər
böyük Nəsiminin, istərsə də digər sufi
mütəfəkkirlərinin yaradıcılığında
Allaha qovuşmaq üçün özünü dərk etmək
məsələsi geniş yer tutur, o cümlədən də
istedadlı şairimiz X. Kərimlinin
yaradıcılığında .
Şairin
yaradıcılığı sufilik təlimi üzərində
köklənməsə də, sufi motivləri
özünü göstərir.Məncə, X. Kərimli fəlsəfi
düşüncələri ilə “Mən” dən Sənə
(Tanrıya) yol eylə ideyası ilə Haqqa doğru yol
gedir.O, bu yolu imanının işığında gedir. O,
haqqa qovuşmaq istəyir. Bu da ondan irəli gəlir
ki, X. Kərimli Hüseyn ibn Mənsur Həllac, Yunis İmrə,
Nəsimi kimi mütərəqqi fikirli şairlərin fəlsəfi
fikirlərini mənimsəmişdir. Xüsusən,
panteist fəlsəfəsinin müddəaları ilə tanış olmuşdur. Çünki panteizmə
görə bütün kainat Tanrıdan ibarətdir, qalan nə
varsa , o cümlədən canlılar- insan
da vahid Tanrının hissəcikləridir. Bir
zaman Tanrı ilə vəhdətdə olan hissəciklər
öz əsillərindən ayrı düşdükləri
üçün dərin kədər hissi keçirir, ona
qovuşmaq arzusu ilə çırpınırlar. Ancaq
bu arzuya çatmaq üçün insan kamilləşməli
, özünü çirkin ehtiraslardan , alçaq əməllərdən
təmizləməlidir. Ona görə də şair yazır:
Mən
haqqın divanəsiyəm
Sözüm də Haqqın nurudur.
Haqq yolu təkcə
sufi yolu deyil, eyni zamanda hürufiliyin
yoludur. Bu yol ağlı başında olan
Haqqın əzəl, “Mən”in sonradan
yarandığını kamilliyi ilə dərk edən xaricindən
başqa, daxilində baş qaldıran “Mən”ini görən
insanın yoludur.
X. Kərimli
yaradıcılığına baş vuranda görürsən
ki, onun duyğu və düşüncəsində, mənəviyyatında
hamının duya biləcəyi islam
inamı vardır. Şeirlərində də o,
bu inamla Allah eşqini tərənnüm edir. Onun poeziya dünyasına yaxınlaşanda
aydınlaşdırırsan ki, şair səmimiyyət
adamıdır, şair eşq adamıdır. Allah
eşqini, insan sevgisini, mərhəmət və ehtiram,
ölüm və qəriblik, vətənpərvərlik, azərbaycançılıq,
əsl vətəndaşlıq duyğularını şeirlərində
çox mənalı şəkildə işləyə bilən,
mənəviyyatımızı və milliyyətimizi ucada
görən və qələmiylə, bütün
varlığıyla xalqına xidmət göstərən, sənətində
və dünyagörüşündə “Kamillik” prinsipini
yaşadan şairdir X. Kərimli.
Bu səbəbdəndir
ki, akademik İsa Həbibbəyli şair X.Kərimli
yaradıcılığından söz açarkən
deyir:”Xanəli Kərimli yeni dövr Azərbaycan şerində
vətəndaşlıq lirikasının
yaradıcılarından biridir. Yaxşı cəhət
ondan ibarətdir ki, X. Kərimlinin vətəndaşlıq
lirikası, sadəcə, qələmə aldığı
aktual mövzuları ilə deyil, daha çox bu bədii
nümunələrdəki fikirin ifadə vasitəsilə yadda
qalır”.
Şairin
1994-cü ildə qələmə aldığı “Azərbaycan”
seirindən bir neçə misraya diqqət yetirək:
...Sən
Xətai babamızdan bizə böyük əmanətdin
Əmanətə
xəyanətik biz çoxumuz, Azərbaycan!
Sənsiz
bizim bundan belə yaşamağa haqqımız yox,
Haqlı
ikən haqsızlaşan, haqqı talan Azərbaycan!
Yaxud:
Şərəfsiz
bir ömür sürmək, aləm bilir sənə
yaddır,
Bir şərəfli
ömür üçün ayağa dur, Azərbaycan!
Bu
şeiri oxuyarkən özündən asılı olmayaraq , içində bir Şəhriyar
harayı, M.Araz üsyanı baş qaldırır,
gözünün qarşısında otaylı-butaylı
bütöv Azərbaycan canlanır. Bu vətəndaş
şair X.Kərimlinin içərisindən qopan qeyrətin
harayıdır. Bu, torpağı
işğal olunan bir xalqın haqq səsinin harayıdır.
Bu, vətəni Azərbycanın şərəfini
ucalarda görüb, qürur hissi keçirmək istəyən
şairin harayıdır.
Vətən dərdi, torpaq dərdi gecə səhərə
qədər yol salıb şairin içərisindən
keçir, onun bağrını dəlir, ciyərini
sökür.
Nizami kimi
bir şair ağır zəhmət bahasına əldə
etdiyi nailiyyətin paxıllığını çəkənlərə
üz tutub deyir :
“ Gəl
gecə mədən qazdığımı gör, mədən
qazmaq deyil, öz canımı qazmağımı gör. Hər
dürrü ki, ağzımdan çıxarmaq istəyirəm
, neçə vuruşla döş-döşə gəlirəm
.
Yüz dəfə odlanıb beynimi yandırmaqla gecələr
bir şəbçıraq ələ gətirirəm”.
Bu, şair ömrüdü. Gecələr “şəbçıraq
ələ gətirmək” şair dostum X. Kərimli taleyinə
də qismət olub.
Necə
ki, şair “Şair ürəyi” adlı şeirində deyir:
Şair
ürəyidir dözüb dayanır,
Zamanın
min cürə böhtan şərinə .
Şair azərbaycanlı olması ilə, doğma Azərbaycanın
atributları ilə fəxr edir. Görün şair “Azərbaycan
bayrağı” şeirində üçrəngli
bayrağımıza necə münasibət bildirir, onu ən
uca Tanrı dərgahı səviyyəsinə qaldırır:
Mənim
başımın üstə
İki səcdəgahım
var :
Biri uca
Allahım,
Biri yenməz bayrağım.
Məncə, şair ürəyində kökləşən
Vətən sevgisi budur. Bayraq sevgisi budur . Torpaq
sevgisi budur.
X. Kərimlinin
varlıq haqqında görüşləri, fəlsəfi
düşüncələri dərin məzmunlu olmaqla bərabər,
son dərəcə məntiqlidir, orijinal deyilişi ilə
müstəqildir. Bu baxımdan, onun “Öz dilimsən
“şeirindən bir bəndə diqqət yetirək:
Sən ey
mənim Oğuz dilim,
İlkin
mayam - ağuz dilim!
Tarixlərin
sədlərini
yara
-yara tarixləşən
alnıaçıq, ağüz dilim!
Şair
bu fikirləri ilə oxucunu bir anlığa müəyyən
dövrdə xalq mənəviyyatının mücəssiməsi
olan Dədə Qorqudda oğuzların qəhrəmanlıq
tarixinə aparıb çıxarır .
Maraqlı budur ki, şair, bəlkə də, “ağuz”
dialekt sözünü şeirə gətirmiş, “ilkin mayam”
ifadəsini işlətməklə “ağüz” sözünün
mənasını açıqlamışdır. Bəlkə də,
çoxları bilmir ki, heyvanat aləmində canlıların
anadan ilk əmdiyi süd ağuz adlanır .
Şair X. Kərimli şeirlərində sözləri
yerli- yerində və ehtiyatla işlədir. Ürəksiz söz
ocağı şatmaqdan qorxur . Onun “ Mənə elə gəlir ki ...” kitabında
söz haqqında dediyi fikir diqqəti çəkməyə
bilmir:
“Söz ən böyük enerji mənbəyidir.Onun təsir
gücünü əvəz edə biləcək heç bir
qüvvə yoxdur”.
Şairin
söz haqqında deyimi böyük Füzulinin “söz qədrini
artıran öz qədrini artırar” kəlamını, M.
Arazın “ söz qənirsiz gözəlimdir
, düz yolumdur , düz əlimdir” fikrini , M.Müşfiqin “
ey bütün dünyanın söz deyənləri , ruhun
dodağına tutun neyləri “ arzusunu yada salır .
Şair
X. Kərimlinin “ Payız duyğuları” kitabında ön
söz yerinə müəllifin özünün verdiyi “ Bu da
bir nağıldı “ şeiri məni tutdu , bərk də
tutdu. Bu kitaba ən yüksək elmi titullu insan ön söz yazsaydı , bu qədər sadə, bu qədər
tutarlı və düşündürücü
alınmayacaqdı. Bu şeir bir övladın :
-Ata, bir nağıl kitabı tap, oxuyaq- istəyinə bir ata cavabıdı
. Bu cavabda bir insanın başdan -başa sözdən
yonulmuş heykəli - canlı bir heykəli dayanıb
. Bu heykəlin arxa üzü - şair
ömrüdü, narahat şair ömrü, canlı bir
nağıl olan X. Kərimli ömrü. İlk növbədə
isə bu yaşanmış bir qeyrətli ata
ömrüdü:
Mən
özüm canlı bir nağılam, bala,
Hələ oxunmayıb bir xəttim belə.
Oxunsam ,
görərlər qaya ömrümü
Necə əritmişəm mən gilə -gilə.
Şair doğulur , yaşamır -yanır .Yana -yana
külünü küləklər göylərə sovurur.Bəlkə,
bu yanğıdan düşən kül də külək əllərilə
gecələrin hansı bir vaxtındasa şair ruhuyla
görüşür. Şair ömrü qurtarmaq bilməyən
bir nağıldı . Şair X. Kərimli
dediyi kimi :
Keçən
ömür günü ələklədim mən,
Gələn
ömür günüm nə ola -ola .
Yaxşım,
yamanımda göz qabağında
Bu da bir nağıldı danışdım, bala.
Vətəndaş
şair X.Kərimlinin hələ ömür
nağılının müdriklik çağları yeni-yeni
başlayır . Qoy, şair X. Kərimli
ömrü öz saflığı paklığı
, ləyaqəti , şəxsiyyəti baxımından
bir nəslə örnək olsun. Şair ömrü işıqdı , nurdu. Şairlər
dünyanın dərd çəkənləridir. Çünki şairlər Allahın gözütox
bəndələridir. Haqqın işığına
göz dikə- dikə haqq dəlisi olmaq da onların bəxtinə
düşüb . Və sonda şair Xanəli
Kərimliyə ancaq onun eşidə biləcəyi bir tərzdə
özümün bir şeirimi pıçıldamaq istəyirəm:
Bu
iştahlar, tamahlar,
Hamarlayır dünyanı.
Halal-haram
tanımır,
Ölüm də düşmür yada.
Əlinə
fürsət düşən,
Qamarlayır
dünyanı
Oynayır
loxma üçün,
Kimi odnan, közünən.
Dünyanın
şairləri
Gecə səhərə
kimi
Tumarlayır
dünyanı,
Tumarlayır sözünən.
Şair X. Kərimli bir nəfərin də razı
qalmadığı bu dünyanı yamanlıqların əlindən
qurtarmaq üçün Haqq dərgahına sığına
-sığına “tumarlayır”. Onu qələmi, düşüncəsi
ilə könlünü ala- ala özü də könüllərə
köçür . Buna
görə də X.Kərimli poeziyası insanı və
insanlığı daxilən kamilləşməyə səsləyən
vətəndaşlıq poeziyasıdır. Məncə, bu poeziyadan bəhrələnməyə,
bu fikirlərdən öyrənməyə, öyrənmək
üçünsə vaxt itirməyə dəyər.
Zeyqəm
Vüqar
Azərbaycan
Yazıçılar Birliyinin üzvü
Palitra.-2016.-26 oktyabr.-S.12.