Şeirdə yüksək obrazlılıq, bədii duyum və orijinallılıq olmalıdır

Etibar Vəliyevin poeziya dünyası bədii bənzətmələrlə yanaşı, bədii-fəlsəfi fikirlərlə də zəngindir ki, bu da şairin təbinin, ilhamının güclü olmasının təsdiqidir. Şeir o zaman oxucuya xoş gəlir ki, orada yüksək obrazlılıq, bədii duyum və orijinallılıq mövcuddur. Poeziya incilərində nə qədər dərin məzmun kəsb edən sözlər işlənirsə, insanın hiss və duyğularına təsir edən fikirlər öz əksini tapırsa, bu, şairin şan-şöhrətinin artmasına səbəb olur. Şeirdə nəzəri biliklərin qorunması da vacibdir. Əksər el şairlərinin yaradıcılığında nəzəri biliklərin pozulduğunun şahidi oluruq, amma bəzi qüvvətli el şairlərində nəzəri biliklər mükəmməl şəkildə qorunur. Etibar Vəliyev yaradıcılığını incələdikcə görürük ki, onun şeirlərində Azərbaycan dilinin qayda-qanunlarına, ədəbiyyat nəzəriyyəsinin tələblərinə ciddi riayət olunur. Şairin yaradıcılığında məhəbbət, ailə, təbiət, insan, Vətən və digər mövzulara müraciət olunması Etibar Vəliyevin ciddi ədəbi yaradıcılıqla məşğul olmasının göstəricisidir.

İndi isə şairin yaradıcılığından seçdiyimiz şeirləri oxucularla bölüşürük:

Sirr

Hər naxışın sehri olmaz,

Naxış sirri, ilməsində.

Şair odur, varsa sehri

Cümləsində, kəlməsində.

Sonu yoxdur kələklərin,

Sirri vardır fələklərin.

Bir hikmət var, mələklərin

Yazmasında, silməsində.

Göy deyilsə, yer deyilsə,

Tək deyilsə, bir deyilsə.

O İlahi sirr deyilsə,

Nə sirr var ki, bilməsində.

Dəydi

Bircə dəfə ox atmışdım,

Mənim oxum daşa dəydi.

Gecə bəd yuxu görmüşdüm,

Gerçək oldu, başa dəydi.

Oynu düz qura bilmədim,

Tərpəndim, dura bilmədim,

Hədəfi vura bilmədim,

Yandan keçdi, boşa dəydi.

Rəvan söylədim sözümü,

Göstərdim yanan közümü.

Bircə dəfə mən gözümü,

Gözə vurdum, qaşa dəydi.

İşıq olub nur saçmışdım,

Qəmdən, qüssədən qaçmışdım.

Mən sevgiyə əl açmışdım,

Gözdən axan yaşa dəydi.

Sənsiz

Kim nə deyir, yalan deyir,

Sənsiz yaşaya bilərəm.

Səninlə çəkdiyim yükü,

Sənsiz daşıya bilərəm.

Bir az yüküm ağır olar,

Bir az belim büküləcək.

Həsrətdən çuxura düşən

Gözüm yola dikiləcək.

Bir az küskün, bir az bədbin,

Bir az hallı görünərəm.

Bəxtəvərlərin gözündə,

Mən zavallı görünərəm.

Qəhər tutar boğazımı,

Bir az səsim bəm olacaq.

Üzdə gülüb danışsam da,

Gözlərimdə nəm olacaq.

Başıma qar kimi yağan,

Külüm közümdən düşəcək.

Sənsiz güldən qoxu gəlməz,

Çiçək gözümdən düşəcək.

Gedəsən

Dərd əlindən bulud kimi,

Boşalıb, dolub gedəsən.

Özün özünə ağlayıb,

Saçını yolub gedəsən.

Bir gün düzələsən yola,

Yaşın ötə, ömür dola.

Nə ağrı, nə acı ola,

Gül kimi solub gedəsən.

Cütlüklər verə qol-qola,

Qonaq gələ, mağar dola,

Ölüm də toy kimi ola,

Sən hazır olub gedəsən.

Məclis ola, yas olmaya,

Göz ağlaya, yaş olmaya.

Qalası miras olmaya,

Varını bölüb gedəsən.

Halını pozma, ay lələ,

Son qonağın gələr hələ.

Qapına Əzrail gələ,

Üzünə gülüb gedəsən.

Hər gün Xuda günü gələ,

Bir gün vida günü gələ.

Ruhun cüda günü gələ,

Sonra da ölüb gedəsən.

Sənə görə

Məni imtahan etmə, ay gözümün işığı,

Bilirsən ki, sınaqdan çıxaram

sənə görə.

Bu can evi nədir ki,

mən qurduğum binadır,

Bilirsən ki, yıx desən,

yıxaram sənə görə.

Sənə aşiq olanda, baxmadım ki,

yaşına.

Gəl üzərlik yandırım,

duz çevirim başına.

Gör necə vurulmuşam kirpiyinə,

qaşına,

Özümü eşq oduna yaxaram sənə görə.

Ocaqda ad sönməsə,

yanan közə gəlmərəm.

Özüm söz sərrafıyam,

şirin sözə gəlmərəm.

Məndən nigaran olma,

qorxma, gözə gəlmərəm,

Yaxama gözmuncuğu

taxaram sənə görə.

Mən ki vəfa görmədim, bu boş,

fani dünyadan,

Əvvəli bir an olan, sonu ani dünyadan.

Bilirəm can alandı,

mən o cani dünyadan

İstədim üz çevirəm,

baxaram sənə görə.

Aldanmadım dünyanın qızılı,

qaş-daşına,

O nə vaxt qıymayıb ki,

məzlumun göz yaşına?!

Boş dünyanı qaxaram dolu dünya başına,

Vallah, vallah qaxaram,

qaxaram sənə görə.

Gəl səninlə barışım

Küsülü adamların fikri qarışıq olur,

Unut olub keçəni, gəl səninlə barışım.

Hər küsülü məqamın sonu barışıq olur,

Unut olub keçəni, gəl səninlə barışım.

Dünya oyun oynayır,

səni oynuna almaz,

Oynayanda yıxılsan,

səni qoynuna almaz.

Günah şeytan yüküdü,

heç kim boynuna almaz.

Unut olub keçəni, gəl səninlə barışım.

Daha bəhsəbəhs ilə

yaşamaq istəmirəm,

Yaram qaysaq bağlayıb,

qaşımaq istəmirəm.

Məndə günah varsa da,

daşımaq istəmirəm.

Unut olub keçəni, gəl səninlə barışım.

Göy üzündə dumanın

sonu bitir yağışla,

Mən yağdım, sən də yağdın,

selə düşən axışla.

Mən səni bağışladım,

sən də məni bağışla,

Unut olub keçəni, gəl səninlə barışım.

Mahmud Əyyublu

AAB-nin üzvü

Palitra 2018.- 29 noyabr.- S. 15.