Krasnoyarskda Nəsiminin 650 illik yubileyi qeyd edilib

Krasnoyarskdakı Qaqarin adına Mədəniyyət Mərkəzində Prezident İlham Əliyevin imzaladığı "Böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında" sərəncama uyğun olaraq poeziya gecəsi keçirilib. Tədbir Rusiyanın Azərbaycanlı Gənclər Təşkilatının (RATİ) Krasnoyarsk nümayəndəliyinin təşkilatçılığı, Krasnoyarsk Deputatlar Şurasının millət vəkili, Krasnoyarsk diyarı Azərbaycan Milli-Mədəni Muxtariyyətinin sədri Taleh Mahmudovun dəstəyi ilə baş tutub.

Tədbirdə Krasnoyarsk diyarı qubernatorunun İctimaiyyətlə əlaqələr idarəsinin millətlərarasi şöbəsinin müdiri Soslan Taimurazoviç Tadtaev,

Krasnoyarsk diyarının "Xalqlar dostluğu evi"nin nümayəndəsi Anatoli Rinçinoviç Bazarov, həmçinin RATİ-nin Krasnoyarsk nümayəndəliyinin və Krasnoyarsk diyarı Azərbaycan Milli-Mədəni Muxtariyyətinin fəalları iştirak ediblər.

Gecəni RATİ-nin Krasnoyarsk nümayəndəliyinin sədri Aqil Cəfərov açaraq Prezident İlham Əliyev tərəfindən 2019-cu ilin "Nəsimi ili" elan olunduğunu deyib və İmaddədin Nəsiminin yaradıcılığı haqqında məlumat verib: "Nəsiminin yaradıcılığı bu gün insanın mənəvi və əxlaqi keyfiyyətlərinin yaxşılaşdırılmasında təsirli rol oynayır. Onun xarakteri insan iradəsinin dəyişməzliyinin, cəsarətinin, qəhrəmanlığının, əqidəsinə sadiqliyin simvoludur... Tarixi vətənimiz olan Azərbaycandan uzaqda yaşamağımıza baxmayaraq, tariximizi, mədəniyyətimizi, adət-ənənələrimizi dəyərləndiririk, xatırlayırıq, paylaşırıq... "

Tədbirdə Krasnoyarsk diyarı Azərbaycan Milli-Mədəni Muxtariyyətinin sədrinin dini işlər üzrə müavini hacı Mütəllib İbişov, Sibir Federal Universitetinin tələbəsi Tehranə İsmayılova şairin yaradıcılığının dini əhəmiyyəti barədə danışıblar.

Tədbirin davamında Sibir Federal Universitetinin tələbələri və Krasnoyarsk diyarı Azərbaycan Milli-Mədəni Muxtariyyətinin fəalları İmadəddin Nəsiminin şeirlərini oxuyublar. Sonda "Nəsimi" filmindən fraqmentlər nümayiş olunub.

Fuad Hüseynzadə

Palitra 2019.- 25 dekabr.- S.13.