Mətanət Səmədova: “Əslində,
peşəkar müəllim olmaq üçün heç
də yaşlanmaq əsas deyil”
“İndi
peşəkarlığına, təcrübəsinə
hörmət etdiyimiz yaşlı müəllimlərimiz
var ki, onlar
da gənclik illərində çox çalışıb, nailiyyətlər
əldə edib, uğur
qazanıblar. Yəni gəncliyində uğur
qazanmayanların yaşlandıqda nə isə qeyri-adi
nailiyyətlər əldə etməsi mümkün
deyil. Ona görə də
indiki gəncliyin əldə etdiyi uğurlar məndə
belə təsəvvür yaradır ki, gələcəkdə
onlar da tanınan,
sayılıb-seçilən müəllimlərdən olacaqlar”
Müəllim peşəsinin ictimai statusunun artırılması istiqamətində aparılan siyasət daha bilikli və hazırlıqlı insanların bu peşəni seçməsinə stimul yaradıb. Həyata keçirilən məqsədyönlü tədbirlər yüksək nəticə göstərən abituriyentlərdə müəllim peşəsinə marağı əhəmiyyətli şəkildə artırıb. Ötən il qəbul imtahanlarında 500-dən yuxarı bal toplamış 1359 nəfər müəllimlik ixtisasını seçib. Ölkədə təhsilin inkişafı istiqamətində həyata keçirilən tədbirlərdən biri yeni məktəblərin tikilib istifadəyə verilməsi və ya təmir edilməsidir. 2003-2017-ci illərdə 3100 məktəb tikilib və ya təmir olunub. Bu istiqamətdə tədbirlərin davam edəcəyini deyən ölkə başçısı bildirib ki, bölgələrdə modul tipli 137 məktəb tikiləcək. Bildirilib ki, bu məktəblər tikiləndən sonra ölkəmizdə qəzalı məktəb qalmayacaq. Yüzlərlə məktəbdə təmir işləri aparılacaq. Bakı şəhərində isə 12 məktəb əsaslı təmir ediləcək. Bununla da Bakı şəhərində təmirsiz məktəb qalmayacaq. Təhsilin inkişafında reallaşan tədbirlərdən biri də müəllimlərin fəaliyyətinin stimullaşdırılmasına yönəlib. Bu istiqamətdə tədbirlər 2017-ci ildə də davam etdirilib, 26 şəhər və rayonda 50 min müəllimin bilik və bacarıqları yoxlanılıb, beləliklə, ölkə üzrə bütün müəllimlərin diaqnostik qiymətləndirilməsi aparılıb. Bu gün müəllimlər də təhsilin inkişafı ilə bağlı tədbirləri müsbət qiymətləndirir, müəllim peşəsinə gənclərin həvəsinin daha da artdığını deyirlər. Ümumtəhsil məktəblərində şagirdlərə təhsilin vacib amil olduğunu, onlarda təhsilə maraq yaradan, sevdirən isə məhz ibtidai sinif müəllimləridir. Müsahibimiz Bakı şəhəri 240¹-li tam orta məktəbin ibtidai sinif müəllimi, 2010/2011-ci ildə “Ən yaxşı müəllim” müsabiqəsinin qalibi Mətanət Səmədovadır:
- Bu gün şagirdlərin təhsilə marağını necə qiymətləndirirsiniz?
- Müasir dövr informasiya dövrüdür. Cəmiyyətimizin bütün sahələrində informasiya mənbələrinin zənginliyi şagirdlərin və onların valideynlərinin diqqətini müxtəlif sahələrə yönəldir. Ona görə də müəllim şagirdin maraq və ehtiyaclarını öyrənməklə, onu təhsil prosesinə cəlb etməlidir. Əks halda, şagirdin təhsilə marağı azala bilər.
- Belə bir fikir səslənir ki, tədris proqramları çox
ağırdır. Bu barədə nə
deyərdiniz?
- Bu gün Azərbaycan təhsili keçid mərhələsini yaşayır. Bu o deməkdir ki, əksər valideynlər, eləcə də bəzi müəllimlər hələ də ənənəvi təhsilin təsirindən çıxa bilməyiblər. Ona görə də yeni fikirlərin qəbul edilməsi çətinliklər yaradır. İctimaiyyətdə tədris proqramının çox ağır olması fikri formalaşıb. Əslində isə yeni tədris proqramı gələcəyimiz üçün müstəqil düşüncəli, çevik təfəkkürə malik olan vətənpərvər vətəndaşlar yetişdirmək üçün hazırlanıb. Lakin etiraf edək ki, əksər dərslik müəllifləri yeni tədris proqramlarında standartların tələblərindən kənara çıxaraq dərsliklərdə səhvlərə yol veriblər. Təcrübəli müəllimlər bu nöqsanların öhdəsindən peşəkarlıqla gəlir, şagirdlərin əlavə mənbələrdən istifadə etməklə tədqiqat aparmaq bacarıqlarını inkişaf etdirirlər.
- Bu gün əsas müzakirə mövzularından biri də kurikulumla bağlıdır. Bununla bağlı fikirlərinizi bilmək istədik. Sizcə, kurikulumun hansı müsbət və mənfi cəhətləri var?
- Kurikulum yeni tədris proqramı deməkdir. Ənənəvi təhsil proqramından
fərqli olaraq kurikulumda şagirdlərə
şəxsiyyət kimi
yanaşılır. Onlarda müstəqil
tədqiqat aparmaq qabiliyyəti formalaşdırılır.
Yəni kurikulumda şagirdin məntiqi, tənqidi və yaradıcı təfəkkürü inkişaf
etdirilir. Kurikulum proqramı
Qərb ölkələrinin
əksəriyyətində yüz ildən artıqdır ki, tətbiq edilir. Bu ölkələrin inkişaf etmələrinin
əsas səbəblərindən
biri də onların kurikulum proqramı əsasında təhsil sistemlərinin inkişaf etmələridir.
Ümummilli lider Heydər
Əliyevin “Təhsil millətin gələcəyidir”
fikrini əsas götürərək biz də
yeni tədris proqramını - kurikulumu
inkişaf etdirməliyik.
Düşünürəm ki, kurikulum proqramı orta məktəblərdə tətbiq
edilməzdən əvvəl
müəllimlərin bu
sahədə peşəkarlıq
səviyyəsinin artırılmasına
daha çox diqqət yetirilsəydi, yəqin ki, bu gün bəzi
problemlərlə qarşılaşmazdıq.
- İbtidai sinifdə təhsil alan şagirdlər
üçün xarici
dilin tədrisi çətin deyil ki?
- İbtidai siniflərdə
şagirdlərin xarici
dil öyrənməsini
müsbət qəbul
edirəm. Lakin yaxşı olar
ki, bu siniflərdə
şagirdlərə söz
ehtiyatı öyrədilsin,
danışıq bacarıqları
aşılansın.
- Müəllimlərin
kurslara cəlb edilməsinə münasibətiniz
necədir?
- Müəllimlər cəmiyyətin
bütün dövrlərində
ən başlıca aparıcı qüvvə
olublar. Ümumiyyətlə, əgər müəllimin
axtarışa, öyrənməyə
həvəsi böyükdürsə,
o cəmiyyət inkişaf
edib. Bu baxımdan
da öyrənməyi
həyatımın ayrılmaz
hissəsi hesab edirəm. Ona görə də
həm özüm müstəqil öyrənməyi,
həm də kurslara gedərək peşəkar təlimçilərdən
öyrənməyi çox
sevirəm. Qeyd edim
ki, müasir tədris proqramları ilə bağlı öyrəndiklərimi təlimçi
və mentor olaraq peşə yoldaşlarıma
da öyrədirəm.
- Dərslərdə
müasir texnologiyaların
tətbiqinin hansı üstünlükləri var?
- Dərsdə təlim texnologiyalarının, eləcə
də informasiya-kommunikasiya
texnologiyalarının üstün
cəhətləri çoxdur.
Bu barədə saatlarla, hətta günlərlə danışmaq
olar. Lakin ən vacib olanı qeyd edim ki, təlim
prosesini daha maraqlı, işgüzar, effektli edir. Tədrisin keyfiyyəti yüksəlir,
şagirdlərdə dərsə
marağı artırır.
- Müəllimlərin
işə qəbulunda
imtahan prosesini necə qiymətləndirirsiniz?
- Ümumiyyətlə, müəllimlərin
işə qəbulunda
imtahan prosesini yüksək dəyərləndirirəm.
Nəzəri bilikləri çox
yüksək olur.
Düşünürəm ki, tələbələrin
təhsil müəssisələrində
işə qəbul olduqdan sonra 1 il təcrübə
keçməsi onların
nəzəri və təcrübi bilik və bacarıqlarını
tamamlamış olar.
- Müəllimlərin
diaqnostik qiymətləndirilməsi
hansı imkanlar yaradır?
- Diaqnostik qiymətləndirilmənin
aparılması müəllimlərin
peşəkarlıq səviyyəsini
ortaya qoymaqla yanaşı, onların əməkhaqlarının artırılmasına
şərait yaradır.
Bu isə öz
növbəsində müəllimlərin
işləmək üçün
həvəsinin artmasına
səbəb oldu.
- Bu gün ibtidai sinif müəllimləri
olan gənclərin tədris səviyyəsi sizi qane edirmi?
- Əlbəttə, edir. Əslində, peşəkar müəllim
olmaq üçün
heç də yaşlanmaq əsas deyil. İndi peşəkarlığına, təcrübəsinə hörmət
etdiyimiz yaşlı müəllimlərimiz var
ki, onlar da gənclik illərində çox çalışıb, nailiyyətlər
əldə edib, uğur qazanıblar.
Yəni gəncliyində uğur qazanmayanların yaşlandıqda
nə isə qeyri-adi nailiyyətlər əldə etməsi mümkün deyil. Ona görə də indiki gəncliyin əldə etdiyi uğurlar məndə belə təsəvvür
yaradır ki, gələcəkdə onlar
da tanınan, sayılıb-seçilən müəllimlərdən
olacaqlar.
- Hansı mövcud problemlərin aradan qalxmasını istərdiniz?
- Əvvəlki illərə
nəzər salsaq, təhsil sahəsində bir çox problemlər aradan qaldırılıb. Yeni, müasir tələblərə
cavab verən məktəblər tikilib,
əsaslı təmir
olunub. İnternetlə təmin olunmuş
sinif otaqları çoxalıb. Belə şərait
müəllimlər üçün
geniş imkanlar yaradır. Lakin bu gün məktəblərdə şagird
sıxlığı müşahidə
olunur. 45 dəqiqəlik
dərs prosesini fəal təlimlə 38-40
şagirdlə qurmaq çətinlik yaradır,
müəllim qarşıya
qoyduğu məqsədə
tam nail ola bilmir. Təklif edərdim ki,
şagird sıxlığı
olan ərazilərdə
yeni sinif otaqları tikilsin və hər sinifdə şagirdlərin
sayı 24 nəfər
olsun.
Nigar Abdullayeva
Palitra.-2018.-17 aprel.-S.7.
4