“Ermənistanda antirusiya əhvali-ruhiyyəsi artmaqdadır”

Azərbaycan Prezidenti İlham Əliyev və Ermənistanın baş naziri Nikol Paşinyanın Davos görüşü əcnəbi ekspertlər tərəfindən də müsbət qiymətləndirilib. Rusiyalı teleaparıcı və ekspert Yevgeni Mixaylov “Trend”ə deyib ki, Davos görüşü, ilk növbədə onu göstərdi ki, hazırda Ermənistan hökumətinin Dağlıq Qarabağ münaqişəsi üzrə danışıqlar prosesində dəqiq siyasi xətti yoxdur. O bildirib ki, Azərbaycan Prezidenti daha inamlı görünürdü: “Prezident İlham Əliyev Nikol Paşinyandan fərqli olaraq daha geniş nizamlama planı ilə çıxış etdi. Son zamanlarda ATƏT-in Minsk qrupu həmsədrlərinin münaqişə tərəflərini əhalini sülhə hazırlamaq barədə şərhlərini də nəzər alsaq, bu fakt onu göstərir ki, Paşinyanın seçimi azdır. Ona görə də ehtimal edə bilərəm ki, Davos görüşü Dağlıq Qarabağ münaqişəsinin real həllinin başlanğıcıdır”.

Y.Mixaylov qeyd edib ki, bir çox KİV-lərdə N.Paşinyanın ünvanına tənqidlər səslənməsini, eləcə də onun mövqelərini əldən verdiyi barədə fikirlərin yer almasını təsadüfi hesab etmir: “Aydındır ki, Rusiya indi məhz Bakıya kömək etmək üçün maksimum səy göstərir, çünki Ermənistanda antirusiya əhvali-ruhiyyəsi artmaqdadır”.

“Dağlıq Qarabağ münaqişəsinin həlli yollarının axtarışı davam etdirilməlidir”

Yeri gəlmişkən, Latviya Respublikasının xarici işlər naziri Edqar Rinkeviç Seymdə xarici siyasət məsələlərinə həsr olunmuş debatlarda çıxış edib. Nazir Avropanın enerji təhlükəsizliyinin təmin olunmasında Azərbaycanın rolunu yüksək qiymətləndirib. O deyib: “Latviya Respublikasının xarici siyasəti hər bir müasir demokratik dövlətə xas olan dəyərlərə - insan ləyaqətinə, insan hüquq və azadlıqlarına hörmət prinsiplərinə əsaslanır. Bu dəyərlər. Latviyanın xarici siyasəti tarazlaşdırılmış mənafelər siyasətidir”.

E.Rinkeviç öz çıxışında Latviyanın Şərq tərəfdaşlarını da xatırlayıb. Latviya XİN rəhbəri deyib: “Avropa İttifaqının Şərq Tərəfdaşlığı siyasəti Latviyanın xarici siyasətinin prioritet məsələsidir. Bu proqramın üzvü olan ölkələrə gəldikdə, digər avropalı müttəfiqlər kimi, biz də aydın dərk edirik ki, Şərq tərəfdaşlarının hər biri özünün daxili və xarici siyasət xəttini müstəqil seçə bilər. Latviya Avropa qitəsində bəzi təsir dairələrinin güclənməsinə heç vaxt razılıq verməyəcək, çünki belə hallar, adətən, qanlı münaqişələrlə nəticələnir. Latviya Avropanın enerji təhlükəsizliyinin təmin olunmasında Azərbaycanın rolunu yüksək qiymətləndirir. Eyni zamanda, Dağlıq Qarabağ münaqişəsinin həlli yollarının axtarışı davam etdirilməlidir”.

“Dövlətlərin suverenliyinə və ərazi bütövlüyünə hörmətlə yanaşmaq ən vacib məsələdir”

AŞPA-nın qış sessiyasında isə “Milli azlıqdan olan insanların hüquqlarını təşviq etmək” adlı məruzənin müzakirəsində Azad Demokratlar Qrupu adından qrupun vitse-prezidenti Qənirə Paşayeva Azərbaycanın ərazi bütövlüyünün qorunmasından danışıb. O deyib ki, “Milli azlıqların qorunması haqqında” Çərçivə Konvensiyasına uyğun hüquqların icrası dövlətlərin ərazi bütövlüyünü və Konvensiyanın monitorinq sistemini sarsıdan fəaliyyətlər olmamalıdır. Deputat Məşvərət komitəsini bu məsələlərdə ehtiyatlı olmağa çağıraraq bildirib ki, Məşvərət Komitəsinin vəzifəsi üzv dövlətlərdə müvafiq hüquq və azadlıqların yaxşılaşmasına yönələn tövsiyələr verməkdir: “Buna görə də Komitə üzvləri bu məsələnin həssaslığını daha yaxşı anlayan, Avropanın müxtəlif regionlarının və ölkələrinin tarixi və xüsusiyyətləri barədə zəruri ixtisasa və bacarıqlara malik təcrübəli, səriştəli ekspertlər olmalıdırlar. Komitənin tövsiyələri öz növbəsində, Konvensiyanın dilinə və ruhuna uyğun olmalı, milli azlıqların hüquqlarının qorunmasını və təşviqini irəli çəkmək məqsədinə xidmət göstərməlidir.

Bu məsələlərin həssaslığını nəzərə alaraq, bütün səylər Avropada bölünmələrin və gərginlik mənbələrinin yaradılmasının qarşısının alınmasına yönəlməli və Komitə öz işində Çərçivə Konvensiyasının səmərəli şəkildə həyata keçirilməsi vasitəsilə Avropa xalqları və millətləri arasında birlik və həmrəyliyin əldə edilməsi məqsədi daşımalıdır.

“Azərbaycan Çərçivə Konvensiyası çərçivəsində qarşılıqlı hörmət və anlaşma əsasında konstruktiv dialoqa hazırdır və açıqdır”.

O, ərazi bütövlüyü məsələsinə xüsusi diqqət ayıraraq bildirib ki, Avropanın gələcəyi üçün bu məsələyə yanaşma birmənalı olmalıdır. Azərbaycanlı deputat Avropa Şurasının “Milli azlıqların qorunması haqqında” Çərçivə Konvensiyasının milli azlıqların qorunması ilə bağlı həssas məsələləri əhatə etdiyini söyləyərək, dövlətlərin ərazi bütövlüyünə və suverenliyinə hörmət prinsipinə əməl olunmasının vacibliyini diqqətə çatdırıb.

“Biz istəməzdik ki, əli Azərbaycan xalqının qanına batmış bir cani qəhrəmanlıq simvolu kimi əbədiləşsin”

Bu arada Azərbaycan-Gürcüstan parlamentlərarası əlaqələr üzrə İşçi qrupunun rəhbəri Əflatun Amaşov qrupun üzvləri adından Gürcüstan parlamentinin Azərbaycan Milli Məclisi ilə Dostluq qrupunun rəhbəri Zviad Dzidziquriyə müraciət edib. “Trend”in məlumatına görə, müraciətdə qeyd olunur ki, Gürcüstan və Azərbaycan xalqları arasındakı tarixi dostluq və mehriban qonşuluq münasibətləri hər zaman özünün nümunəviliyi ilə diqqət çəkib: "Sevindirici haldır ki, müasir dövrdə bu münasibətlər strateji tərəfdaşlığa əsaslanaraq yüksələn xətt üzrə inkişaf etməkdədir. Bu baxımdan, Azərbaycan və Gürcüstan parlamentlərinin üzərinə də böyük məsuliyyət düşür və hər iki ölkənin ali qanunverici orqanlarının tarixi dostluğumuzun dərinləşməsi istiqamətdəki fəaliyyəti xüsusi vurğulanmalıdır. Parlamentlərimiz səviyyəsindəki qarşılıqlı iş birliyi hər iki xalqın ortaq maraq və mənafelərinin qorunmasına yönələn müstəsna təminatdır. Bu təminat zaman-zaman yaşanmış anlaşılmazlıqların və incikliklərin tez bir zamanda aradan qaldırılmasında da mühüm mənəvi dividenddir.

Məlum olduğu kimi, 2019-cu il yanvarın 20-də Gürcüstanın Axalkalaki şəhərinin Buqaşen qəsəbəsində Azərbaycanın Dağlıq Qarabağ bölgəsinin və ətraf ərazilərinin işğalında, bu ərazilərdə azərbaycanlılara qarşı qətllərin törədilməsində birbaşa iştirak etmiş Mixail Avaqyanın büstü qoyulub. Bu hadisə ölkəmizin ictimai rəyində kifayət qədər mənfi rezonans doğurub. Biz istəməzdik ki, əli Azərbaycan xalqının qanına batmış bir cani qəhrəmanlıq simvolu kimi əbədiləşsin. Nəzərə alınmalıdır ki, Gürcüstan Azərbaycan kimi, etnik separatizmdən əziyyət çəkir. Onun da torpaqlarının 20 faizə qədəri zəbt olunub. M.Avaqyan isə həm də Gürcüstan torpaqlarının işğalında yaxından iştirakı ilə seçilib. O, faktiki olaraq hər iki xalqın düşmənidir".

Bildirilir ki, müasir dövrdə xalqlarımızı birləşdirən ağrı və acılar eynidir. Buna görə Azərbaycan dövləti hər zaman Gürcüstanın ərazi bütövlüyünü dəstəkləyib və bu dəstəyi özünün regional xarici siyasətinin başlıca prioriteti hesab etməkdədir. Azərbaycan üçün Gürcüstan həm də soydaşlarımızın kompakt məskunlaşdıqları, dost gürcü xalqı ilə mədəniyyət və məişəti, dövlətçilik ənənələrini birgə bölüşdükləri və yaşatdıqları vətəndir:

"Biz, Azərbaycan-Gürcüstan parlamentlərarası əlaqələr üzrə İşçi qrupunun üzvləri bu müraciətimizlə Gürcüstan-Azərbaycan Dostluq qrupunun üzvlərini xalqlarımızı birləşdirən dəyərləri bölməyə, iki xalq arasında nifaq toxumu səpməyə çalışan qüvvələrə qarşı prinsipial mövqe nümayişinə çağırırıq. Sizlərin diqqətini yaranmış problemə ciddi şəkildə çəkməyi düşünür, məlum hadisədən narahatlığımızı bildiririk.

İnanırıq ki, prinsipial mövqeyiniz sayəsində Axalkalaki şəhərinin Buqaşen qəsəbəsində qatil Mixail Avaqyana ucaldılmış abidə götürüləcək. Məsələyə həssas yanaşacağınıza əminliyimizi ifadə edir, hər birinizə uğurlar arzulayırıq".

Fuad Hüseynzadə

Palitra 2019.- 26 yanvar.- S. 11.