“Səma” rəqs qrupunun çıxışı Əbu-Dabi
dövlət televiziyasında canlı yayımlanıb
Birləşmiş
Ərəb Əmirliklərinin paytaxtı Əbu-Dabidə
keçirilən Şeyx Zayed İrsi Beynəlxalq
festivalında Azərbaycan da təmsil olunur.
AZƏRTAC xəbər verir ki, festivalın ölkəmizi təmsil edən “Səma” rəqs qrupu “Odlar Yurdu” rəqs kompozisiyasını ifa edib. Azərbaycan rəqs qrupunun milli musiqimizin sədaları altında çıxışı Əbu-Dabi dövlət televiziyası tərəfindən canlı yayımlanıb.
Daha sonra
milli rəqs qrupumuz
proqramlarını Azərbaycan pavilyonun
qarşısında quraşdırılmış səhnədə
davam etdirib. Rəqslər
tədbir iştirakçılarının böyük
marağına səbəb olub, qonaqlar milli paltarda olan rəqs
ifaçıları ilə şəkillər çəkdirib.
Rəqslərin yanvarın 26-dək hər gün
təşkili planlaşdırılır.
Tədbir çərçivəsində
təşkil edilmiş paradda
Azərbaycan pavilyonunun
iştirakçıları milli paltarlarda Azərbaycanın dövlət
bayrağını bütün festival ərazisində gəzdirərək,
ziyarətçilərlə şəkillər çəkdirib
və iştirakçılara ölkəmiz barədə geniş məlumat veriblər.
Festivalda Azərbaycan məhsul və xidmətlərindən ibarət pavilyon qurulub. Pavilyonda müxtəlif milli geyimlərimiz, Azərbaycan xalça muzeyində saxlanılan xalçaların prototipləri yer tapıb, ölkəmizdə istehsalı olan çay və ərzaq məhsulları nümayiş edilib. Eyni zamanda, pavilyonda ölkəmizin turizm imkanları, mədəni, tarixi və memarlıq abidələrinin tanıdılması istiqamətində təbliğat işləri aparılıb.
Qeyd edək ki, Şeyx Zayed Festivalını hər il iki milyondan çox insan ziyarət edir.
Palitra 2019.- 23 yanvar.-
S.13.