“Hazırladığım əl işləri çoxlarında maraq oyadır və bu da mənə stimul verir”

“Əl işlərim 11-13 oktyabr tarixində Bakı Ekspo Mərkəzində keçirilən "Təhsil sərgisi"ndə də nümayiş etdirildi”

Bəzən elə gənclərlə rastlaşırsan ki, onlar təkcə ictimai işlərdə aktivliyi, təhsildə göstərdiyi yüksək nəticələrlə deyil, fitri istedadı, bacarıqları ilə də seçilirlər. Belə gənclərdən biri də Ülviyyə Babaşovadır. Ülviyyə Babaşova Azərbaycan Dövlət Pedaqoji Universitetinin (ADPU) tələbəsidir. O ADPU -nun Musiqi, Təsviri incəsənət, Fiziki tərbiyə və Çağırışa qədər hazırlıq fakültəsində, təsviri incəsənət müəllimliyi ixtisası üzrə 3-cü kursda oxuyur. O uğurlu təhsillə yanaşı, yaradıcılıq nailiyyətlərinin səbəbini belə izah edir:

“Mən 1999-cu ildə Qobustan rayonunun Cəmcəmli kəndində anadan olmuşam. İlk təhsilimə 2005-ci ildə Cəmcəmli kənd, Rauf Babaşov adına tam orta məktəbində başlamışam və 2016-ci ildə həmin məktəbi bitirərək, həm qəbul, həm də qabiliyyət imtahanı verdim, Azərbaycan Dövlət Pedaqoji Universitetinə daxill oldum. Rəsmlə yanaşı, müxtəlif əl işləri hazırlamağa marağım var idi. Əl işlərimi taxta, gips, plastilin, gil, və s. materiallardan hazırlayıram. Bəzən bu işləri necə hazırlamağımla bağlı suallar verilir. Əvvəla onu deyim ki, bu işlərə marağım hələ uşaq yaşlarımdan yaranıb. Hətta o zamanlar məktəbimizdə fəaliyyət göstərən "Bacarıqlı əllər" dərnəyinə də yazılmışdım və orada da plastilindən insan, heyvan və bir sıra kiçik fiqurlar hazırlayırdım. Düzdür, bir müddət bu işlərlə bağlı fasilələr verdim. Artıq qabiliyyət imtahanı verən zaman anamın istəyi və məsləhəti bu oldu ki, heykəltəraşlıq üzrə imtahan verim və təhsil alım. Amma həmin vaxtlar özümdə əminlik hiss etmədiyim üçün təsviri incəsənət üzrə imtahan verdim. Sağ olsun, anam da məni başa düşdü. Şükürlər olsun ki, imtahanlardan uğurla keçdim və belə bir fakültəyə qəbul oldum”.

Müsahibimiz deyir ki, belə bir fakültəyə qəbul olmasına baxmayaraq, heykəltəraşlıqla bağlı marağı da, onu rahat buraxmır: “Anamın hələ o vaxtkı istəyi ürəyimdə qalmışdı. Artıq 2-ci semestrdə bizə heykəltəraşlıq dərsi də keçirilirdi. Mən də həmin dərsə maraqla yanaşdım və çox şükür ki, yavaş-yavaş bu marağın bəhrəsini görürəm. Artıq düzəltdiyim əl işləri çoxlarında maraq oyadır və bu da mənə stimul verir. İlk əl işim taxtadan hazırladığım "Tar, kaman və qaval" olmuşdu. Sonralar isə plastilindən hazırladığım işlərin sayı çoxaldı. Hətta bu işlərimi dekanımız Laçın Həsənova da çox bəyənmişdi. O, mənə bu işlərimi sərgilərə qoymağı məsləhət gördü. Mən Laçın xanıma və kafedradakı müəllimlərə həmişə borcluyam , onlara öz minnətdarlığımı bildirirəm ki, mənə bu istiqamətdə, fəaliyyətimdə, təhsilimdə düzgün yol göstərdilər. ADPU-da keçirilən sərgilərdə iştirak etdim. Məhz onların sayəsində işlərimi bir çox insanlar gördü və tanıdı. Hazırladığım işlər 11-13 oktyabr tarixində Bakı Ekspo Mərkəzində keçirilən "Təhsil sərgisi"ndə də nümayiş etdirildi. Artıq mən belə fikirləşirəm ki, az da olsa, anamın istəyini reallaşdırmış oldum. İnşallah, əgər qismət olarsa, təhsilimi davam etdirməli olsam, istərdim ki, magistraturanı heykəltaraşlıq üzrə oxuyum. Yəni, hədəfim bu sahədə işlərimi davam etdirmək və genişləndirməkdir”.

Tural Tağıyev

Palitra.-2018.-3 noyabr.-S.10.