Bədii
əsərlərdə yaşayan qəhrəmanlar xalqın
yaddaşına köçür
Xeyirxahlar qədrini
Əsli olanlar bilər,
Yaramazlar həmişə
Elə badalaq
gələr.
(Əflatun
Hüseynoğlu)
Ədəbiyyat
insana ədəb-ərkan, mərifət aşılayan bir elm
kimi insanların hər zaman diqqətini cəlb edir. Tarix elmi də
sübut edir ki, bədii əsərlərdə yaşayan qəhrəmanlar
xalq yaddaşına köçür. Yəni bədii əsərə
gələn qəhrəmanlar tarixləşir. Bu isə bədii
əsərin gücünün ən bariz göstəricisidir.
Haqlı olaraq Azərbaycan xalqını şair xalq
adlandırırlar. Axı bizim insanların hər bir
sözündə poeziya ruhu var. Bu baxımdan da ədəbiyyatımızda
dünya səviyyəli tanınmış şairlər
yetişmiş və dünya ədəbiyyatının zənginləşməsində
öz töhfələrini vermişlər. Heç
şübhəsiz ki, günümüzdə də şairlər
yaşayırlar və ciddi yaradıcılıqla məşğul
olurlar. Onların yaradıcılığı da öz oxucu
auditoriyasını tapır və beləcə, ədəbi
mühitin daha da çiçəklənməsinə zəmin
yaranır. Bu gün Gürcüstan Respublikasının Dmanisi
(Başkeçid) rayonunun Yırğançay kəndində
yaşayan şair Əflatun Hüseynoğlunun şeirləri
də diqqəti cəlb edir. Şair Əflatun
Hüseynoğlunun seçmə şeirlərini oxucularla
paylaşırıq.
ŞAİRLƏR
Hərənin bəxtinə
bir qismət düşür,
Dərdi öz
qoynuna tökər şairlər.
İlham at oynadıb
girsə meydana,
Dərddən
söz qalası tikər şairlər.
Baxmaz nə dövrlərə,
nə də ki vara,
Sözdür
tək silahı düşərsə dara.
Təbib üz döndərib
gəlməsə kara,
Bağrının
başını sökər şairlər.
Deyirlər şairlər
tez qocalandı,
Dərd şair
ömründən hey bac alandı.
Görəndə dərdləri
çox haçalandı,
Yığışıb
pünhanı bükər şairlər.
Onun bağ-bağçası
nəğmələr, sözlər,
Sözlərdən
ən gözəl incilər düzər.
Şerlə min mənalı
hikmətlər yazar,
Qələmlə
gül-çiçək əkər şairlər.
Əflatun qələmi
alanda ələ,
İstəyir tərifi
söyləyə belə;
Söz karvanı
çıxıb düzəlsə yola,
Ona sarvan olub
çəkər şairlər.
GƏRƏK
Həyat imtahandı
yaranan kəsə,
Anlayıb
yolunu biləsən gərək.
Üzü ağ çıxmağa bu imtahandan
Aqildən dərsini
alasan gərək.
Şeytana dost olan Haqqa
sarılmaz,
Günaha qərq
olan heç vaxt durulmaz.
Bayağı sözlərlə
elmə varılmaz,
Hikmət dəryasına
dalasan gərək.
Ömür
bağçasında güllənmək üçün,
Dağ çayı tək
coşub, sellənmək üçün,
Ariflər yanında bəllənmək
üçün,
Özünü
zəhmətə salasan gərək.
Özündən
gücsüzün haqqın almayıb,
Səfalət
içində batıb qalmayıb,
Ara qatan bir fitnəkar
olmayıb,
Kişi sifətində
qalasan gərək.
Əflatun,
sözünü demə nadana,
İnci kəlmələri
çətin ki qana.
Bir nəsihət dedim,
ay oğul, sana,
Ellərə
nümunə olasan gərək.
DÜZÜ DÜZ
Mübahisə qan
qaraldar, can yaxar,
Bacarırsan,
sözlərinə düzü düz.
Cəhlə girmə
bilmədiyin bir işdə,
Dil dolaşar
danışanda düzü düz.
Mən müştaqam
həqiqətə, düz ünə,
Müxənnətin
əyrisi nə, düzü nə?
Oxumuşam Haqq kəlamın
düzünə,
Söz deyərəm
söhbətimdə düzü düz.
Əflatunam,
sözüm daim Haqqadı,
Hər bir
şeydən əziz bizə Haqq adı.
İndi görək
kimin sözü haqqadı,
Araşdıraq
əyrini həm, düzü, düz.
BÜLBÜL
(İsa Cavadoğlunun
eyniadlı şeirinə nəzirə)
Oxuyursan nə həvəslə,
Nə sevgiylə,
oxu bülbül.
Səsin məni heyran
edib,
Getməz
gözə yuxu, bülbül.
Yenə qəlbim
coşub yaman,
Şən
avazın dərdə dərman.
Bilsən sənə
necə heyran
İnsanların
çoxu, bülbül?
Əflatunun dərdi
çoxdu,
Hey çəkdiyim
gizli axdı.
Nəğmən məni
oda yaxdı,
Nə cür
deyim axı, bülbül?
GÖZƏLLİKDİ
Dünyanın bəzəyi
olub əzəldən,
Uca dağ
başında qar gözəllikdi.
Ağlı kəm
olana nə lazım dövlət,
Başda
ağıl olsa, var gözəllikdi.
Böyüklər sərvəti
hünər, dəyanət,
Qismət olsa
Haqdan gələr inayət.
Oğulda
lazımdı qeyrət, mətanət,
Qızda ismət,
həya, ar gözəllikdi.
Əflatun müxtəsər
desin sözünü,
Heç kim xar eyləməz
özü-özünü.
Axtarsan belədir
işin düzünü,
Kişidə
vəfalı yar gözəllikdi.
BİRİ
SİNƏMDİ
İki gözüm
tufan edir nə vaxtdı,
Birisi od
tökür, birisi nəmdi.
Nişangah edibdir
öz oxlarına,
İkisi
gözlərim, biri sinəmdi.
Söyləyim
adını, eşit yan duran,
Oduna qərq
elə, tamam yandır, an.
Məni bu atəşə
yaxıb-yandıran,
Biri öz
taleyim, biri Sinəmdi.
Əflatun bax sənə
yarayar indi,
Cismimi odun tək
yara-yar indi.
Gur qala ocağı
yar, a yar indi,
Alova
bürünüb, bir isinəm di.
OYANAM İNDİ
(Qoca ilə cavanın deyişməsi)
Qoca:
Keçən günlərimi
yaxşı keçirdim,
Gərəkmi
yuxudan oyanam indi?
Zaman öz karvanın
çəkib gedibdi,
Daha mən
neyləyim, oy anam, indi?
Cavan:
Boylan hər tərəfə,
bir nəzər yetir,
Səni dərdə
salan oyan a, mindi.
İstərdim bir canan
həmdəmim olsun,
Baxdım ki bu yana-o yana, mindi.
Qoca:
Ömrümün
bağçası saraldı getdi,
Tərlan
oylağını sar aldı getdi.
Sevinc üz döndərib,
saraldı, getdi,
Özüm
öz sinəmi oyanam indi.
Cavan:
Cavanlıq həvəsi
məndə dərindi,
Açılır
üzümə yaxşı dər indi.
Hər gözəl bir
çiçək, deyir dər indi,
"Oduma
yan" deyir o, yanam indi.
Qoca:
Qocalıq əl verib,
titrər sər, bala,
Meh də
vursa dözməz, can əsər, bala.
Yorğanı
üstümə gətir sər, bala,
Buralıq
deyiləm, o yanam indi.
Cavan:
Əflatun, sevgində dayan ha belə,
Eşqin dəryasında
üz daha belə.
Min naz edib bu sinəmi,
habelə
Məhəbbət
oxuyla oyan, a mindi.
ÇƏKİR
Bilmirəm ki ötən
aylar,
İllər
məni hara çəkir?
Söz düşəndə
eşq əhlindən,
Tez-tələsik
ora çəkir.
Qəlbim dinir şən
həvəsdə,
Gözəllər
də kəmərbəstə.
Cəllad kimi durub qəsdə,
Mən
yazığı dara çəkir.
İstəyirəm
bahar-yazı,
Dilimdədi
xoş avazı.
Bu könlümün
işvə-nazı
Xumar
gözlü yara çəkir.
Sinəmdən söz
tökə-tökə,
Öldüm
fikir çəkə-çəkə.
Sevgim məni tikə-tikə
Edir, para-para
çəkir.
Əflatunam,
sözüm yəni,
Sökür,
didir həvəs məni.
Bilirsənmi bunlar səni
Bir
qurulmuş tora çəkir?
YAR ALAR
Əsil insan gözlər
əsil-zatını,
Gəzər
eldə, tapar gözəl yar, alar.
Gözəl qismət
yazmayıbsa Yaradan,
Qövr eyləyər
sinəsində yaralar.
Halal olsa
qazandığın dağ olar,
Haram yeyən
bir gün sinədağ olar.
Yadın sözü tənə
olar, dağ olar,
Yar qəlbini
yar oxşayar, yar alar.
Əflatunam, söz deyərəm
mərdana,
Namərd
oğul böyütməz ki mərd ana.
Mərd insanlar mərd
axtara, mərd ana,
Namərd elə
könül qırar, yaralar.
Toplayıb tərtib etdi: Mahmud Əyyublu
AAB-nin üzvü
Palitra.-
2018.- 7 iyun.- S.15.