Azərbaycanın dostu Mariya Suvorovskaya “Üzümlüyün yanındakı ev“ adlı yeni kitabını təqdim edəcək

Azərbaycan mədəniyyətinə və adət-ənənələrinə aşiq olan, Rusiyada yaşayan yazıçı, ictimai xadim, biznes- ledi Mariya Suvorovskaya oxucularını heyrətləndirməkdə davam edir. Onun "Xəzər üzərində yelləncək" adlı kitabı populyarlıq qazandıqdan sonra, dekabr ayında növbəti, "Üzümlüyün yanındakı ev" adlı yeni kitabı nəşr olunacaq. Əsər Azərbaycanda şərabçılıqla əlaqəli bir sevgi hekayəsi haqqındadır.

- Mariya xanım, niyə şərabçılıq?

- Çünki şərab təkcə içki deyil, bütöv bir fəlsəfədir. Azərbaycanda şərabçılıq yeni populyarlıq dalğası yaşayır. Alkoqol içmirəm, amma Azərbaycan şərablarının dünyada və təbii ki, Rusiyada necə sevildiyini bilirəm. Şərab bir məcazdır. Kompleks zövq, böyümək, yenidən düşünmək, axtarış, çoxyönlüdür. Hekayənin əsasını, son dövrlərdə çox rast gəldiyimiz , həyatı yenidən başlamağı qərara almış iki yetkin insanın sevgi hekayəsi təşkil edir. Yenidən boş bir vərəq götürmək, tapmaq, sevmək və itirməmək heç vaxt gec deyil.

- Sevgi haqqında yazmaq üçün bunu hiss etmək lazımdır. Sizin üçün sevgi nədir?

- Sevgi ailəm, sevimli ərim, üç övladım, valideynlərim, komandam, işimdir. Sevgi hər gün tapıla bilən, dünyanın gözəlliyidir. Düşən payız yarpaqlarında, axşamın sükutunda və qürub rəngləri... Dənizin səsi və bir qurtum ətirli çay... Sevgi ətrafımızdadır, lakin biz həmişə onu görə bilmirik.

- "Üzümlüyün yanındakı ev" adlı yeni kitabı haradan və nə vaxt tapmaq olacaq?

- Kitab dekabr ayında təqdim ediləcək, mağazalara və elektron qaynaqlara yerləşdiriləcək. İndi Bakıda, “Əli və Nino” şəbəkəsində və Bakı Kitab Mərkəzində “Xəzər üzərində yelləncək” kitabını tapa və əldə edə bilərsiniz. Azərbaycan kitab mağazalarına və ölkənin bütün oxucularına işimə göstərdikləri dəstəyə və diqqətə görə təşəkkür edirəm. Bu, şübhəsiz ki, məni çox ruhlandırır. Kitab soruşulur, axtarılır və biz daim Bakıya yeni nüsxələr göndəririk. Dekabr ayında Bakıda yeni bir hekayəni də təqdim edəcəyik. Düşüncələriniz oxuculara yaxın olduqda, bu, bir yazıçının xoşbəxtliyidir. Çox rəy alıram. Mən isti, alovlu hisslərin, sevginin bu dünyanı idarə etdiyini başa düşürəm. Həm də hər kəsin qəlbində rahat bir köşəsi, öz "üzümlüyünün yanında evi" var.

Fuad Hüseynzadə

Palitra 2019.- 17 sentyabr.- S.7.