“Mən şeirlə nəfəs
alıram”
Sahib Məmmədov: “Mənim
yaradıcılığımda əsasən fəlsəfi mövzu üstünlük
təşkil edir”
Bu yaxınlarda gənc şair Sahib Məmmədovun
Bakıda rusca çap
olunan "Keçmişin
bulmacaları" kitabının təqdimatı olub. Az bir
zamanda kitab böyük oxucu
auditoriyası toplayıb. Sahib Məmmədov
“Palitra”ya müsahibəsində
kitab haqqında, eləcə də gələcək
planları ilə bağlı danışıb. Xatırladaq ki, Sahib Əziz oğlu Məmmədov 21 oktyabr
1986-cı ildə Bakı şəhərində anadan olub. Azərbaycan
Dövlət İqtisad Universitetinin
məzunudur. Boks üzrə idman ustasıdır. İlk
şeirlərini magistratura təhsilinin birinci ilində oxuyarkən yazıb və elə
həmin ildən ölkənin bir çox ədəbi almanaxlarında çap olunmağa
başlayıb. Azərbaycanda və xaricdə keçirilən
bir çox şeir müsabiqələrinin qalibidir. Rusiya
Yazıçılar Birliyinin üzvüdür.
- İlk
kitabınız sizə nə kimi uğur gətirdi?
-Çox şadam ki, şeirlərim
internetdə oxucular arasında
populyarlıq qazanır və həm həmvətənlərimdən,
həm də xaricdə yaşayan insanlardan çox rəy
alıram. İndi isə mənim kiçik yaradıcılığım kitab şəklində üzə
çıxaraq yeni bir
yol açdı. Bu, mənim
ilk kitabımdır: 2007-ci ildən
2010-cu ilə qədər yazılmış şeirlər burada toplanıb. Və hər bir
şeir həyatımın mürəkkəb
mozaikasından gələn bir
bulmacadır, buna görə "Keçmişin bulmacaları" adlanır.
Bunların ilk qələm nümunələri
olmasına baxmayaraq, Leyla
Əliyeva və Çingiz Abdullayev onlara müsbət
rəy verdilər. Bunlar mənim üçün çox
dəyərli və qiymətlidir. Kitab
artıq Bakıdakı bütün
satış mərkəzlərində var
və hətta Rusiyadan da
istənilir.
-
Kitabınızın Bakıda təqdimatı olub.
Bu kitabın başqa
ölkədə təqdimatını keçirməyi düşünürsüzmü?
-Bakıda 1 noyabrda Rəşid
Beybudov Mahnı Teatrında mənim poeziya konsertim və
kitabın təqdimatı oldu. Pis hava şəraitinə
baxmayaraq tam bir salon toplandı və
gecə bir anşlaqla
keçdi. Yaxın gələcəkdə
Moskvada da eyni formada möhtəşəm
təqdimat keçirməyi planlaşdırıram.
- Siz
şeirlərinizi əsasən hansı üslübda
yazırsız?
-Mənim yaradıcılığımda əsasən
fəlsəfi mövzu üstünlük
təşkil edir. Ancaq
yenə də fərqli istiqamətlərdə özümü
sınayıram. Buna görə kitab hissələrə bölünür.
Bunlar fəlsəfi lirika,
Şərq, Sevgi, Vətəndaş və
s.
- Ümumiyyətlə,
sizin üçün
şeir yazmaq mənəvi
tələbatdan irəli gəlir, yoxsa bu bir həvəsdir?
-Mənim üçün
yaradıcılıq sadəcə hobbi deyil, bu mənim həyatımdır!
Şeirlərlə nəfəs alıram və uzun gecə
çalışdığımdan və hər sözü cilalamağımdan inanılmaz zövq alıram. Bu sevimli əməlim olmadan
varlığımı təsəvvür edə bilmirəm.
- Bakıda və
ya xaricdə keçirilən şeir müsabiqələrində iştirak edirsizmi?
-Çox vaxt
həm vətənimizdə, həm də xaricdə
keçirilən müxtəlif festival və
müsabiqələrə dəvət alıram. Belə tədbirlərdə iştirak
etməyi, başqa ölkələrin
yazıçıları ilə ünsiyyət qurmağı,
əsərlərini dinləməyi xoşlayıram. 2017-ci ildə
blogger Viktor Mardoninin Ümumrusiya poetik marafonunda ilk beşliyə düşdüm.
2018-ci ildə Nəsimi Beynəlxalq Festivalı çərçivəsində
keçirilmiş Bakıda təşkil
edilən müsabiqədə Ən yaxşı şeir mükafatına layiq
görüldüm. 2019-cu ildə isə Nəsiminin
650-nə həsr olunmuş bir müsabiqənin laureatı oldum.
Ondan dərhal sonra
LİFT böyük dünya
ədəbi festivalının "Gənc səs"
nominasiyasında qalib oldum.
Beynəlxalq səhnədə sənin adının elan olunması və sonra
"Azərbaycan!" deyilməsi izaholunmaz
hisslərdir. Gecə yatmamağa dəyər.
- Yeni kitab çap etmək planda varmı?
-Dediyim kimi, bu yaxınlarda nəşr olunan kitabımda 2010-cu ildən əvvəl yazılmış şeirlərim var. Hələ çap olunmamış çox şeirlərim var. Ona görə gələn il mütləq ikinci kitabımı da nəşr etdirəcəm. Ona nə ad verəcəyimi isə hələ düşünməmişəm.
Fuad Hüseynzadə
Palitra.-2019.-26 noyabr.-S.7.