Xaricdəki
soydaşlarımız 20 Yanvar şəhidlərinin
ildönümünü qeyd
edirlər
20 Yanvar faciəsinin 29-cu ildönümü ilə əlaqədar
dünyanın müxtəlif ölkələrindəki
soydaşlarımız anım tədbirləri keçirirlər.
Belə ki, Azərbaycanın
Gürcüstandakı səfirliyinin 20 Yanvar
faciəsinin 29-cu ildönümü ilə
əlaqədar hazırladığı tədbirlər planı
çərçivəsində Gürcüstanın Dmanisi rayonunda Qanlı Yanvar hadisələrinə həsr olunmuş anım mərasimi keçirilib.
Rayondakı Heydər Əliyev Mərkəzində
təşkil olunan tədbirdə Azərbaycanın
Gürcüstandakı səfiri Dursun Həsənov,
səfirliyin əməkdaşları, Kvemo
Kartli bölgəsi qubernatorunun
müavini Zaur
Darğallı, Dmanisi Rayon
İcra Hakimiyyəti
başçısının müavini Arif Süleymanov, rayon ictimaiyyətinin nümayəndələri
iştirak ediblər. Dmanisi Rayon
İcra Hakimiyyəti
başçısının müavini Arif Süleymanov
çıxış edərək bildirib
ki, 1990-cı il
yanvarın 19-dan 20-nə keçən gecə sovet
imperiya qüvvələrinin Azərbaycanda
törətdiyi qırğın, əslində, bir xalqın azadlıq və müstəqillik uğrunda mübarizəsini boğmaq
cəhdi idi. Azərbaycanın
Gürcüstandakı səfiri Dursun Həsənov
çıxış edərək 1990-cı ilin
20 Yanvar faciəsinin səbəbləri,
xalqlarımızın müstəqillik uğrundakı
mübarizəsi barədə ətraflı məlumat verib. Sonra Gürcüstan Ağsaqqallar
Şurasının sədri İsaq Novruzov, Dmanisi rayon bələdiyyəsinin deputatı Ramiz Ramazanov, Gürcüstan Azərbaycanlıları Milli Konqresinin sədri
Əli Babayev, tədqiqatçı-jurnalist
Mirzə Maşov və başqaları
çıxış edərək 20 Yanvar
faciəsi ilə bağlı fikirlərini bölüşüb,
xalqlarımızın azadlıq, suverenlik
uğrunda mübarizə tarixinə nəzər
salıblar. Sonda 20 Yanvar
faciəsindən bəhs edən sənədli film
nümayiş etdirilib.
Astanada 20 Yanvar şəhidləri
anılıb
Qazaxıstanın Astana
şəhərində də Azərbaycanın
Qazaxıstandakı səfirliyinin təşkilatçılığı,
Azərbaycan Respublikası Mədəniyyət Nazirliyinin
tabeliyində Mədəniyyət üzrə Elmi-Metodiki
və İxtisasartırma Mərkəzinin dəstəyi ilə
20 Yanvar faciəsinin anım tədbiri keçirilib. Azərbaycanın
Qazaxıstandakı səfirliyindən “Palitra”ya bildirilib ki,
tədbirdə bu ölkədə akkreditə
olunan diplomatik korpusun, beynəlxalq təşkilatın rəhbərləri,
ölkə ictimai xadimləri, icma üzvləri iştirak
ediblər. Qanlı Yanvar
faciəsinin ermənilərin "böyük
Ermənistan" yaratmağa yönəlmiş
strateji planlarının tərkib hissəsi
olduğunu bildirən Azərbaycanın
Qazaxıstandakı səfiri Rəşad Məmmədov,
Bakı qırğınında canlı qüvvə kimi erməni əsgər və zabitlərindən
də geniş
istifadə edildiyini vurğulayıb. Diplomat qeyd edib
ki, Bakıda baş
verən Qanlı Yanvar hadisələri
1986-cı ilin 16-19 dekabrında sovet qoşunlarının Qazaxıstanın
Almatı şəhərində mülki əhaliyə
qarşı törətdiyi vəhşiliklərin davamı idi. Qeyd olunub
ki, həmin dövrdə istefada
olmasına baxmayaraq, hadisəyə
zamanında qətiyyətli reaksiya verənlərdən
biri məhz ulu öndər
Heydər Əliyev olmuşdu. Tədbirdə
Qanlı Yanvar hadisələrini əks
etdirən fotolar nümayiş
olunub.
Macarıstanda 20 Yanvarla bağlı ingilis
dilində tədbir keçirilib
Azərbaycan Respublikasının Macarıstandakı səfirliyində də 20 Yanvar faciəsinin 29-cu ildönümünə həsr olunmuş anım tədbiri keçirilib. Tədbir ingilis dilində keçirilib və iştirakçılara 20 Yanvar faciəsi ilə bağlı məlumatların verilməsi ilə yanaşı, “Son İclas” filmi (ingilis subtitrlər ilə) nümayiş etdirilib.
İsraildə fəaliyyət göstərən Azİz təşkilatı da 20 Yanvar faciəsi ilə bağlı tədbir təşkil edib. Tədbirdə şəhidlərin xatirəsi ehtiramla yad edilib, 20 Yanvara həsr olunan fotoşəkil və plakatlar nümayiş olunub. Azərbaycan mədəniyyət evinin direktoru Yeganə Salman və Azİz təşkilatının Qüds şəhərindəki rəhbəri Aleksandr Aqranovkiy tədbirdə çıxış edərək azərbaycanlılara qarşı törədilmiş müsibətlərdən bəhs ediblər.
Qeyd olunub ki, biz Azərbaycanın hər zaman yanındayıq və hər birimiz 1990-cı ilin yanvar hadisələrini və yanvarın 19-dan 20-nə keçən gecə baş verən faciəni daim xatırlayırıq. Onlarla insanın ölümü və yaralanması ilə müşayiət olunan bu hadisə Azərbaycan tarixinin qanlı səhifəsidir, eyni zamanda, həm də müstəqillik uğrunda qəhrəmanlıq dastanıdır. Anım tədbirində 20 Yanvar gününün Azərbaycanda "Ümumxalq hüzn günü" kimi qeyd olunmasından da danışılıb və o müdhiş gecənin qurbanları arasında yəhudilərin də olduğu bir daha diqqətə çatdırılıb. Bildirib ki, Qanlı Yanvar hadisələrində 22 yara alan Yan Meyeroviç, 17 yaşlı gənc Vera Besantina və insanları xilas etməyə çalışan həkim Aleksandr Marhevkanın xatirəsi heç zaman unudulmayacaq və hər zaman qəlbimizdədir.
Ukraynadakı diasporumuz 20 Yanvar faciəsinin yerli ictimaiyyətə çatdırılması yolunda uğurlu addımlar atır
20 Yanvar faciəsinin Ukrayna ictimaiyyətinə çatdırılması yolunda, diasporumuz uğurlu addımlar atır. Ermənilərin sosial mediada Bakı hadisələrini başqa istiqamətlərə yozmasının qarşısını almaq üçün, tədbirlərə yanvarın 15-dən start verilib. Dnepr Azərbaycanlılar Konqresinin fəalları vilayət inzibati binasının önündəki abidə üzərinə gül dəstələri qoyaraq, Ukraynanın azadlığı uğrunda canlarından keçənlərin xatirəsini yad ediblər. Sonra Ukrayna ictimaiyyətinin nümayəndələri də iştirak edən yığıncaqda, 20 Yanvar 1990-cı il hadisələri barədə ətraflı məlumatlar dinlənilib. Tədbir Ukraynanın bütün vilayətlərində və Kiyev şəhərində davam etdiriləcək.
Türkiyənin İstanbul Universitetində isə professor Aygün Attarın təşkilatçılığı ilə “20 Yanvar soyqırımı-Qanla qazanılan müstəqilik” adlı konfrans keçirilib.
Fuad Hüseynzadə
Palitra.-2019.-18 yanvar.-S.7.