Azərbaycanın turist cəlb etmək imkanları olduqca artıb

T urizm ölkələrindəki qeyri-stabilliklər fonunda turizm sektorumuz ölkədəki sabitlikdən, turizm potensialından düzgün yararlanmaqla, xarici turist axınını yetərincə gücləndirə və daha da rentabelli ola bilər

Türkiyənin “Dünya” media qurumunda müəllif Alattin Aktaş yazır ki, Türkiyə turizm kimi gəlirli sahədən çox şey itirməyə başlayıb. Yazıda qeyd edilir: “Partlayışlar və kütləvi qətllər bizdən uzaqlarda baş verəndə, onlara çox da önəm vermirdik. Amma terrorizm Türkiyə paytaxtına, daha sonra İstanbula, sonra da Sultanəhməd meydanına yol tapdı.

On alman turistinin həyatına son qoyan terrorun hədəfi aydındır - xarici turistlər. Əgər terrorçular daha çox adam öldürmək istəsəydirlər, daha izdihamlı yer seçərdilər. Həm də onların məhz almanları öldürmək istəmədiklərini də istisna etmək olmaz. Alman turistlər Türkiyə üçün böyük önəm kəsb edir. Türkiyəyə gələn hər 100 nəfərdən 15-16 nəfəri almandır. Bununla yanaşı Almaniya Niderland, Danimarka, Belçika, İsveç, Norveç və hətta, Böyük Britaniyaya da turistik baxımdan təsir edir. Bu, onun turistlərinin əhəmiyyətini bir qədər də artırır. Hər il Türkiyəyə 6 milyondan çox alman turist gəlir. Turizm sektorunun nümayəndələri bildirirlər ki, Rusiya üçün də bu cür mövqe xarakterikdir. Belə ki, Rusiya müstəqil dövlətlər birliyinə də təsir göstəir və onunla Türkiyə arasında yaşanan problemlər digər yaxın ölkələrdən olan turistlərin sayına da təsir edir.

Ötən ilin 11 ayı ərzində Türkiyəyə 34,8 milyon turist gəlib. Onlardan 25,8 milyon nəfəri - 75 faizə yaxını hava yolu ilə gəlib. İstanbul gələn turistlərin sayına görə 43 faizlə(11 milyon) birinci, Antalya 41 faizlə(10,6 milyon) ikinci, Muğla 9 faizlə (2,4 milyon ) üçüncü, İzmir 3,5 faizlə(900 min) dördüncüdür. Ankaraya hava yolu ilə gələnlərin sayı isə 345 min nəfər təşkil edib ki, bu da 1,3 faiz edir.

Bunlar Türkiyəyə yalnız hava yolu ilə gələn turistlərdir.

Türkiyəyə gələn turistlərin əksəriyyəti İstanbul, Antalya və Muğlaya gəlir”.

O da qeyd edilir ki, Rusiya ilə ixtilafa görə Türkiyə Rusiyadan gələn ildə 4,5 milyonluq turistdən məhrum olub. Eləcə də Rusiyanın nüfuz etdiyi digər ölkələrin turistlərini də burada bu və ya digər dərəcədə nəzərə almaq lazımdır.

Bu boşluğu alman turistlərin hesabına doldurmağa çalışan Antalyanın kefinə Sultanəhməddəki teror soğan doğramış oldu. Bu terror aktından sonra Türkiyəyə turizm axınının artacağını gözləmək çətindir. Amma təkcə Türkiyədə yox, dünyanın br çox ölkələrində, Avropada, Parisdə də terror baş verib. Paris terrorundan sonra Almaniya və Belçikada sərt antiterror tədbirləri görməyə başlayıblar. Bu il bütün dünya üçün turizm baxımından itkilər ili olacaq. Ənənəvi turizm ölkələrinin - Yaxın Şərq və Avropanın belə bir qalmaqal və təhlükələrlə, qeyri-stabilliklərlə üzləşdiyi bir vaxtda digər ölkələr özlərinə turizm axınını gücləndirə bilərlər. Bunun üçün turizm sahəsində yaranan boşluğu doldurmağa əməlli-başlı cəhdlər etmək lazımdır. Məsələn, ekzotiklik baxımından Cənubi Amerika və Avstraliya kimi yerlər də turist marağını daha çox cəlb edə bilərlər. Amma bu cür bölgələrdə özlərinəxas problemlər var: nəqliyyat xərcləri yüksəkdir və oralarda qeyri-standart yay mövsümü mövcuddur.

Qeyd edildiyi kimi, hazırda Yaxın Şərq və Avropa ölkələrində baş verən qeyri-stabilliklər fonunda Azərbaycanın da turist cəlb etmək imkanları olduqca artıb. Belə ki, hazırkı situasiyada Azərbaycanın turizm sektoru ölkədəki sabitlikdən, turizm potensialından düzgün yararlanmaqla, xarici və eləcə də qonşu ölkələrdən turist axınını yetərincə gücləndirə və daha da rentabelli ola bilər. Bununla bağlı müvafiq qurumların situasiyanı düzgün qiymətləndirməsi və düzgün qurulmuş turizm siyasəti Azərbaycanı bu sahədə ön sıralara çıxara, turizm sektorunda yeni-yeni iş yerlərinin sayını artıra və əhalinin gəlirlərini yüksəltməyə daha çox töhfə verə bilər.

İlkin AĞAYEV

Palitra.-2016.-16 yanvar.-S.6.